50
Tèni i Yusufu à cè na u tuŋʼà kwû ke, ka u u u yyahe bûru u woge na, maa mɛɛ sú.2 U à kwɔ̀ mɛɛsuni na ke, maa u wyempyiibii pyi pi à u tuŋi buwuŋi yalʼa yaa ná nùguntangayaayi i mà yaha. 3 Ka pi i ŋkwôro u ɲjaaŋi na fo mà sà nta canmpyaa beeshuunni, ɲaha na yɛ *Misira kìni làda u mpyi ure. Ka Misira shiinbii si yamɛɛni sú fo canmpyaa beetaanre ná kɛ. 4 Cyire canmpyaagilʼà fûnŋɔ ke, ka Yusufu si yi jwo Farɔn fyèɲwɔhɔshiinbilʼá «Kampyi sèe wi, mii kyalʼà táan yii á, yii na pwɔhɔ yii sà yi jwo Farɔn á, 5 na mà mii tuŋi yaha u sàha ŋkwû mɛ, u à yi jwo mii á na uru ká ŋkwû, mii i sà uru tò u fanŋke nintùgoge e *Kana kìni i, mii sʼà kâa u á na mii sí li pyi. Lire kurugo, mii la ɲyɛ si sà na tuŋi tò si láha núru mpa.» 6 Ɲyɛ puru jwumpʼà nɔ Farɔn na ke, ka u u yi jwo Yusufu á «Sà ma tuŋi tò Kana kìni i, maa núru, ɲaha na yɛ mu à kâa mà kwɔ̀ u á na mu sí lire pyi». 7 Yusufu niŋkàriŋi ná u tuŋi buwuŋi i, Farɔn kìni ɲùŋufeebii punʼá sà u tùugo, Farɔn nàŋkolyeebii ná Misira kìni nàŋkolyeebii sanmpii puni, 8 ná Yusufu pyɛngɛ shiinbii puni, ná u sìɲɛɛbii, ná u tuŋi pyɛngɛ shiinbii puni. Pyìibii ná yatɔɔre kanni tʼà kwôro Gozheni kùluni i, Misira kìni i. 9 Shɔnyi wòtorobii ná shɔndugubii mú na mpyi ná pi e. Sùpyiɲyahara ti mpyi tiye fye e na ŋkɛ̀ɛge.
10 Tafafyinge ku ɲyɛ Zhurudɛn baŋi kàntugo, ná ku mɛge ɲyɛ Atadi ke, pi à nɔ wani maa yamɛɛni sú, maa kwuuyi wà sèlʼe. Canmpyaa baashuunni pi à pyi kuru kwùge na wani. 11 Kana shiinbii pi ɲyɛ lire kìni i ke, pirʼà kuru kwùge pyiŋkanni ɲya Atadi tafafyinge e ke, maa jwo «Ŋke à pyi kwùbwɔhɔ Misira shiinbilʼá dɛ!» Lire kurugo, pi à kuru cyage mɛge le na *Abɛli Misirayimu, kuru cyage na ɲyɛ Zhurudɛn baŋi kàntugoa
12 Lire pyiŋkanni na, *Yakuba mpyi a ɲjemu jwo u pyìibilʼá u kwùge kyaa na ke, lire pi à pyi. 13 Pi à kàre ná u buwuŋi i Kana kìni i. Ɲaŋgyige ku ɲyɛ Makipela kɛrɛge e ke, mà sà ntò wani. *Ibirayima u mpyi a kuru cyage shwɔ Kyiti tùluge shinŋi Efirɔn á, mà yaha kwuutatoŋɔ, kuru cyage laage ɲyɛ a tɔɔn Mamire woge na mɛ. 14 Yusufu à u tuŋi tò a kwɔ̀ ke, ka u u núrʼa kàre Misira kìni i. U sìɲɛɛbii ná shin maha shin u mpyi a kàre ná u e tufooŋi tatoŋke e ke, ka pire puni si núrʼa pa Misira e.
Yusufu yyahafeebilʼà yàfa cya u á
15 Ɲyɛ Yusufu sìɲɛɛbilʼà li ɲya na pire tuŋʼà kwû ke, ka pi i jwo: «Yusufu ká yîri wuu kurugo numɛ de! Wuu à kapiini ndemu pyi u na ke, u aha jwo u sí lire fwooni tò wuu na de!» 16 Ka pi i wà yaha a kàrʼa sà yi jwo Yusufu á «Mà jwo mu tuŋi u kwû ke, u mpyi a jwo na 17 wuu sà jwo ná mu i, wuu u mu ɲáare, maa náaŋi maa yàfa ma sìɲɛɛbii na, ɲaha na yɛ pi à kapii pyi mu na.» Ka pi i jwo Yusufu á «Wuu na ɲyɛ mu tuŋi Kileŋi bilii, náaŋi (maa yàfa*) maa ma sìɲɛɛbii kapiini yàfa pi na.» Yusufu à puru jwumpe lógo ke, ka u u mɛɛ sú.
18 Ka u yyahawuubii si ŋkàrʼa sà niŋkure sín u taan, maa jwo «Mu bilibii pi mpii.» 19 Ka u u pi pyi «Yii àha vyá mɛ, mii u ɲyɛ Kile la? 20 Yii pi ke, yii la mpyi si kapii pyi mii na, ŋka Kile à li kɛ̂ɛnŋʼa pyi kacɛnnɛ, maa li kàntugo pyi nde niɲjaa, bà sùpyire niɲyahara si mpyi si shwɔ mɛ. 21 Lire e ke, yii àha raa fyáge mɛ, mii sí yii ná yii pyìibii puni le na fukange ɲwɔhʼi.» Maa jwo ná pi e tìpoomʼi, mà pi zòmpii tìŋɛ.
Yusufu kwùŋi
22 Lire kàntugo, Yusufu ná u cìnmpyiibilʼà kwôro *Misira e. Yusufu shìŋi tɛgɛnʼà pyi yyee ŋkuu ná kɛ. 23 U à u jyaŋi Efirayimu pyìibii ná u ɲampyire ɲya. Ɲyɛ Manase ɲampyirʼà si ke, ka Yusufu si pire pyi u pyìi. Manase ɲampyire na mpyi Makiri pyìi.
24 Canŋka Yusufu à jwo u sìɲɛɛbilʼá «Li sì mɔ mɛ, mii sí n-kwû, ŋka yii i dá li na na Kile sí yii le u fukange ɲwɔhʼi, si yii yige nde kìni i. Kìni ɲwɔmɛɛni u à lwɔ́ wuu tulyeyi *Ibirayima ná Ishaka ná *Yakuba á ke, u sí n-kàre ná yii e wani.» 25 Lire kàntugo, Yusufu à u sìɲɛɛbii pyi «Yii kâa na ɲyii na, na Kile ká bú yii yige Misira e, yii niŋkàribii, yii sí n-kàre ná mii kaciiyi i.»
26 Ɲyɛ Yusufu à pa ŋkwû mà u shìŋi yaha yyee ŋkuu ná kɛ ke, ka pi i u buwuŋi bégele ná latikolʼe mà le keshu funŋʼi mà tò Misira kìni i.