Izirayɛli shiinbilʼa mɛɛ cêe Kile a
15
Ɲyɛ ka *Musa ná *Izirayɛli shiinbii sanmpii si nde mɛɛni cêe Kafooŋi Kile a. Pi a jwo:«Mii sí mɛɛ cêe Kafooŋi a, ɲaha na yɛ u a u fànhe cyêe,
U a shɔnge ná ku fooŋi wà suumpe lwɔhe e.
2 Kafooŋi u maha fànha kaan mii a, urʼa mii ɲyɛ na na myahigii cêe,
uru u a mii shwɔ.
Uru u ɲyɛ mii u Kileŋi, mii sí u kêe.
Uru u ɲyɛ mii tuŋi u Kileŋi, mii sí u pêe.
3 Kafooŋi na ɲyɛ kàshikwɔnpege.
Kafooŋi u ɲyɛ u mɛge.
4 U a suumpe lwɔhe pyi kʼa Farɔn ná u shɔnyi wòtorobii ná u kàshicyɛge lwɔ́,
Suumpe Lwɔhe Niɲyagʼa u kàshikwɔɔnmpiyi lyî.
5 Lwɔhʼa pi ɲùŋɔ jò,
Pi a tîge lwɔhe ɲwɔhʼi kafaaga fiige.
6 Ei! Kafooŋi! Mu kàniŋɛ cyɛgʼa ku fànhe cyêe,
Ei! Kafooŋi! Mu kàniŋɛ cyɛgʼa zàmpɛnŋi cwɔhɔnɔ.
7 Mu na ɲyɛ fànhafembwɔhɔ,
Mu maha ma zàmpɛɛnbii lwúu na ɲcyáan,
Mu lùuni ká yîrʼa ta, li maha pi súugo
Mu a jwo na kʼa ɲyɛsigire súugo.
8 Mu múnawyiigii kafɛɛgʼa lwɔhe pyi
Kʼa wà kuye na ŋkunuŋɔ fiige,
Suumpe lwɔhe ku maha fuuli na yîri ke,
Kurʼa faanra kuye na mu à jwo kàsooyo,
Ka suumpe lwɔhe si ŋɔ́ɔ mà pyi kafaayi fiige ku niŋke e.
9 Wuu zàmpɛɛnbii mpyi na ŋko:
“Wuu sí pi fyèŋi tɔ̀rɔ fo si zà nɔ pi na,
Wuu sí pi cyeyaayi cyán zhwɔ pi na,
si yi táa táa wuye na.
Pi cyeyaayi sí wuu funɲyi ɲíŋɛ,
Wuu sí wuu kàshikwɔnɲwɔɔyi wwû pi mɛɛ na,
Si pi shi bò.”
10 Ŋka Kafooŋi, mu a ma ɲwɔge kafɛɛge fwɔ kanna suumpe lwɔhe na,
Ka suumpe lwɔhe si pi ɲùŋɔ jò.
Pi a tîge lwɔhe ɲwɔhʼi mu à jwo tɔɔnmpirige,
Yasunŋke ŋkire kʼa fíniŋɛ maa fûnŋɔ mu fiige yɛ?
Ŋki kʼa yaa ná pèente e mu kantugo yɛ?
Ŋki ku maha kakyanhala karigii pyi mu fiige yɛ?
12 Mu a ma kàniŋɛ cyɛge yîrige kanna,
Ka ɲìŋke si múgo, maa wuu kɔrɔfeebii lyî.
13 Mu kacɛnŋkii tɛgɛlabaawogogii kurugo,
Mu shiinbii ɲùŋɔ mu a wwû ke, mu a pire yyaha cû.
Mu fànhe cye kurugo, cyage nisìnaŋke e mu ɲyɛ ke,
Mu a kàre ná pi e wani.
14 *Supyishiŋi sanŋʼa yire lógo ke,
Ka pi i fyá fo na ɲcyɛ̂ɛnni.
Filisiti shiinbilʼa fyá
Fo mà pi yákilibii wurugo.
15 Edɔmu kìni yyaha yyére shiinbii fyagara wuubii pi ɲyɛ,
Muwabu kìni saanbilʼa sìi fo na ɲcyɛ̂ɛnni,
*Kanana shiinbii punʼa fyá fo mà màban fô piye na.
