Bilere ŋkwɔ̀ŋi katáanni kani
12
Mà *Musa ná *Arɔn yaha *Misira kìni i, Kafooŋi Kile a jwo pi a na 2: «Ŋke yiŋke ku sí n-pyi yyeeni tasìige, si mpyi yyeeni yiɲcyiige yii a. 3 Yii sà yi jwo *Izirayɛli shiinbilʼa na ŋke yiŋke canmpyikɛ wuuni ká nɔ, pyɛnyi feebii puni niŋkin niŋkinŋi pi mpàa niŋkin niŋkin cû, pyɛngɛ maha pyɛngɛ ná ku mɛge mpà. 4 Pyɛnge ŋkemu sùpyii pi a cyɛ́rɛ na pi sì n-jà n-kwɔ̀ mpà nimpuŋɔ na mɛ, pire na pi byanhama tɛɛnɲɛɛbilʼa yaa pi wwɔ̀ mpà na, pi i tire kyaare tɛ̀gɛ pi tàanna ná sùpyire dáŋi i, pi shin maha shin sí n-jà n-kwɔ̀ ntemu na ke. 5 U a yaa u pyi yyee niŋkin mpàpoo, lire ɲyɛ mɛ yyee niŋkin sikapere, cwocyaga ɲyɛ a yaa ku pyi tire yatɔɔre na mɛ. 6 Yii u cû yii i u mâra fo yiŋke canmpyikɛ ná sicyɛrɛwuuni na. Kuru canŋke yàkoŋke Izirayɛli shiinbii puni sí tire yatɔɔre bò. 7 Bayi i yii sí tire kyaare kyà ke, yii kuru sìshange kà ɲaraga ɲaraga yire bayi ɲwɔyi ná yi ɲwɔparacinŋkii na. 8 Kuru canŋke numpilage e, yii i tire kyaare fwɔ̀ nage na, yii kyà ná bwúuruŋi niɲjirigembaaŋi ná yafwɔhɔfwɔhɔyi nizoroyi i. 9 Yii àha ti nimpurure kyà, lire ɲyɛ mɛ si ti kà ŋgwû si ti kyà mɛ. Yii yatɔɔge nimpunŋke fwɔ̀ ná ku ɲùŋke ná ku tooyi ná ku funŋɔyaayi i. 10 Tire kyaare paanga ɲyɛ a yaa ku shwɔ̀n mɛ. Tà ha ŋkwôro, yii i tire súu. 11 Yii aha a sí raa ti kyàa, yii i yii vàanntinɲyi le, yii i seepwɔyi tɛ̀gʼa yiye bîni, yii i yii tanhaɲyi le, yii i yii kàbigigii cû yiye cye e, yii i ti kyà fwɔfwɔ. Lire li sí n-pyi yii bilereŋkwoŋi katáanni*, yii lire pyi yii Kafooŋi pêe. 12 Niɲjaa numpilage yabiliŋi i, mii sí Misira kìni ɲaara, si li pyìcyiibii puni bò, mà lwɔ́ sùpyire na, mà sà nɔ fo yatɔɔre na. Mii sí li cyêe na Misira shiinbii yasunɲyi ɲyɛ fànha baa, ɲaha na yɛ mii u ɲyɛ Kafooŋi. 13 Pyɛnyi i yii sí n-pyi ke, sìshange ku sí n-pyi yire pyɛnyi ɲwɔyi na ke, kuru ku sí n-pyi tafyeŋi. Mii aha kuru sìshange ɲya, mii sí n-tòro yire pyɛnyi taan. Lire pyiŋkanni na, mii aha mpaa Misira shiinbii bùu tèni ndemu i ke, yii sí n-shwɔ tire kakyaare na.14 Nde canmbilini sí n-pyi yii a canmbile, ndemu li sí raa yii funŋɔ cwo tèrigii puni i ke. Yii sí raa katáan nimbwoo pyi lire canmbilini i Kafooŋi mɛgɛ na, lire sí n-pyi lyeɲwɔyi punʼa kalyee.
