Bwuruŋi niɲjirigembaaŋi katáanni ná pyìcyiibii kani
13
Ka Kafooŋi Kile si *Musa pyi 2: «*Izirayɛli shiinbii pyìcyiibii puni bégelʼa yaha mii mɛɛ na. Mà lwɔ́ sùpyire na mà sà nɔ yatɔɔre na, yire pyìcyiibii puni na ɲyɛ mii wuyo.»3 Ka Musa si Izirayɛli shiinbii pyi: «Canmbilini i yii a fworo bilere e *Misira kìni i ke, yii lire yaha yiye funŋʼi, ɲaha na yɛ u cyɛge fànha ɲyahaga woge cye kurugo Kafooŋi a yii yige wani. Lire e yîrigeyirige yaanʼa le bwúuruŋi ŋgemu i ke, yii ɲyɛ a yaa yii a uru lyî kuru canŋke mɛ. 4 Niɲjaa Abibu*a yiŋke e, yii ɲyɛ na fwore Misira kìni i.
5 Kafooŋi a kâa yii tulyeyʼa na uru sí *Kanana shiinbii ná Hɛti shiinbii ná Amɔri shiinbii ná Evi shiinbii ná Yebusi shiinbii kìni kan yii a. Lire kìnʼa ɲî na fwu nùjirimpe ná sɛɛre na. U aha yii lèŋɛ lire kìni i tèni ndemu i ke, yyee maha yyee ŋke yiŋke ká nɔ, yii i *bilereŋkwoŋi katáanni pyi yii tɛ̀gʼa u pêe. 6 Yii a bwúuruŋi niɲjirigembaaŋi lyî canmpyaa baashuunni funŋʼi, canmpyibaashɔnwuuni i, yii i katáan pyi yii tɛ̀gʼa Kafooŋi pêe. 7 Cyire canmpyaagii baashuunniŋi funŋke e, yii àha bwúuruŋi niɲjîrigeŋi lyî mɛ. Bwuruŋi niɲjîrigeŋi bâra u yîrigeyirige yaani na, kuru kà ɲyɛ a yaa ku ɲya yii wà yyére kìni puni i mɛ.
8 Lire katáanni tooyʼe, yii i yi jwo yii pyìibilʼa na: Kafooŋi a ndemu pyi yii a, yii nivworobii na Misira kìni i ke, na yii na nde pyi si yiye funŋɔ cwo lire na. 9 Lire katáanni sí n-pyi yii a fuɲcwuugo kyaa, sí n-pyi mu à jwo tàafye yii cyeyi ná yii byahigii na, bà Kafooŋi *saliyaŋi kani si mpyi si ŋkwôro yii ɲwɔyi i mɛ, ɲaha na yɛ uru u a yii yige Misira kìni i ná u fànhe e. 10 Yii sí raa nde pyi yyee maha yyee, li tèepyiini ninuuni i.
11 Bà Kafooŋi a kâa yii ná yii tulyeyʼa na uru sí Kana kìni kan yii a mɛ, u aha yii pyi yii a jyè lʼe, ka li i mpyi yii wuu tèni ndemu i ke, 12 yii i yii pùnampyicyiire puni kan u a, ali yii yatɔɔre pyìcyiibilʼe, pire nàmbaabii puni sí n-pyi u wuu. 13 Nde li ɲyɛ dùfaanyi kàmpanŋke ke, yii sí mpàabili tɛ̀gɛ yire pyìcyiibii puni niŋkin niŋkinŋi ɲùŋɔ wwû Yii aha mpyi yii ɲyɛ a lire pyi mɛ, yii i li bwɔ̀n kaɲyɛge e, yii bò. Pùnampyicyiire ti ɲyɛ yii pyìibilʼe ke, yii tire puni ɲùɲyi wwû mú.b
14 Yii jyaabii ká mpa yii yíbe canŋka na “Ɲaha na yii ɲyɛ na nde pyi yɛ?” yii pi pyi “Wuu na nde pyi, ɲaha na yɛ Misira kìni i wuu mpyi bilere e ke, Kafooŋi a wuu yige lire e ná u fànhe e. 15 Farɔn mpyi a sà a ɲɛɛ, si wuu cye yaha mɛ, lire e Kafooŋi a Misira kìni pyìcyiibii puni bò, mà lwɔ́ sùpyiibii pyìcyiibii na, mà sà nɔ yatɔɔre pyìcyiibii na. Lire kurugo yatɔɔre pyìcyiibii pi a pyi nàmbaa ke, wuu maha pire pyi sáraga Kafooŋi a maha ntɛ̀gʼa wuu pyìcyiibii puni ɲùŋɔ wwû.” 16 Nde kani sí n-pyi mu à jwo tàafye yii cyeyi, lire ɲyɛ mɛ yii byahigii na sʼa yii funŋɔ cwo na Kafooŋi a wuu yige Misira kìni i ná u fànhe e.»
Kile a Izirayɛli shiinbii yyaha cû a yige Misira kìni i
17 Ɲyɛ tèni i Farɔn a pa *Izirayɛli shiinbii cye yaha ke, ali mà li ta Filisiti kìni kuni li mpyi a byanhara, Kafooŋi Kile ɲyɛ a pi yaha pi a tòro wani mɛ, ɲaha na yɛ u mpyi a li ɲya na pi aha lire kuni lwɔ́ na ŋkɛ̀ɛge, mà sà kàshige ta piye yyaha na, pi fyagarawuubii yákilibii sí pi kɛ̂ɛnŋɛ, pi núrʼa kàre *Misira kìni i. 18 Lire e ka u u pi pyi pi a mâhana a tòro síwage kuni i mà kàre Suumpe Lwɔhe Niɲyage kàmpanŋke na. Pi nivworobii na, pi mpyi a piye bégele sèlʼe ná kàshikwɔnyaayi i.
19 *Musa niŋkariŋʼa kàre ná Yusufu kaciiyi i, ɲaha na yɛ mà jwo Yusufu u kwû ke, u mpyi a Izirayɛli shiinbii pyi pi a kâa u a. U mpyi a jwo: «Nàkaana baa Kile sí n-pa yii yige nde kìni i. Mii kwuŋkwooni kantugo, yii aha ŋkɛ̀ɛge yii raa wà ná na kaciiyi i.»
20 Ɲyɛ ka Izirayɛli shiinbii si yîri Sikɔti kànhʼe, maa ŋkàrʼa sà pi vàanŋke bayi kwòro Etan kànhʼe, síwage ŋkere na. 21 Ɲyɛ canŋke e Kafooŋi mpyi maha pi yyaha cû ɲyahantɔɔngɔ niɲjyérege ku ɲyahanke mpyi maha ntîge fo ɲìŋke na, maa pi kɛ̂ɛnŋi na wà. Numpilage e, u mpyi maha pi yyaha cû ná nage bɛ̀ɛnge e, maa kuni cyêre pi na na wà, bà pi si mpyi sʼa ɲaare pìlaga bâra canŋa na sʼa wà mɛ. 22 Ɲahamɛɛni mpyi maha mpyi pi yyaha na canmpuni, nage bɛ̀ɛnge sí ɲyɛ pi yyaha na numpilipuni.