16 Fyagare ná zòŋkwɔnɲcyaanre sí n-pâa n-cwo pi na.
Mu cyɛge fànhe ɲyahaŋi kurugo,
Pi sí n-fyâha kafaayi fiige,
Fo mu shiinbii ká ntòro, Kafooŋi!
Sùpyire ɲùŋɔ mu a wwû ke,
Fo pire ká ntòrʼa kwɔ̀.
17 Mu sí n-kàre ná pi e si zà ntìŋɛ ma ɲaŋke ɲuŋʼi,
Kafooŋi, kuru cyage mu a yalʼa pyi ma tatɛɛnge,
Kafooŋi, mu yabiliŋi cyɛgʼa kuru tatɛɛnge niɲcɛnŋke yaa maye mɛɛ na.
18 Kafooŋi, mu sí n-kwôro saanwa tèekwòmbaa, tèrigii puni i.» 19 Ɲyɛ tèni i Farɔn ná u shɔnyi ná u wòtorobii ná u shwɔnfeempilʼa jyè suumpe lwɔhe e ke, Kafooŋi a suumpe lwɔhe pyi kʼa tîge pi ɲuŋʼi, ŋka Izirayɛli shiinbilʼa ɲaara ɲìŋke niŋgage ɲuŋʼi mà suumpe lwɔhe jyiile.
20 Ceeŋi wà na mpyi wani, uru na mpyi Kile tùnntunŋɔ, u mɛge mpyi Miriyamu. *Arɔn cìnmpworo cwo u mpyi u wi. Ka uru si pìnŋke lwɔ́, ka cyeebii si fworʼa taha u fye e ná pìnɲyi i, marii ŋkwɔ̂hɔli. 21 Miriyamu mpyi a pi yyaha cû, u aha mɛɛni cêe pi sanmpii mpyi maha li taha u fye e, u a jwo:
«Kafooŋi a u fànhafente cyêe.
Yii mɛɛ cêe u a.
U a shɔnge ná ku fooŋi wà suumpe lwɔhe e.»
Lusoroge kani
22 Ɲyɛ ka *Musa si yîri ná *Izirayɛli shiinbilʼe Suumpe Lwɔhe Niɲyage cyage e, mà kàre Shuri síwage kàmpanŋke na. Pi a canmpyaa taanre ɲara pyi síwage e, pi ɲyɛ a lwɔhɔ ta mɛ.
23 Pi a kàrʼa sà nɔ cyage kà na, kuru cyage mɛge ɲyɛ Mara. Lwɔhe pi a ta wani ke, pi ɲyɛ a jà a kuru bya mɛ, ɲaha na yɛ ku mpyi a soro. Lire kurugo kuru cyage mɛgʼa le Mara. 24 Ka Izirayɛli shiinbii si yîri na Musa ɲùŋke tare maa ŋko: «Ɲaha wuu sí n-ta n-bya yɛ?» 25 Ka Musa si mɛɛ wà Kafooŋi a, ka u u cige kà cyêe Musa na, u a lwɔ́ a wà lwɔhʼe, ka lwɔhe si jà a bya.
Wani kuru cyage e Kafooŋi a *saliyaŋi ná toŋi kapyaagii cyêe pi na, wani u a pi zòompii shwɔ a wíi. 26 U a pi pyi: «Yii aha a núru Kafooŋi yii Kileŋi a, karigii cyi a tíi u ɲyiini i ke, maa cyire pyi, maa yii niŋgyiigii cyán u yɛrɛyi na, nde u ɲyɛ na ɲcaa yii a ke, maa lire pyi, yampe mii a yaha *Misira shiinbii na ke, u sí puru fiige yaha yii na mɛ, ɲaha na yɛ mii u ɲyɛ Kafooŋi mu cùuŋɔfooŋi.»
27 Lire kantugo ka Izirayɛli shiinbii si yîri wani mà kàre Elimu i. Lùbilii kɛ ná shuunni ná shɛhaɲcinŋi beetaanre ná kɛ (70) na mpyi kuru cyage e. Ka pi i pi vàanŋke bayi kwòro wani kuru cyage e lwɔhe taan.