Bwúru niɲjirigembaaŋi katáanni
15 Yii sí bwúuruŋi niɲjirigembaaŋi lyî canmpyaa baashuunni funŋʼi. Canɲcyiige yabiliŋi i, yii sí bwúuruŋi yîrigeyirige yaani yige yii bayi i, yîrigeyirige yaanʼa le bwúuruŋi ŋgemu i ke, wà ha uru wà lyî cyire canmpyaagii baashuunniŋi i, urufoo sí n-kɔ̀rɔ n-yige *Izirayɛli shiinbii shwɔhɔlʼe. 16 Canmpyicyiini ná canmpyibaashɔnwuuni i yii mpìni pyi Kile mɛge na. Yii àha báaraŋi wà tufiige pyi cyire canmpyaagii shuunniŋi i mɛ. Yii kɔni sí n-jà yii ɲjyìŋi shwɔhɔ. 17 Yii a *bwúuruŋi niɲjirigembaaŋi katáanni pyi yyee maha yyee, ɲaha na yɛ lire canmbilini yabiliŋi i mii a yii yige *Misira kìni i kuruyɔ kuruyɔ kàshikwɔɔn fiige. Lyeɲwɔyi punʼa yaa yi yákili yaha nde kalyeeni na. 18 Yyeeni yiɲcyiige canmpyikɛ ná sicyɛrɛwuuni yàkoŋke, yii a yaa yii bwúuruŋi niɲjirigembaaŋi ɲjyìŋi sìi fo yii sà nɔ ku canmpyibeɲjaaga ná niŋkinwuuni yàkoŋke na. 19 Cyire canmpyaagii baashuunniŋi funŋʼi, bwúuruŋi yîrigeyirige yaani ɲyɛ a yaa li ɲya yii wà tufiige bage e mɛ. Nàmpɔnŋɔ bâra ŋkusi na, shin maha shin u a bwúuruŋi niɲjîrigeŋi wà lyî cyire canmpyaagilʼe ke, urufoo sí n-kɔ̀rɔ n-yige Izirayɛli shiinbii kuruŋke shwɔhɔlʼe. 20 Bwúru maha bwúuru u a yaa ná yîrigeyirige yaani i ke, yii àha uru lyî mɛ. Cyage maha cyage e yii ɲyɛ ke, bwúuruŋi niɲjirigembaaŋi yii a yaa yii a lyî.»
Bilere ŋkwɔ̀ŋi katáanni mbegeleŋi kani
21 Ka *Musa si *Izirayɛli shiinbii kacwɔnribii yyere maa jwo: «Yii a sì, yii shin maha shin u sà mpàpoo, lire ɲyɛ mɛ sikapere cû u bò *bilereŋkwoŋi katáanni na. 22 Yii aha yatɔɔge kɔɔn, yii i yaage kà tɛ̀gʼa ku sìshange shwɔ, yii *izope cige wyɛɛre mbyigimʼa wwû kuru sìshange e, yii ɲaraga ɲaraga yii bayi ɲwɔpara cire ná ɲwɔyi ŋkeriŋkii na. Fo mà sà ɲyɛ̀ge múgo, yii wà tufiige kà zìi vworo ntaani na mɛ. 23 Kafooŋi ká mpa kìni ɲaara si kakyaare pyi *Misira shiinbilʼa tèni ndemu i ke, u aha sìshange ɲya bage ŋkemu ɲwɔpara cire ná ɲwɔge ŋkereŋkii na ke, u sí n-tòro kuru taan. Mɛlɛkɛŋi u maha kakyaare pyi ke, Kafooŋi sì ɲɛɛ uru yaha u jyè yii pyɛnyi i si kakyaare pyi mɛ. 24 Nde sí n-pyi kalyee yii ná yii pyìibilʼa fo tèekwòmbaa. 25 Kìni ɲwɔmɛɛni Kafooŋi a lwɔ́ yii a ke, yii aha nɔ lire kìni i tèni ndemu i ke, yirʼa ŋge ladaŋi tùuli.
