Kile a yalyire kan Izirayɛli shiinbilʼa
16
Ɲyɛ ka *Izirayɛli shiinbii puni si mpa yîri Elimu i, mà kàre Sini síwage e, kuru cyage na ɲyɛ Elimu ná Sinayi shwɔhɔlʼe. Pi a nɔ wani kuru cyage e, pi yizhwɔnwoge canmpyikɛ ná kaŋkurowuuni na, pi fworoŋkwooni kantugo *Misira kìni i. 2 Ɲyɛ mà Izirayɛli shiinbii yaha wani, pi punʼa yîri na *Musa ná *Arɔn ɲùntaha jwumpe yu. 3 Maa ŋko: «Ali Kafooŋi Kile nʼa mpyi a wuu yaha wuu a kwû Misira kìni i lire mpyi a pwɔ́rɔ nde na. Mà wuu yaha wani, wuu mpyi maha ntɛ̀ɛnnʼa cwobwɔyi kwûulo ná kyaare e, wuu mpyi maha lyî na ntìnni. Ŋka ku ke, yii a wuu dìrʼa lwɔ́ wani mà pa ɲcyán naha ŋke síwage e, si katege yaha ku wuu puni bò!» 4 Lirʼa pyi ke, ka Kafooŋi si Musa pyi: «Mii sí yalyire yige nìɲyiŋi i zànmpya fiige, si ntîrige yii a. Canŋa maha canŋa yalyire ti sí sùpyire tìn ke, pi sí raa sì raa tire wwû tʼe. Mii sí lire pyi si yii zò shwɔ ŋgíi, yɛrɛyi mii a kan yii a ke, kampyi yii si raa yii kurigii ɲaare, lire ɲyɛ mɛ kampyi yii si raa yi kurigii ɲaare mɛ, si lire cè. 5 Cibilaage canmpyibaaniwuuni i, nte yii maha ntêe na ŋkure na sore canmpyaagii sanŋkilʼe ke, tire fiigii shuunni sí n-pyi, yii kulʼa shwɔhɔ.»6 Ka Musa ná Arɔn si yi jwo Izirayɛli shiinbii punʼa na: «Niɲjaa yàkoŋke yii sí li cè na Kafooŋi u a yii yige Misira kìni i. 7 Nùmpanŋa ɲyɛ̀ge na, yii sí Kafooŋi sìnampe ɲyɛ mú, ɲaha na yɛ u ɲùntaha jwumpe yii a jwo ke, u a pu puni lógo. Mii ná Arɔn ɲyɛ ɲaha shi, ka yii i wá na wuu ɲùɲyi tare yɛ?» 8 Ka Musa si jwo: «Niɲjaa yàkoŋke Kafooŋi sí kyaare kan yii a, ɲyɛ̀ge na sí yalyire kan yii a fo yii lyî a tìn, Kafooŋi ɲùntaha jwumpe yii a jwo ke, u a pu lógo. Ɲaha shi ku ɲyɛ wuu yɛ? Wuu ɲùɲyi bà yii a taha mà dɛ! Kafooŋi ɲùŋke yii a taha.»
9 Lire kantugo ka Musa si Arɔn pyi: «Izirayɛli shiinbii puni pyi pi file a yyére Kafooŋi yyaha taan, ɲaha na yɛ u a pi ɲùntaha jwumpe lógo.» 10 Ɲyɛ mà Arɔn yaha u u yu ná Izirayɛli shiinbii puni i, ka pi i mpâlʼa Kafooŋi sìnampe ɲya ɲahaŋke e, pi vàanŋke bayi kantugo.
11 Ka Kafooŋi si núrʼa Musa pyi 12: «Mii a Izirayɛli shiinbii ɲùntaha jwumpe lógo, yi jwo pi a na niɲjaa yàkoŋke, pi sí kyaare kyà, si lyî ntìn nùmpanŋa ɲyɛ̀ge na. Lire e pi sí li cè na mii u ɲyɛ pi Kafooŋi, pi Kileŋi. 13 Ɲyɛ yàkoŋkʼa ta ku nɔ ke, ka santuubii pìi si mpa ntɛ̀ɛn ntɛ̀ɛn cyage puni yyaha kurugo. Kuru canŋa nùmpanŋa ɲyɛ̀ge na, ka pi i yîrʼa kamɛŋke ta pi vàanŋke bayi ɲwɔkuruŋi na. 14 Kamɛŋkʼa pa ŋkwɔ̀ ke, ka pi i wílʼa yaŋumpya nivyinre ɲya ɲìŋke na zànhafunɲcɛɛnɛ fiige. 15 Ka Izirayɛli shiinbii si wá na u wíi maa ŋko piyʼa: «Ɲaha shi ku ɲyɛ amɛ yɛ?» Ɲaha kurugo yɛ pi mpyi a u shi cè mɛ. Ka Musa si pi pyi: «Kafooŋi a yalyire ntemu kan yii a ke, tire ti. 16 Ɲje Kafooŋi a jwo ke, yire yi ɲyɛ: shin maha shin u tà lwɔ́ u tàanna ná u lyìŋkanni pɛ̀rɛge e, shin maha shin omɛri*a ɲyaga niŋkin. Yii a ti lwúu yii a ntàanni ná yii pyɛngɛ shiinbii pɛ̀rɛge e.»
