Toŋi kapyaagii kɛŋi kani
20
Ɲyɛ ka Kile si mpe jwumpe puni jwo. 2 U a jwo: «Mii u ɲyɛ Kafooŋi, mu Kileŋi, ŋgemu u a mu yige *Misira kìni i, lire ndemu i mu mpyi bilere e ke.3 Ma hà kileŋi wabɛrɛ bâra mii na mɛ.
4 Ma hà yasunŋke kà tufiige yaa mu à jwo nìɲiyaaga, lire ɲyɛ mɛ ɲìŋke yaaga, lire ɲyɛ mɛ lwɔhɔ funŋɔ wugo fiige mɛ. 5 Ma hà zìi ŋkwɔ̀ niŋkure sín si kuru yasunŋke kà pêe mɛ, ɲaha na yɛ mii u ɲyɛ Kafooŋi mu Kileŋi ke, lire yiɲcyɛge ɲyɛ mii i. Tiibii pi a lire kapiini shiŋi pyi ke, mii maha pire tùn fo mà sà nɔ pi pyìibii lyeɲwɔge tanrawoge, lire ɲyɛ mɛ sicyɛrɛwoge na, pire mpiimu pi a mii kyaa pɛn piyʼa ke. 6 Ŋka mpii pi a mii kyaa táan piyʼa, maa mii toŋi kapyaagii mâra ke, mii maha kacɛnŋkii pyi pirʼa fo mà sà nɔ pi pyìibii lyeɲwɔyi kampwoo (1.000) na.
7 Ma hà raa Kafooŋi mu Kileŋi mɛge yire tawage e mɛ, ɲaha na yɛ shin maha shin u a lire pyi ke, mii sí ku ɲwɔge pɛn urufoo na mɛ.
8 Yakili yaha *canŋɔŋke na maa ku le baragʼe, maa ku yaha mii yahare e. 9 Ta báaraŋi pyi canmpyaa baani i, maa ma karigii puni pyi cyire canmpyaagilʼe. 10 Ŋka canmpyibaashɔnwuuni, li ɲyɛ canŋɔŋke ke, lire na ɲyɛ Kafooŋi wuu, ma hà zìi ŋkwɔ̀ báaraŋi wà tufiige pyi kuru canŋke mɛ. Lʼa pyi mu yo, lʼa pyi mu jyaabii yo, lʼa pyi mu pworibii yo, lʼa pyi mu bilinambaabii yo, lʼa pyi mu bilicyeebii yo, lʼa pyi mu nampunntɛɛnlii yo, pire wà tufiige ɲyɛ a yaa u báara pyi kuru canŋke mɛ. 11 Ɲaha kurugo yɛ canmpyaa baani funŋʼi, mii a nìɲyiŋi ná ɲìŋke yaa, mà bâra suumpe lwɔhe ná ku funŋɔ yaayi na, canmpyibaashɔnwuuni i, maa naye ŋɔ̀. Lire kurugo mii u ɲyɛ Kafooŋi ke, mii a canŋɔŋke pyi báraga yaaga, maa ku pyi naye wogo.
12 Ma tuŋi ná ma nuŋi pêe, kìni mii sí n-kan mu a ke, bà mu canmpyaagii nɛŋke si mpyi si ntɔɔn lire e mɛ.
13 Ma hà sùpya bò mɛ.
14 Ma hà zíni ná wabɛrɛ cwo e mɛ.
15 Ma hà nàŋkaaga pyi mɛ.
16 Ma hà vini ntaha ma supyiɲɛɛ na mɛ.
17 Ma hà ma supyiɲɛɛŋi yaage kà tufiige ɲyipɛɛn pyi mɛ: lʼa pyi u bage yo, lʼa pyi u cwoŋi yo, lʼa pyi u báarapyinaŋi yo, lʼa pyi u báarapyicwoŋi yo, lʼa pyi u nuŋi yo, lʼa pyi u dùfaanŋke yo, ma hà zìi u cyeyaage kà tufiige ɲyipɛɛn pyi mɛ.»
18 *Izirayɛli shiinbii puni mpyi a tunmpe lógo, maa bɛ̀ɛnmpe ɲya maa mpuruge mɛɛni lógo, maa nàŋguruge ɲya ɲaŋke ɲuŋʼi. Lire mpyi a pi pyi pi a fyá fo na ɲcyɛ̂ɛnni, pi mpyi a yyére laage e. 19 Maa *Musa pyi: «Mu yabiliŋi u a yu wuu a, wuu sí raa mu jwumpe núru. Kile ɲyɛ a yaa u a yu ná wuu e mɛ, lire baare e wuu sí n-kwû.» 20 Ka Musa si pi pyi: «Yii àha raa fyáge mɛ, Kile a pa si yii zòompii shwɔ ŋgíi. U la ɲyɛ yii raa fyáge uru na, bà yii si mpyi yii àha ŋkwɔ̀ katiimbaala pyi mɛ.» 21 Sùpyire mpyi a yyére laage e, ka Musa si file ŋguruge na, kuru cyage e Kile mpyi.
Karigii cyi a yyaha tíi ná sárayi tawwûge e ke
22 Ka Kafooŋi si *Musa pyi: «Ɲje mu sí n-jwo *Izirayɛli shiinbilʼa ke, yire yi ɲyɛ: yii a li ɲya na nìɲyiŋi na mii a tɛ̀ɛn maa jwo ná yii e. 23 Yii àha ŋkwɔ̀ yasunɲyi yà yaa ná wyɛ́rɛfyinŋi i, lire ɲyɛ mɛ ná sɛɛnŋi i si mpyi kileebii pìi sʼa pire pêre si mbâra mii na mɛ. 24 Yii sáraya tawwugo faanra ná pwoore e mii a, *sárayi yatɔɔyi yi maha súugo ke, ná ɲje yi maha wwûlʼa tɛ̀gʼa sùpyire ná tiye shwɔ̀hɔŋi yaa ke, yii raa yire wwû ku na mii a, ná yii mpàabii ná yii sikaabii ná yii nìiyi i. Mii wi ke, cyaga maha cyage e mii a naye cyêe ke, mii sí jwó le yii a. 25 Yii aha a si sáraya tawwugo faanra mii a ná kafaayi i, yii àha fáayi te mɛ, ɲaha na yɛ yii aha cini tɛ̀gʼa kafaaga maha kafaaga te ke, kuru saha sì n-jà tɛ̀gɛ kyaa pyi mii a mɛ. 26 Yii àha ŋkwɔ̀ sáraya tawwugo faanra mii a, ŋkemu ɲuŋʼi sùpya si raa dùru mɛ, bà li si mpyi pi àha ŋkwɔ̀ raa urufoo ɲwɔhe ɲaa tadùgoge e mɛ.»