26 Yii pyìibii ká yii yíbe uru ladaŋi ɲùŋke na, 27 yii i pi pyi “Bilereŋkwoŋi sárage ki. Wuu maha nde pyi maa wuu Kafooŋi pêre, ɲaha na yɛ mà wuu yaha Misira kìni i, tèni i Kafooŋi a kìni ɲaara maa kakyaare pyi ke, u a tòro wuu pyɛnyi taan. Lire pyiŋkanni na, wuu pyɛnyʼa shwɔ tire kakyaare na.”»
Ɲyɛ Musa puru jwo ke, ka pi puni sí niŋkure sín maa Kile pêe.
28 Lire kantugo ka Izirayɛli shiinbii puni si ŋkàre pi pyɛnyi i. Yaaga maha yaaga Kafooŋi mpyi a pyi Musa ná *Arɔn u jwo pi a ke, ka pi i yire puni pyi.
Yyefuge kɛ woge: pyìcyiibii kwùŋi
29 Ɲyɛ ɲìŋkʼa pa ɲî ke, ka Kafooŋi Kile si *Misira kìni pyìcyiibii puni bò, saanŋi Farɔn u mpyi kìni ɲùŋɔ na ke, mà lwɔ́ uru pyìcyiiŋia na mà pa kàsujyiibii pyìcyiibii na, fo mà sà nɔ yatɔɔre pyìcyiibii puni na. 30 Lirʼa pyi ke, ka Farɔn ná u kìni yyaha yyére shiinbii ná kìni shiinbii sanmpii si yîri kuru numpilage e maa kwuuyi tɛ̀gʼa Misira kìni puni shwɔ a ta, ɲaha na yɛ pyɛnge niŋkin mpyi a kwôro bu baa mɛ.
31 Kuru numpilage ninuge e, ka Farɔn si *Musa ná *Arɔn yyere maa pi pyi: «Yii fworo na kìni i, yii ná *Izirayɛli shiinbii sanmpii puni, yii a sì yii i sà Kafooŋi pêe, bà yii a li cya mii a mɛ. 32 Yii a wà ná yii yatɔɔre puni i, mu à jwo bà yii a yi jwo mɛ. Yii i li cya Kile a u u jwó le? na na.»
33 Misira shiinbii mpyi a li wyɛrɛŋɛ Izirayɛli shiinbii ɲwɔhʼi na pi fworo fwɔfwɔ kìni i, ɲaha na yɛ pi mpyi na sɔ̂nŋi na pire puni sí n-kwû. 34 Ka Izirayɛli shiinbii si pi farani mbyìmpe niɲcwɔhɔmpe niɲjirigembaampe lwɔ́ a kàre, yaayi i pi mpyi maha pu cwɔ̀nre ke, maa yire le a pwɔ vàanɲyi i mà taha fukanyi na mà kàre.
35 Nde Musa mpyi a jwo Izirayɛli shiinbilʼa ke, pi a lire pyi, maa Misira shiinbii sɛɛnŋi yaayi yà ná wyɛ́rɛfyinŋi wuyi yà ná vàanɲyi yà ɲáare pi a. 36 Ka Kafooŋi si funɲcɛnnɛ kan Misira shiinbilʼa Izirayɛli shiinbii kàmpanŋke na. Yaaga maha yaaga Izirayɛli shiinbilʼa ɲáare pi a ke, ka pi i yire puni kan pi a. Lire pyiŋkanni na, Izirayɛli shiinbilʼa kàre ná Misira shiinbii cyeyaayi i, maa pi cyeŋgaya wuubii yaha.
