Yyefuge baatanrewoge, Kampɛɛnɲyi kani
10
Ɲyɛ ka Kafooŋi Kile si núrʼa jwo *Musa a: «Ta sì Farɔn yyére, mii u a u ná u kìni yyaha yyére shiinbii niŋgyiigii pyi cyi a waha, bà mii si mpyi si na kakyanhala karigii pyi pi shwɔhɔlʼe pi i cyi ɲya mɛ. 2 Mà bâra lire na, nde mii a tɛ̀gɛ *Misira shiinbii na, na kakyanhala karigii cye kurugo ke, bà mu si mpyi si lire jwo ma pyìibii ná ma ɲampyirʼa mɛ. Yii sí li cè na mii u ɲyɛ Kafooŋi.» 3 Ɲyɛ ka Musa ná *Arɔn si ŋkàre Farɔn yyére maa sà yi jwo u a na: «Kafooŋi u ɲyɛ *Eburu shiinbii u Kileŋi ke, urʼa jwo na wuu pa yi jwo mu a, na fo ɲaha tère e mu sí maye tîrige urʼa yɛ? Na ma uru shiinbii cye yaha pi i sà uru pêe. 4 Yi lógʼa tàra dɛ! U a jwo na mu aha ɲcyé si uru shiinbii yaha pi a wà, nùmpanŋa uru sí kampɛɛnɲyi yige n-tɛ̀gɛ mu kìni ɲî. 5 Kampɛɛnɲyi sí ɲìŋke puni pìli n-tò, wà saha sì raa ɲìŋke ɲaa mɛ, Yafaayi yʼa shwɔ zànhafunɲcɛɛnyi kakyaare na ke, kampɛɛnɲyi sí yire kɛ̀ɛge, yi sí cire wyɛɛre puni kyà sige e, 6 yi sí n-jyè si mu bayi ɲî, mà bâra mu kìni yyaha yyére shiinbii ná mu kìni shiinbii sanmpii bayi na. Li sí n-pyi kyaa, mà lwɔ́ mu tulyeyi na mà pa mu tiibii na, mà pa nɔ niɲjaa na, pi sàha ŋkwɔ̀ têlʼa ndemu fiige ɲya mɛ.Ɲyɛ Musa a puru jwo Farɔn a, maa ŋkàre. 7 Ka Farɔn kìni yyaha yyére shiinbii si jwo u a na: «Taha fo ɲaha tère e ŋge nàŋi si n-kwôro raa wuu yyahayi fwɔ́hɔre yɛ? Mu sí mpii shiinbii yaha pi a wà pi i sà Kafooŋi pi Kileŋi pêe mà? Ali numɛ mu sàha ŋkwɔ̀ a cè na là li ɲyɛ na bârali Misira kìni kakyaare na, na wà mà?»
8 Ɲyɛ ka pi i Musa ná Arɔn yyerʼa kàre Farɔn yyére, ka Farɔn si jwo pi a: «Yii a sì, yii i sà yii Kafooŋi, yii Kileŋi pêe. Ŋka yii jo ná jo u sí n-kàre yɛ?» 9 Ka Musa si jwo: «Wuu mú puni, nàɲjiibii ná nàŋkolyeebii ná wuu jyaabii ná wuu pworibii ná wuu mpàabii ná sikyaabii ná wuu nìiyi, ɲaha na yɛ katáan nimbwoo wuu sí n-pyi Kafooŋi mɛge na.» 10 Ka Farɔn si jwo: «Kafooŋi u pyi ná yii e. Safeeo, yii na sɔ̂nŋi na mii sí ɲɛɛ yii ná yii nàŋkopyire yaha yii kàre bɛ? Mii a li cè na funɲcɛnŋɛ ɲyɛ yii a mɛ. 11 Nde yii a jwo ke, li sì n-sìi n-jà n-pyi mɛ! Yii nàmbaabii kanni, yii a sì, yii i sà Kafooŋi pêe. Ɲaha kurugo yɛ yire yii a jwo. Ɲyɛ ka pi i Musa ná Arɔn kɔ̀rʼa lwɔ́ Farɔn taan.