17 Bà yʼa jwo mɛ, ka Izirayɛli shiinbii si li pyi amuni, pìlʼa niɲyahara kuu, ka pìi si nimpyire lwɔ́. 18 Pi a pa ti sùma ná omɛriŋi i ke, ka pi i li ɲya na mpii pi a niɲyahara kuu ke, pire woore paanga ɲyɛ a kwôro mɛ, mpii pi a nimpyire kuu ke, pire woore ɲyɛ a kùuŋɔ mɛ. Shin maha shin mpyi a u canŋke ɲjyìŋi pɛ̀rɛge kuu.
19 Ka Musa si pi pyi: «Yii àha ti sannte yaha nùmpanŋa ɲyɛ̀ge mɛɛ na mɛ.» 20 Ka pi pìi si niŋgyiigii waha maa tà yaha kuru canŋa nùmpanŋa ɲyɛge mɛɛ na. Ka tire si fwɔ́nhɔ fo mà fyɛɛnre le. Ka Musa lùuni si yîri pire taan.
21 Canŋa maha canŋa ɲyɛ̀ge na, shin maha shin mpyi maha tà bíle mà tàanna ná u lyìŋkanni pɛ̀rɛge e. Canŋke nʼa mpyi a pa wyɛ̀rɛ, ku kafuge mpyi maha ti sannte pyi tʼa ɲa. 22 Cibilaage canmpyibaaniwuuni i, pɛ̀rɛge pi mpyi maha fyânha na bílili ke, pi mpyi maha tire fiigii shuunni bíle, shin maha shin omɛri ɲyaya shuunni. Ka yyaha yyére shiinbii si ŋkàrʼa sà yire yyaha jwo Musa a. 23 Ka Musa si pi pyi: «Yire Kafooŋi a jwo. Nùmpanŋa u ɲyɛ *canŋɔŋke, canmbilini i Kafooŋi a uye ŋɔ̀ ke, yalyîge yii la ɲyɛ si shwɔhɔ, lire ɲyɛ mɛ si ntaha ke, yii lire pyi niɲjaa. Pɛ̀rɛge yii a bâra ke, yii i kuru yaha nùmpanŋa mɛɛ na. 24 Ka pi i yi pyi bà Musa mpyi a yi jwo mɛ, maa uru ɲjyìŋi sanŋi yaha kuru canŋa nùmpanŋa mɛɛ na, uru ɲyɛ a fwɔ́nhɔ si nta ɲjyere fyɛnrɛ ti jyè u e mɛ. 25 Ɲyɛ ɲyɛ̀gʼa pa múgo ke, ka Musa si pi pyi: «Yii u lyî niɲjaa, niɲjaa u ɲyɛ canŋɔŋke yii a, Kafooŋi mɛge na. Yii sì ɲjyì yafyin ɲya niɲjaa yiye kwùumpe e mɛ. 26 Yii sí raa nte yalyire bílili canmpyaa baani i, cibilaage e. Ŋka cibilaage canmpyibaashɔnwuuni li ɲyɛ canŋɔŋke ke, tà sì n-pyi kuru canŋke mɛ.
27 Ŋka lire ná li wuuni mú i, canmpyibaashɔnwuuni i, pìlʼa fworo si tà bíle, ŋka pi ɲyɛ a tà ta mɛ. 28 Ɲyɛ ka Kafooŋi si Musa pyi: «Fo ɲaha tère e mu shiinbii sí n-láha mii ɲwɔmɛɛ yahare na sʼa mii *saliyaŋi ná mii toŋi kapyaagii kurigii ɲaare yɛ? 29 Yii yabilimpilʼa li cè na mii u ɲyɛ Kafooŋi ke, mii a canŋɔŋke kan yii a, lire kurugo canmpyibaaniwuuni i mii maha canmpyaa shuunni ɲjyì kan yii a. Canmpyibaashɔnwuuni i, yii wà ɲyɛ a yaa u kò a yîri u tatɛɛnge e mɛ. Yii a yaa yii tɛ̀ɛn tanuge e kuru canŋke.» 30 Ɲyɛ lirʼa pyi ke, ka Izirayɛli shiinbii si wá na canmpyibaashɔnwuuni ŋɔ̀ni.
31 Ɲyɛ ka Izirayɛli shiinbii si tire yalyire mɛge le “*mani” b Ti mpyi koriyandiri pyà fiige ŋka ti mpyi a fíniŋɛ, ti tìpoompe mpyi sɛrɛ ntanntɛnyɛ fiige.
32 Ɲyɛ ka Musa si pi pyi: «Kafooŋi a jwo na wuu maniŋi omɛri ɲyaga niŋkin bílʼa mâra lyeɲwɔyi nimpayi mɛɛ na. U a yii yige Misira kìni i maa tire yalyire ntemu kan yii a lyî síwage e ke, bà pi si mpyi si tire ɲya mɛ. 33 Ka Musa si Arɔn pyi: «Yaleŋke kà lwɔ́ maa omɛri ɲyaga niŋkin súma a le kʼe, mà cyêe Kafooŋi na bà u si mpyi si ku mâra lyeɲwɔyi nimpayi mɛɛ na mɛ. 34 Ɲyɛ bà Kafooŋi mpyi a yi jwo Musa a u a jwo Arɔn a mɛ, ka Arɔn si li pyi amuni, maa uru maniŋi le yaage kʼe ma sà yaha *Tunmbyaare Mbwooni taan, bà u si yi mpyi si ti mâra mɛ.