Izirayɛli shiinbilʼa fworo Misira kìni i
37 Ɲyɛ ka *Izirayɛli shiinbii si yîri Aramusɛsi kànhʼe, mà kàre Sikɔti kànhʼe. Nàmbaabii mpyi a shiin kampwɔhii ŋkwuu baani (600.000) kwɔ̀, cyeebii ná nàŋkopyire ɲyɛ a tɔ̀rɔ mɛ.
38 Sùpyire tabɛrɛ mpyi a taha pi fye e mà kàre. Pi yatɔɔre mpyi a ɲyaha. 39 *Misira shiinbii mpyi a li wyɛ̀rɛŋɛ Izirayɛli shiinbii ɲwɔhʼi, na pi fworo kìni i. Lirʼa pi pyi pi ɲyɛ a jà a pi kuni ɲjyìŋi bégele mɛ. Farani mbyìmɛ niɲcwɔnhɔmɔ niɲjirigembaama kanna pu mpyi pi a, ka pi i puru fwɔ̀ mà pyi bwúuru paampaya mà lyî.
40 Yyee ŋkwuu sicyɛɛre ná yyee beɲjaaga ná kɛ (430), Izirayɛli shiinbii mpyi a pyi Misira kìni i. 41 Canŋke cyire yyeegilʼa fûnŋɔ yyee ŋkwuu sicyɛɛre ná yyee beɲjaaga ná kɛ (430) ke, kuru canŋke yabiliŋi Kafooŋi Kile a Izirayɛli shiinbii yalʼa taanna kuruyɔ kuruyɔ kàshikwɔɔn fiige maa pi yige Misira kìni i. 42 Bà Kafooŋi a shwɔ̀n ɲyii na si u shiinbii, Izirayɛli shiinbii yige Misira kìni i mɛ, amuni lire canmbilinʼa yaa li pyi Izirayɛli shiinbii lyeɲwɔyi punʼa canmbile, ndemu i pi a yaa pi a shwùun ɲyii na ke, lʼa yaa li pyi pi a canntanga, ŋkemu i pi sí raa Kafooŋi pêre ke.
Bilere ŋkwɔ̀ŋi katáanni ɲjyìŋi lyìŋkanni
43 *Ka Kafooŋi Kile si núrʼa jwo *Musa ná Arɔn a: «Nde lʼa yyaha tíi ná bilereŋkwoŋi katáanni ɲjyìŋi i ke, lire li ɲyɛ: nàmpɔnŋɔ ɲyɛ a yaa u li ɲjyìŋi lyî mɛ. 44 Biliwe maha biliwe yii a shwɔ wyɛ́rɛ na ke, urʼa yaa u *kwɔ̀n, lire ká mpyi, u sí n-jà katáanni ɲjyìŋi lyî. 45 Nàmpɔnŋi u sí tère pyi si ntòro ke, ná báarapyiŋi u ɲyɛ na báaraŋi pyi sàraŋi na ke, pire nàzhan ɲyɛ li ɲjyìŋi i mɛ. 46 Bayi funɲyi i yii a yaa yii u lyî. Kyaare tà ɲyɛ a yaa ti fworo ntaani na mɛ. Yii àha kaciige kà yaha ku kebe mú mɛ. 47 *Izirayɛli shiinbii kuruŋke punʼa yaa kʼa bilereŋkwoŋi katáanni pyi. 48 Yii nàmpunntɛɛnŋi wà la ká mpyi si bilereŋkwoŋi katáanni pyi si pèenɛ taha Kafooŋi na, nɔ maha nɔ u ɲyɛ urufoo pyɛnge e ke, urʼa yaa u kwɔ̀n fɔlɔ, lire ká mpyi u sí n-jà katáanni pyi. Nɔ̀ maha nɔ̀ u ɲyɛ u ɲyɛ a kwɔ̀n mɛ, urufoo sì n-jà katáanni ɲjyìŋi lyî mɛ. 49 Yii Izirayɛli shiinbii bâra nàmpwuunbii pi ɲyɛ yii shwɔhɔlʼe ke, ŋge *saliyaŋi ninuŋi u si raa fî yii puni ɲuŋʼi.»