Kile a lwɔhe pyi kʼa fworo kafaagʼe Izirayɛli shiinbilʼa
17
Ɲyɛ mà tàanna ná Kafooŋi Kile jwumpe e, *Izirayɛli shiinbii kuruŋkʼa yîri Sini síwage e, mà pi niŋkaribii yaha pi mpyi na ntɛ̀ɛn na wá fo mà sà nɔ Erefidimu na, maa pi vàanŋke bayi kwòro kwòro wani. Lùbyaga saha mpyi pi a mɛ. 2 Ɲyɛ ka sùpyire si ɲcânra *Musa a maa jwo: «Lwɔhɔ kan wuu a wuu bya dɛ!» Ka Musa si pi pyi: «Ɲaha na yii a cânra mii kurugo yɛ? Ɲaha na yii ɲyɛ na Kafooŋi zòŋi shuu na wíi yɛ?»3 Byage mpyi a pi tɛgɛlɛ ta, ka pi i wá na Musa ɲùŋke tare maa ŋko: «Ɲaha na mu a wuu ná wuu pyìibii ná wuu yatɔɔre lwɔ́ a yige *Misira kìni i si mpa ŋkan byagʼa ku bò naha yɛ?»
4 Ɲyɛ ka Musa si mɛɛ wà Kafooŋi a maa jwo: «Ɲaha mii sí n-pyi nte sùpyirʼa yɛ? Lʼaha ntòro nde taan, pi sí mii wà mbò ná kafaayi i.»
5 Ka Kafooŋi si Musa pyi: «Tòro sùpyire yyaha na, mu ná kacwɔnribii pìi. Kàbiini mu a tɛ̀gʼa Nili baŋi bwɔ̀n ke, maa lire lwɔ́ maye cye e, maa file. 6 Mii wi ke, mii sí n-yyére mu yyaha na kafaage kà ɲuŋʼi Orɛbu ɲaŋke na. Mu aha nɔ wani maa kuru kafaage bwɔ̀n, lwɔhe sí n-fworo kʼe, sùpyire si bya. Ka Musa si lire pyi Izirayɛli shiinbii kacwɔnribii ɲyii na.
7 Ɲyɛ ka Musa si kuru cyage mɛge le Masaa ná Mɛribab, ɲaha na yɛ wani Izirayɛli shiinbilʼa yoge cya Musa a, wani pi a Kafooŋi zòŋi shwɔ a wíi maa jwo: «Sèeŋi na, tá Kafooŋi ɲyɛ wuu shwɔhɔlʼe?»
Amalɛki shiinbilʼa pa kàshi kwɔ̀n Izirayɛli shiinbii na
8 Ka Amalɛki shiinbii si mpa kàshi *kwɔ̀n Izirayɛli shiinbii na Erefidimu kànhʼe. 9 Ɲyɛ ka *Musa si jwo Zhosoyi a: «Nàmbaabii pìi cwɔɔnrʼa bâra maye na, yii i fworʼa sà Amalɛki shiinbii tùn. Nùmpanŋa mii sí n-dùgo n-yyére ɲaŋke ɲùɲcyage e si Kile kàbiini cû na cyɛge e.
10 Ɲyɛ ka Zhosoyi si li pyi bà Musa mpyi a yi jwo mɛ, maa Amalɛki shiinbii tùn. Musa ná *Arɔn ná Uri mpyi a dùgo ɲaŋke ɲùɲcyage e. 11 Musa nʼa mpyi a u cyɛge yîrige *Izirayɛli shiinbii mpyi maha fànha ta. Ŋka u nʼa mpyi a ku tîrige, Amalɛki shiinbii mpyi maha fànha ta. 12 Ɲyɛ Musa cyeyʼa pa ŋkànha ke, ka Arɔn ná Uri si kafaaga lwɔ́ a yaha u taan, ka u u ntɛ̀ɛn ku na. Ka pi i u cyeyi cwɔhɔ, wà mpyi u cyenige cyɛge na, u sanŋi sí ɲyɛ u kàmɛnɛ cyɛge na. Ka lire si Musa cyeyi pyi yʼa yîrigʼa kwôro fo canŋaɲyicwoore na. 13 Ka Zhosoyi ná u kàshikwɔɔnbii si jà Amalɛki shiinbii na.
14 Ka Kafooŋi si Musa pyi: «Ɲcyii karigii sémʼa yaha bà li si mpyi yii funŋɔ kà ŋkwɔ̀ ŋgwɔ̀ cyii na mɛ. Yi jwo Zhosoyi a na mii sí Amalɛki shiinbii shì tò ɲìŋke na feefee, sùpya funŋɔ saha sì n-cwo pi na mɛ.» 15 Ɲyɛ ka Musa si sáraya tawwugo faanra kuru cyage e maa ku mɛge le Adonayi Nisi (lire ɲwɔge ku ɲyɛ: «Kafooŋi mu u a kàshige sûlo mii a.») 16 Maa núrʼa jwo: «Ná Amalɛki shiinbii sʼa yîri si Kafooŋi tùn u fànhe tatɛɛnge e, kàshige sí n-pyi pi ná Kafooŋi shwɔhɔlʼe lyeɲwɔyi puni i.»