Musa nafenaŋi Zhetoro a pa fworo u na
18
Zhetoro u ɲyɛ Madiyani sáragawwuŋi maa mpyi *Musa nafenaŋi ke, kyaa maha kyaa Kile a pyi Musa ná *Izirayɛli shiinbilʼa, pire mpiimu pi ɲyɛ u shiinbii ke, urʼa cyire puni lógo. Pyiŋkanni na Kile a pi yige *Misira kìni i ke, u a lire lógo mú.2-3 U mpyi a pa ná Musa cwoŋi Sefura, ná u jyaabii shuunniŋi i, Musa mpyi a pi yaha pi a sà yyaha yige pyɛngɛ. U mpyi a wà mɛgɛ le Gerishwomu, ɲaha na yɛ u mpyi jwo na uru na ɲyɛ nàmpɔnnte e kìni lʼe. 4 U sanŋi mɛge mpyi Eliyezɛri, ɲaha na yɛ u mpyi a jwo na uru tuŋi u Kileŋi a pa uru tɛ̀gɛ maa uru shwɔ Farɔn* kàshikwɔnŋwɔɔni na.
5 Musa cwoŋi ná u jyaabii mpyi a pa ná Zhetoro i Musa yyére síwage e, Kile ɲaŋke cyage e. 6 Ka Zhetoro si wà tun u a sà jwo Musa a na: «Mii, mu nafooŋi Zhetoro mii a pa mu yyére ná mu cwoŋi ná mu jyaabii shuunniŋi i. 7 Ka Musa si fworʼa u nafooŋi ɲùŋɔ bɛ̂, maa niŋkure sín u a, maa u pûrʼa cû, ka pi i piye ticuumɔ yíbe, maa jyè vàanŋke bage e. 8 Nde Kafooŋi mpyi a pyi Farɔn ná Misira shiinbii ná Izirayɛli shiinbii kurugo ke, Musa a lire jwo u nafenaŋʼa, mà bâra kawaa maha kawaa li mpyi a pi ta kuni na, ka Kafooŋi si tafworoŋɔ kan pi a ke, u a cyire puni yyaha jwo u a. 9 Cyire kacɛnŋkii puni Kafooŋi mpyi a pyi Izirayɛli shiinbilʼa, maa pi shwɔ Misira shiinbii na ke, ka cyire si Zhetoro funŋke pyi kʼa táan. 10 Ka u u jwo: «Kafooŋi a yaa ná pèente e, uru ŋgemu u a yii ɲùŋɔ wwû maa yii shwɔ Misira shiinbii ná Farɔn fànhe na ke. 11 Numɛ mii a li cè na Kafooŋi a fànha tò yasunɲyi puni na. U a lire cyêe tèni i Izirayɛli shiinbii zàmpɛɛnbii mpyi na pi kyérege ke.
12 Ɲyɛ ka Musa nafooŋi Zhetero si sáraga nizógogo*a wwû, mà bâra sárage kabɛrɛ na Kile a. Ka *Arɔn ná Izirayɛli shiinbii yyaha yyére shiinbii sanmpii puni si mpa lyî siɲcyan ná Musa nafooŋi i Kile ɲyii na. 13 Kuru canŋa nùmpanŋa na, ka Musa si ntɛ̀ɛn karigii ɲcwɔnrɔŋi na. Mà lwɔ́ ɲyɛ̀ge na fo ma sà nɔ yàkoŋke na, sùpyire mpyi a yyére yyére na u sigili. 14 Musa nafooŋʼa Musa kapyiiŋkii puni ɲya sùpyirʼa ke, ka u u jwo: «Ɲaha na mu ɲyɛ na báaraŋi pyi nde pyiŋkanni na yɛ? Ɲaha na mu kanni ɲyɛ na ŋge báaraŋi pyi sùpyire sʼa yyére na mu sigili, ma lwɔ́ ɲyɛ̀ge na fo yàkoŋke yɛ?» 15 Ka Musa si u pyi: «Sùpyire na ma mii a, Kile la na ɲyɛ pi a ndemu pyi ke, si lire cè. 16 Jwuɲyahama ká jyè pìi shwɔhɔlʼe, pi maha mpa mii a, nde ɲùŋɔ taan pi a nɔ piye na ke, mii maha Kile toŋi ná u *saliyaŋi cyêe pi na lire kàmpanŋke na.»
