Kile a yyefuge kɛwoge kyaa jwo
11
Ka Kafooŋi Kile si *Musa pyi: «Mii sí yyefuge nizanŋke tîrige Farɔn* ná u kìni shiinbii ɲuŋʼi. Lire ká mpyi, u sí yii yaha yii a wà, u bá sí n-sìi yii kɔ̀rɔ n-yige u kìni i feefee. 2 Yi jwo *Izirayɛli shiinbilʼa na nàmbaabii puni ná cyeebii puni pi wyɛ́rɛfyinŋi yaayi ná sɛɛnŋi wuyi ɲáare pi tɛɛnɲɛɛbilʼa.»3 Kafooŋi mpyi a funɲcɛnŋɛ kan *Misira shiinbilʼa Izirayɛli shiinbii kàmpanŋke na. Misira kìni yyaha yyére shiinbii, ná kìni shiinbii sanmpii mpyi na Musa pêre.
4 Ka Musa si Farɔn pyi: «Kafooŋi a jwo na numpililyage e uru sí Misira kìni ɲaare. 5 Na pyìcyiibii puni sí n-kwû Misira kìni i, ali saanŋi Farɔn ná u *saanre mú i, u jyaŋi niɲcyiiŋi sí n-kwû, bilicwoŋi u ɲyɛ na sùmaŋi tirili ke, uru pyicyiiŋi sí n-kwû, fo mà sà nɔ yatɔɔre pyìcyiibii na. 6 Kwuuyo niɲyahaya sí n-wà Misira kìni puni i, ɲjemu yi ɲyɛ yi fiige saha ntêlʼa wà a ɲyɛ mɛ. Yi fiige mú saha sì n-wà ɲyɛ mɛ. 7 Ŋka Izirayɛli shiinbii kàmpanŋke na, ali pwunŋi sì n-jwo sùpya na, lire ɲyɛ mɛ yatɔɔgɔ na mɛ. Lire e yii sí li cè na Izirayɛli shiinbii ná Misira shiinbii ɲyɛ niŋkin Kafooŋi a mɛ. 8 Lire ká mpyi, mu kìni yyaha yyére shiinbii puni sí n-pa niŋkure sín mii a, si jwo “Fworo wuu kìni i, mu ná ma shiinbii.” Lire ɲwɔhɔ na mii sí n-ta n-fworo ná na shiinbilʼe.» Musa a kwɔ̀ puru jwumpe na ke, ka u nàvunŋke wuŋi si yîri Farɔn taan.
9 Ɲyɛ Kafooŋi mpyi a yi jwo Musa a na Farɔn sì ɲɛɛ u jwumpe lógo mɛ, bà uru si mpyi si kakyanhala karigii niɲyahagii pyi Misira kìni i mɛ. 10 Ɲyɛ puru jwumpe jwuŋkwooni kantugo, Musa ná *Arɔn a cyire kakyanhala karigii puni pyi a cyêe Farɔn na, ka Kafooŋi si Farɔn niŋgyiini waha, u ɲyɛ a ɲɛnʼa Izirayɛli shiinbii yaha pi a fworo u kìni i mɛ.