Kile a tunmbyara le ná Izirayɛli shiinbilʼe Sinayi ɲaŋke na
19
1-2 Ɲyɛ ka *Izirayɛli shiinbii si yîri Erefidimu i, pi yintanrewoge canmpyicyiini i, pi fworoŋkwooni kantugo *Misira kìni i, maa ŋkàre Sinayi síwage e. Maa pi vàanŋke bayi kwòro kwòro síwage e, Sinayi ɲaŋke taan.3 Ka *Musa si dùgo ɲaŋke ɲuŋʼi si jwo ná Kile e. Ka Kafooŋi Kile si u yyere ɲaŋke ɲùɲcyage e maa u pyi: «Izirayɛli shiinbii pi ɲyɛ *Yakuba ɲampyire ke, ɲje mu a yaa mu u jwo pi a ke, yire yi ɲyɛ: 4 “Yii yabilimpilʼa li cè nde mii a tɛ̀gɛ Misira shiinbii na, maa yii lwɔ́ a pa naye yyére, bà kàmɛɛni maha li pyàŋi lwɔ́ mɛ, yii a lire ɲya. 5 Ɲyɛ numɛ yii aha a mii jwumpe núru, maa ŋkwôro mii wwoɲɛɛge e. Supyishiŋi puni mɛ́ɛ ɲyɛ mii wuu ke, yii sí n-pyi mii wuu si ntòro pi sanmpii na. 6 Ŋka yii pi ke, yii sí n-pyi mii, fànhafooŋi *Kile sáragawwuubii kuruŋɔ, si mpyi mii kìni shiin. Ɲyɛ mpe jwumpe mu sí n-sà jwo Izirayɛli shiinbilʼa.»
7 Ɲyɛ ka Musa si ntîge ɲaŋke ɲuŋʼi maa Izirayɛli shiinbii yyaha yyére shiinbii yyerʼa wà piye na, maa Kafooŋi jwumpe niɲjwumpe puni taha pi a. 8 Ka sùpyire puni si ɲɛɛ maa jwo: «Kyaa maha kyaa Kafooŋi a cya wuu a ke, wuu sí raa cyire pyi.» Ɲyɛ ka Musa si ŋkàrʼa sà sùpyire jwumpe taha Kafooŋi a. 9 Ka Kafooŋi si Musa pyi: «Mii sí n-kàre fo mu cyage e ɲahaŋke e, bà sùpyire si mpyi sʼa mii jwumpe núru mii aha a yu ná mu i, tèni ndemu i ke. Lire e pi sí n-dá mu na tèrigii puni i.»
Ŋka Musa mpyi a sùpyire jwumpe niɲjwumpe taha Kafooŋi a. 10 Ka Kafooŋi si u pyi: «Núru maa sì sùpyire cyage e, maa yi jwo pi a na, pi piye fíniŋɛ, pi i pi vàanɲyi jyè niɲjaa ná nùmpanŋa. 11 Nùmpanŋaniɲcye pi i bégele, ɲaha na yɛ lire canmbilini i mii sí n-pa Sinayi ɲaŋke ɲuŋʼi sùpyire puni ɲyii na. 12 Tɛ̀gɛlɛ bwɔ̀n a cyêe ɲaŋke ɲwɔkuruŋi na sùpyirʼa, maa yi jwo pi a na: pi wà hà zìi ŋkwɔ̀ dùgo ɲaŋke na, lire ɲyɛ mɛ mà file ku na mɛ. Shin maha shin ká bwɔ̀n ku na, urufoo sí n-bò. 13 Lʼa pyi sùpya yo, lʼa pyi yatɔɔgɔ yo, urufoo sí n-bò. Urufoo sì n-cû ná cyeyi i mɛ. Ŋka kafaayi yi sí n-tɛ̀gɛ urufoo wà n-bò, lire ɲyɛ mɛ taanŋi pi sí n-tɛ̀gɛ urufoo fúrugo. Lʼa pyi yatɔɔgɔ yo, lʼa pyi sùpya yo, urufoo sì n-sìi n-yaha ɲyii na mɛ. Mpuruge ká wyi, lire e pìi sí n-jà dùgo ɲaŋke ɲuŋʼi.
14 Ɲyɛ ka Musa si ntîge ɲaŋke ɲuŋʼi maa ŋkàre sùpyire cyage e, maa pi pyi pi a piye fíniŋɛ, maa pi pyi pi a pi vàanɲyi jyè. 15 Maa pi pyi: «Yii bégele, canmpyaa taanre funŋʼi, yii wà hà ŋkwɔ̀ nɔ ceewe na mɛ.
16 Ɲyɛ canmpyitanrawuuni ɲyɛ̀sɔɔge na, ka zànhe si wá na ntînni maa ɲî, ka ŋguruge si ɲaŋke ɲùɲcyage tò, ka mpuruge mɛɛni si fworo fànha na, ka Izirayɛli shiinbii puni si fyá fo na ɲcyɛ̂ɛnni. 17 Ɲyɛ ka Musa si sùpyire pyi tʼa fworʼa sà Kile ɲùŋɔ bɛ̂, ka pi i yyére yyére ɲaŋke ɲwɔhʼi.
18 Sinayi ɲaŋke puni mpyi a pyi ŋgurugo, ɲaha na yɛ Kafooŋi mpyi a pa ku ɲuŋʼi nage e. Nàŋguruge mpyi ku na mu à jwo maa* li ɲyɛ na ŋgurugo yige, ɲaŋke puni mpyi na ɲcúŋi. 19 Là mpyi na bârali mpuruge mɛɛni mpèeŋi na. Musa mpyi na yu, Kile sí i u ɲwɔ shuu fànha na.
20 Ɲyɛ lire pyiŋkanni na, Kafooŋi a pa Sinayi ɲaŋke ɲùɲcyage e, maa Musa yyére ka u u dùgo.
21 Kafooŋi mpyi a Musa pyi: «Tîge maa sà yi jwo a waha sùpyirʼa, na pi àha ŋkwɔ̀ ntîn ndùgo si sà mii wíi mɛ, lire baare e pi niɲyahara sí n-kwû. 22 Sáragawwuubii kanni pi sí n-jà n-file mii na, ŋka pire mú bá a yaa pi piye fíniŋɛ, pi i nta a bâra mii na, bà li si mpyi mii àha ŋkwɔ̀ kakyara pyi pi e mɛ.» 23 Ka Musa si Kafooŋi pyi: «Sùpyire sì ɲɛɛ n-dùgo ɲaŋke ɲuŋʼi mɛ, ɲaha na yɛ mu a yi jwo a waha wuu a, na wuu tɛgɛlɛ bwɔ̀n pi a, wuu u ɲaŋke yaha mu a.» 24 Ka Kafooŋi si Musa pyi: «Ta sì, tîge maa dùgo ná *Arɔn e, ŋka sáragawwuubii ná sùpyire sannte ɲyɛ a yaa pi tîn a dùgo naha mii Kafooŋi cyage e mɛ, lire baare e mii sí kakyara pyi pi e.» 25 Ka Musa si ntîgʼa kàre sùpyire cyage e, maa cyire karigii yyaha jwo pi a.