Yyefuge kaŋkurowoge, yatɔɔre kwùŋi
9
Ka Kafooŋi Kile si *Musa pyi: «Sà yi jwo Farɔn a na mii u ɲyɛ Kafooŋi, *Eburu shiinbii u Kileŋi ke, na mii a jwo u na shiinbii yaha pi a wà pi i sà na pêe. 2 Na u aha mpyi u ɲyɛ a pi cye yaha mɛ, maa núrʼa pi cû a yaha, 3 yatɔɔre ti ɲyɛ u á sige e, mu à jwo u shɔnyi ná dùfaanyi ná u ɲwɔhɔyi ná u nìiyi ná u mpàabii ná sikaabii ke, mii sí na fànhe cyêe u na si yampimɛ tɛ̀gɛ tire kɛ̀ɛge. 4 Ŋka mii Kafooŋi sí *Izirayɛli shiinbii yatɔɔre cè n-wwû, *Misira shiinbii yatɔɔre e, yafyin sì n-kwû Izirayɛli shiinbii woore e mɛ.»5 Ɲyɛ canŋke Kafooŋi sí tire kakyaare pyi ke, u a kuru canŋke tɛ̀gʼa kwɔ̀. U a jwo na uru u ɲyɛ Kafooŋi ke, nùmpanŋa uru sí nte kakyaare pyi kìni i.
6 Ɲyɛ kuru canŋa nùmpanŋa na, ka Kafooŋi si li pyi bà u mpyi a yi jwo mɛ, Misira shiinbii yatɔɔre punʼa kwû. Ŋka yafyin ɲyɛ a kwû Izirayɛli shiinbii woore e mɛ. 7 Ka Farɔn si pìi tun pi a sà kàanmucyaga pyi, ka pire si núrʼa pa yi jwo u a na yafyin ɲyɛ a Izirayɛli shiinbii yatɔɔge kà ta mɛ. Ŋka lire ná li wuuni mú i, u a niŋgyiini waha, u ɲyɛ a ɲɛnʼa Izirayɛli shiinbii cye yaha mɛ.
Yyefuge baaniwoge, nɔɔyi kani
8 Ka Kafooŋi Kile si *Musa ná *Arɔn pyi: «Yii sà cwɔɔnre tà wwû bwɔnhigilʼe, Musa sí ti wà nìɲyiŋi na Farɔn ɲyii na. 9 Tire cwɔɔnre sí n-pyi bamba fiige si ɲcaala *Misira kìni puni i, si nɔɔwaare yaha sùpyire ná yatɔɔre na kìni puni i, tire nɔɔwaare sí n-pa n-puru si mpyi nɔɔyɔ cyeere puni na. 10 Ka Musa ná Arɔn si sà cwɔɔnre kuu bwɔnhigilʼe, Musa a pa ti wà nìɲyiŋi na Farɔn ɲyii na ke, ka ti i nɔɔwaare yaha sùpyire ná yatɔɔre na. 11 Nɔɔwaarʼa a Misira kìni jínamahabii pyi pi ɲyɛ a jà a fworʼa kàre Musa cyage e mɛ, ɲaha na yɛ bà ti mpyi Misira kìni shiinbii sanmpii na mɛ, amuni ti mpyi pi na. 12 Ka Kafooŋi si Farɔn niŋgyiini pyi lʼa waha, u ɲyɛ a ɲɛnʼa lógo Musa ná Arɔn ɲwɔ na bà Kafooŋi mpyi a yi jwo Musa a mɛ
Yyefuge baashɔnwoge, zànhafunɲcɛnɲyi kani
13 Ka Kafooŋi si *Musa pyi: «Nùmpanŋa ɲyɛsɔɔge na, maa sà yi jwo Farɔn a, na mii u ɲyɛ Kafooŋi, *Eburu shiinbii u Kileŋi ke, na mii a jwo u na shiinbii yaha pi a wà pi i sà na pêe. 14 Na u tɛ̀ɛn ná lʼe numɛ, na mii sí yyefuge shiŋi puni nɔ u ná u kìni yyaha yyére shiinbii ná u kìni shiinbii sanmpii na, bà u si mpyi si li cè na mii ná wà ɲyɛ ɲumbwɔɲɛɛ ɲìŋke na mɛ. 15 Mii nʼa mpyi a na fànhe cyêe u na, maa yampimpe pà cyán u ná u kìni yyaha yyére shiinbii ná u kìni shiinbii sanmpii na, numɛ mpyi na sí u wuyi ta yʼa kwɔ̀ ɲìŋke na. 16 Ŋka mii a u yaha shì na, si na fànhe cyêe u na, bà mii mɛge si mpyi si nɔ ɲìŋke cyeyi puni i mɛ. 17 Yi jwo u a na u yákili ta dɛ! U aha núrʼa mii shiinbii cuɲcyere cû, maa mpyi u ɲyɛ a ɲɛnʼa pi cye yaha mɛ, 18 nùmpanŋa numɛ cyiin, mii sí zànhafunɲcɛnɲyɛ kakyanhala wuyo tîrige, ɲjemu yi ɲyɛ, mà lwɔ́ *Misira kìnʼa pyi kìre ke, yi fiige saha ŋkwɔ̀ a pyi a ɲyɛ lʼe mɛ. 19 Yi jwo u a na u yatɔɔre ná yaaga maha yaaga ku ɲyɛ sige e ke, u yire puni lèŋɛ pyɛnge e fwɔfwɔ. Zànhafunɲcɛɛnyi ká ɲcwo mà shin maha shin, lire ɲyɛ mɛ mà yatɔɔgɔ maha yatɔɔgɔ ta sige e léŋɛmbaa pyɛnge ke, yi sí yire puni bò.»
