Farɔn a Izirayɛli shiinbii fyè tɔ̀rɔ
14
Ka Kafooŋi Kile si *Musa pyi 2: «Yi jwo *Izirayɛli shiinbilʼa na pi núru pi i sà ntɛ̀ɛn Piyarɔti ŋkere na, Migidɔli ná suumpe lwɔhe shwɔhɔlʼe, Balitisefɔni yyetiimpe na. Na pi i pi vàanŋke bayi kwòro kwòro wani suumpe lwɔhe taan. 3 Farɔn* sí raa sɔ̂nŋi na yii a pînni síwage funŋke e, maa mpyi tashagabaa kàsujyii fiige. 4 Mii sí u niŋgyiini pyi li waha, fo u yîri u a yii fyè tɔ̀re. Mii sí na fànhe cyêe u ná u kàshicyɛge na, si pi shi bò. Lire e *Misira shiinbii sí li cè na mii u ɲyɛ Kafooŋi.»Ɲyɛ nde lʼa jwo ke, ka Izirayɛli shiinbii si lire pyi.
5 Ɲyɛ tèni i yʼa jwo Misira saanŋʼa na Izirayɛli shiinbilʼa fê ke, ka u ná u kìni yyaha yyére shiinbii yákilibii si ŋkɛ̂ɛnŋɛ Izirayɛli shiinbii kàmpanŋke na, fo pi a jwo: «Ɲaha kʼa sà a pa ná lʼe ka wuu u Izirayɛli shiinbii yaha pi a kàre yɛ? Wuu mpyi a yaa wuu pi cû a yaha naha pirʼa báaraŋi pyi.» 6 Ka Farɔn si u wòtoroŋi pwɔ, maa u kàshicyɛge yîrige, ka pi i jyè Izirayɛli shiinbii fye e na ŋkòre. 7 U mpyi a kàre ná Misira kìni shɔnyi wòtorobii puni i, pire wòtorobilʼe ŋkwuu baani (600) pi mpyi ná kàshikwɔɔnbii niɲcɛnmpilʼe, kàshikwɔɔnbii shiin taanre taanre mpyi pire wòtorobii puni niŋkin niŋkinŋi i.
8 Kafooŋi mpyi a Misira saanŋi Farɔn niŋgyiini pyi lʼa waha, lire kurugo u mpyi a yîri na Izirayɛli shiinbii fyè tɔ̀re, mà li ta Izirayɛli shiinbii ɲùɲjiriwuubii mpyi a fworo bilere e Misira kìni i mà kwɔ̀. 9 Ka Misira shiinbii kàshikwɔɔnbii si wá na pi fyè tɔ̀re ná pi shwɔnfeempii ná pi shɔnyi wòtorobilʼe. Pi a pi fye e tɔ̀rɔ fo mà sà pi ta pi a pi vàanŋke bayi kwòro suumpe lwɔhe ŋkere na Piyarɔti kàmpanŋke na, Balitisefɔni yyetiimpe na.
10 Tèni i Izirayɛli shiinbilʼa pa wílʼa Farɔn ná u shiinbii ɲyɛ pi i pire fyè tɔ̀re fo mà byanhara pire na ke, ka pi i fyá sèlʼe maa Kafooŋi mɛge yîri fànha na. 11 Pi mpyi na Musa pyi: «Taha wuu tatòŋɔ mpyi na sí nta Misira kìni i ka mu u wuu lwɔ́ si mpa ŋkan pi bò naha síwage e mɛ. Ɲaha kafiile mu a pyi amɛ maa wuu lwɔ́ a yige Misira kìni i yɛ? 12 Mà wuu yaha Misira kìni i, wuu mpyi a wyɛ̀rʼa yi jwo mu a, na ma wuu yaha yyeɲiŋʼi, wuu raa báare Misira shiinbilʼa, kuru ɲwɔge mpyi a táan wuu na mà tòro mu u mpa wuu kan pi bò naha síwage e.» 13 Ka Musa si Izirayɛli shiinbii pyi: «Yii àha raa fyáge mɛ, yii tɛ̀ɛn tanuge e, pyiŋkanni na Kafooŋi sí yii shwɔ niɲjaa ke, yii sí lire ɲya. Yii li cè na Misira shiinbii pi mpii yii i ɲaa amɛ ke, mà láha niɲjaa na yii saha sì n-sìi pi wà ɲya mɛ. 14 Kafooŋi sí pi tùn yii cyaga, yii yákilibii tìŋɛ yii i ntɛ̀ɛn tanuge e.»