17 Ka Zhetoro si u pyi: «Mu báaraŋi lwɔŋkanni ɲyɛ a ɲwɔ mɛ. 18 Báaraŋi ká a ŋkɛ̀ɛge amɛ, yii fànhe sí n-wyɛ̀rɛ n-kwɔ̀, mu bâra mpii pi ɲyɛ na ma mu a ke, ɲaha na yɛ ŋge báaraŋi ntùnŋkʼa pêe mu kanni na, mu kanni sì n-jà u pyi mɛ. 19 Numɛ, lógo na ɲwɔ na, yɛrɛge mii sí n-kan mu a ke, mu aha ku lógʼa tare Kile sí mu tɛ̀gɛ. Mu a yaa mu u pyi sùpyire ná Kile shwɔhɔlʼe, maa pi karigii yu u a. 20 Mu a yaa mu u Kile Saliyaŋi ná u toŋi kapyaagii yyaha jwo sùpyirʼa, kuni pi a yaa pi lwɔ́ ke, lire le pi taan, nde pi a yaa pi pyi ke, lire cyêe pi na. 21 Kàanmucyaga pyi sùpyire shwɔhɔlʼe, maa sèeshiinbii pìi cwɔɔnrɔ nàmbaabilʼe mpiimu pi ɲyɛ na fyáge Kile na, maa piye pwɔ sèeŋi na, maa mpyi pi múnahagii ɲyɛ a lwɔ́ a pwɔ nàfuuŋi na mɛ, maa pire tìŋɛ sùpyire ɲùŋɔ na, sùpyirʼa yaa ti pyi kuruyo kuruyo, kuruɲyi yà pyi kampwɔhii kampwɔhii (1000) maa yà pyi ŋkuu ŋkuu (100) maa yà pyi beeshuunni ná kɛ kɛ (50) maa yà pyi shiin kɛ kɛ (10). 22 Pire kacwɔnribii sí n-pyi sùpyire yahare e tèrigii puni i, pi si raa pi kapyɛɛre cwɔɔnre, karigii cyi a fànha tò ke, pi sí raa ma ná cyire e mu yyére. Karigii ɲcyiimu cwɔnrɔmɔ pʼa táan ke, pi sí raa cyire cwɔɔnre. Ma tugure pɛrɛgɛ yaa ná maye e, pi i ma tɛ̀gɛ ti ɲjwòŋi na. 23 Lire Kile la ɲyɛ mu u pyi. Mu aha mii yɛrɛge lógo, mu sì n-kànha mɛ, mà bâra lire na nte sùpyire puni yyeɲiŋɛwuubii sí nɔ pi tashàge e.
24 Ɲyɛ ka Musa si u nafenaŋi jwumpe lógo, kyaa maha kyaa u a jwo ke, maa lire pyi. 25 U a sèeshiinbii pìi cwɔɔnrɔ nàmbaabilʼe Izirayɛli shiinbii shwɔhɔlʼe ma tìŋɛ tìŋɛ sùpyire ɲùŋɔ na. Pìi mpyi a tìŋɛ shiin kampwoo (1000) ɲùŋɔ na maa pìi tìŋɛ shiin ŋkuu (100) ɲùŋɔ na, maa pìi tìŋɛ shiin beeshuunni ná kɛ (50) ɲùŋɔ na, maa tìŋɛ shiin kɛ (10) ɲùŋɔ na. 26 Pire mpyi maha karigii cwɔɔnre sùpyirʼa tèrigii puni i, karigii cyi mpyi a waha tacwɔnrɔge e ke, pi mpyi maha sì ná cyire e Musa yyére, pi yabilimpii mpyi maha kapyɛɛre cwɔɔnre.
27 Ɲyɛ lire kantugo, ka Musa si kuni kan u nafenaŋʼa, ka uru si ŋkàre u kìni i.