20 Ɲyɛ Farɔn kìni yyaha yyére shiinbii pi mpyi a Kafooŋi jwumpe le baragʼe ke, ka pire si pi báarapyiibii ná pi yatɔɔre lèŋɛ pyɛnge e fwɔfwɔ. 21 Ŋka mpii pi ɲyɛ pi ɲyɛ a Kafooŋi jwumpe lwɔ́ a wíi mɛ, pirʼa pi bilibii ná pi yatɔɔre yaha sige e.
22 Ka Kafooŋi si Musa pyi: «Ma cyɛge yîrige nìɲyiŋi na, bà zànhafunɲcɛɛnyi si mpyi sʼa ntîre Misira kìni puni i, sùpyire ná yatɔɔre ná kɛriyi yafaayi ɲuŋʼi mɛ. 23 Ka Musa si u kàbiini yîrige nìɲyiŋi na, ka Kafooŋi si sanmpɛrɛŋi ná zànhafunɲcɛɛnyi tîrige, ka nage si wu ɲìŋke na. Lire pyiŋkanni na, Kafooŋi a zànhafunɲcɛɛnyi tîrige Misira kìni ɲuŋʼi. 24 Nage mpyi na ɲî na wùruge zànhafunɲcɛɛnyi i, yi mpyi a sà a pi, mà lwɔ́ Misira a pyi kìre ke, yi fiige mpyi saha têlʼa pyi a ɲyɛ mɛ. 25 Zànhafunɲcɛɛnyʼa tîge Misira kìni cyeyi puni i. Yaaga maha yaaga ku mpyi sige e, mà lwɔ́ sùpyire na, mà sà nɔ fo yatɔɔre na ke, zànhafunɲcɛɛnyʼa yire puni bò. Yʼa kɛriyi sùmaŋi puni ná cire puni kyɛɛgɛ kyɛɛgɛ mú. 26 Gozeni kùluni i, *Izirayɛli shiinbii mpyi ke, kuru cyage kanni kʼa kwôro zànhafunɲcɛɛnyi ɲyɛ a nɔ wani mɛ.
27 Ka Farɔn si pi pyi pi a Musa ná *Arɔn yyerʼa pa, maa jwo: «Numɛ u tɔɔge e, mii a li cè na mii u a wurugo. Kafooŋi u ɲyɛ tàngefoo, mii ná na shiinbilʼa wurugo. 28 Yii Kafooŋi ɲáare u u sanmpɛrɛŋi ná zànhafunɲcɛɛnyi yyéreŋɛ. Mii sí yii cye yaha, mii saha sì yii cû n-yaha mɛ. 29 Ka Musa si jwo Farɔn a: «Mii aha fworo kànhe e, mii sí na cyɛge yîrige Kafooŋi a, si u ɲáare. Zànhafunɲcɛɛnyi sí n-yyére, bà mu si mpyi si li cè na ɲìŋke ɲyɛ Kafooŋi wogo mɛ. 30 Ŋka mii a li cè, ali numɛ, mu ná ma kìni yyaha yyére shiinbii sì ɲɛɛ n-fyá Kafooŋi Kile na mɛ.
31 Faayaayi yi mpyi a wyɛ̀rɛ mu à jwo orizhiŋi ná leniŋi ke, yirʼa kɛ̀ɛge, ɲaha na yɛ yi mpyi a fyɛ̀n. 32 Ŋka ɲje yi mpyi a ɲíŋɛ yi shi i mu à jwo furumaŋi ná epotiriŋi ke, yire ɲyɛ a ta a kɛ̀ɛge mɛ. 33 Ɲyɛ ka Musa si yîri Farɔn yyére, maa ŋkàre kànhe kantugo, maa u cyeyi yîrige Kafooŋi a, ka sanmpɛrɛŋi ná zànhafuɲcɛɛnyi ná zànhe si yyére.