Izirayɛli shiinbii shwɔŋkanni
15 Ka Kafooŋi si *Musa pyi: «Ɲaha na mu ɲyɛ na mii yiri na mii u yii tɛ̀gɛ yɛ? Yi jwo Izirayɛli shiinbilʼa na pi kuni lwɔ́ pi a wà. 16 Mu wi ke, ma kàbiini lwɔ́ maa li yîrige suumpe lwɔhe ɲuŋʼi, ku sí n-láha kuye na, *Izirayɛli shiinbii si ɲaara ntòro kuru tawage e. 17 Mii sí wi ke, mii sí *Misira shiinbii niŋgyiigii pyi cyi waha bà pi si mpyi si jyè yii fye e mɛ. Lire ká mpyi, mii sí Farɔn ná u kàshicyɛge ná u shɔnyi wòtorobii ná u shwɔnfeempii puni shi tò, si na mɛge pêe. 18 Mii aha lire pyi mà tɛ̀gʼa na mɛge pêe tèni ndemu i ke, Misira shiinbii sí li cè na mii u ɲyɛ Kafooŋi.
19 Kile Mɛlɛkɛŋi u mpyi maha mpyi Izirayɛli shiinbii yyaha na ke, ka uru si ntòro pi kantugo. Ɲyahaŋke ku mpyi maha mpyi pi yyaha na ke, ka kuru mú si ŋkɛ̂ɛnŋɛ pi kantugo. 20 Maa jyè Misira shiinbii ná Izirayɛli shiinbii shwɔhɔlʼe. Ku mpyi a pyi numpire Misira shiinbilʼa, maa bɛ̀ɛnmpe yige Izirayɛli shiinbilʼa numpilage e. Ka pi i kuru numpilage puni pyi, pi ɲyɛ a jà a bâra piye na mɛ.
21 Ɲyɛ ka Musa si u cyɛge yîrige suumpe lwɔhe ɲuŋʼi, ka Kafooŋi si kafeebwɔhɔ pyi ku u fwu na yîri canŋa fyinmpe e numpilipuni, maa suumpe lwɔhe ŋɔɔŋi, fo mà sà ku pyi kʼa láha kuye na, maa tawaga yaha kuye shwɔhɔlʼe. 22 Ka Izirayɛli shiinbii si jyè a ɲaarʼa fworo ɲìŋke niŋgage ɲuŋʼi. Lwɔhe mpyi a sûlʼa yyére mu à jwo kàsooyo pi kàniŋɛ cyɛge ná kàmɛnɛ cyɛge na. 23 Ka Misira shiinbii mú si jyè pi fye e. Farɔn shɔnyi ná u wòtorobii ná u shwɔnfeempii puni mpyi a jyè pi fye e na ŋkɛ̀ɛge. 24 Ɲyɛmugu ɲwɔge laage e, ka Kafooŋi si ntɛ̀ɛn ɲyahaŋke nawoge e, maa Misira shiinbii kàshicyɛge wíi, maa pi ɲani wùrugo. 25 Maa pi wòtorobii kàŋkarigii kɛ̀ɛge, mà pi pyi pi saha ɲyɛ a jà na ŋkɛ̀ɛge fwɔfwɔ mɛ. Lirʼa pyi ke, ka Misira shiinbii si jwo: «Kafooŋi naha na wuu tùnni si ŋkan pi a! Yii a wà wuu núru Izirayɛli shiinbii fye e wuu raa wuye caa!» 26 Ka Kafooŋi si Musa pyi: «Ma cyɛge yîrige suumpe lwɔhe ɲuŋʼi ku u mpa Misira shiinbii ná pi wòtorobii ná pi shwɔnfeempii lwɔ́.» 27 Ka Musa si u cyɛge yîrige suumpe lwɔhe ɲuŋʼi, ɲyɛmugu ɲwɔge laage e, ka lwɔhe si núru ku lyempe e. Misira shiinbii la mpyi si fê zhwɔ ku na, ka Kafooŋi si lwɔhe kebʼa tîrige pi ɲuŋʼi.
28 Farɔn ná u wòtorobii ná u shwɔnfeempii ná u kàshicyɛge ku mpyi a jyè Izirayɛli shiinbii fye e ke, lwɔhʼa pire puni lyî, ali shin niŋkin ɲyɛ a shwɔ mɛ. 29 Ŋka Izirayɛli shiinbii pi ke, mà suumpe lwɔhe yaha kʼa sûlʼa yyére kàsooyi fiige pi kàniŋɛ cyɛge ná pi kàmɛnɛ cyɛge na, pirʼa ɲaara ɲìŋke niŋgage na mà jyiile.
30 Kuru canŋke Kafooŋi a Izirayɛli shiinbii shwɔ Misira shiinbii na. Izirayɛli shiinbilʼa Misira shiinbii niŋkwûubii ɲya suumpe lwɔhe kʼa pi fwɔ a yaha kunmpoge na. 31 Kafooŋi a u cyɛge fànhe cyêe maa Misira shiinbii shi tò pyiŋkanni ndemu na ke, lire mpyi a Izirayɛli shiinbii pyi pi i fyáge u na, maa dá u na, maa dá u báarapyiŋi Musa na.