12 Ka Kafooŋi si Musa pyi: «Ma cyɛge yîrige Misira kìni ɲuŋʼi bà kampɛɛnɲyi si mpyi si mpa kìni i mɛ yafaayi ná yaaga maha yaaga kʼa shwɔ zànhafunɲcɛɛnyi kakyaare na ke, yi i yire puni kyà. 13 Ka Musa si u kàbiini yîrige Misira kìni ɲuŋʼi. Ka Kafooŋi si kafɛɛge pyi ku fwuu kìni i na yîri canŋa fworompe e, kuru canŋke ná numpilipuni i. Ɲyɛ̀gʼa ta ku múgo ke, ka pi i kuru kafɛɛge ta kʼa pa ná kampɛɛnɲyi i. 14 Ka kampɛɛnɲyi si fworʼa Misira kìni puni ɲî, maa ntɛ̀ɛn teetee kìni cyeyi puni i, yi ɲyahaŋkanni fiige mpyi na saha ŋkwɔ̀ têlʼa fworʼa ɲya mɛ, yi fiige mú saha sì n-fworo ɲya mɛ. 15 Yi mpyi a ɲìŋke puni pílʼa tò fo ma ɲìŋke pyi numpire fiige. Sùmaŋi ná cisente ti mpyi a shwɔ zànhafunɲcɛɛnyi kakyaare na ke, kampɛɛnɲyʼa yire puni kɛ̀ɛge. Cire ná sùmaŋi puni mpyi wyɛrɛ baa kɛriyi i Misira kìni puni i.
16 Ka Farɔn funvwugo wuŋi si Musa ná Arɔn yyere, maa jwo: Kafooŋi u ɲyɛ yii Kileŋi ke, mii a kapii pyi uru na, maa kapii pyi yii na. 17 Ŋka mii na mu ɲáare maa nde niŋkinŋi yafa na na, maa ma Kafooŋi ɲáare u u ŋke supyiboyyefuge niŋkinŋi láha na na. 18 Ka Musa si yîri Farɔn yyére maa sà Kafooŋi ɲáare. 19 Ɲyɛ ka Kafooŋi si kafebwɔhɔ pyi kʼa fwu a yîri canŋacwumpe e mà pa kanmpɛɛnɲyi puni fwɔ a lwɔ́ a sà ɲcyán Suumpe Lwɔhe Niɲyage e. Ali kampɛɛnŋɛ niŋkin ɲyɛ a kwôro Misira kìni cyage kà tufiige e mɛ. 20 Ka Kafooŋi si núrʼa Farɔn niŋgyiini pyi lʼa waha. Ka u u mpyi u ɲyɛ a ɲɛnʼa *Izirayɛli shiinbii yaha pi a kàre mɛ.
Yyefuge bacyɛɛrewoge, kìni punʼa pyi numpire
21 Ka Kafooŋi Kile si *Musa pyi: «Ma cyɛge yîrige nìɲyiŋi na, bà numpini si mpyi si mpa *Misira kìni i mɛ. Lire numpini mpèeŋi kurugo, sùpya ká u kanŋkuni kûru u sì raa li ɲya mɛ. 22 Ka Musa si u kàbiini yîrige nìɲyiŋi na, ka numpiriŋke si jyè Misira kìni puni i canmpyaa taanre funŋʼi. 23 Cyire canmpyaagii taanreŋi funŋke e, wà mpyi na jìnʼa wà ɲya mɛ, wà ɲyɛ a jà a kò a yîri u tatɛɛnge e mɛ. Ŋka bɛ̀ɛnmpe mpyi Izirayɛli shiinbii cyage e.
24 Ka Farɔn si Musa yyere maa jwo: «Yii a sì, yii i sà Kafooŋi pêe. Ŋka yii niŋkaribii sí yii yatɔɔre yaha naha, yii sí n-jà raa wà ná yii nàŋkopyire e.» 25 Ka Musa si jwo: «Wuu yaha wuu a sì ná wuu yatɔɔre e, wuu u sà sáraya wwû wuu Kafooŋi, wuu Kileŋi a. Wuu sí sà yà pyi sáraga wuu Kafooŋi a, si yà kyà yire e, si yi sanɲyi súugo. 26 Wuu sí n-kàre ná wuu yatɔɔre e, ali niŋkin sì n-kwôro naha wuu kantugo mɛ, ɲaha na yɛ tire tà wuu sí n-pyi sáraga Kafooŋi, wuu Kileŋi a. Ŋka ná wuu ɲyɛ a nɔ wani mɛ, wuu sàha ŋkwɔ̀ a cè yaage wuu sí n-pyi sáraga u a mɛ.» 27 Ka Kafooŋi si Farɔn niŋgyiini pyi lʼa waha, ka u u ɲcyé si pi yaha pi a wà.