Zhurudɛn baŋi canŋafyinmɛ yyéreŋi tùluyi
22
Ɲyɛ,
Zhozuwe à Urubɛn tùluge ná Gadi woge ná Manase woge niŋɛ taage yyere,
2 maa pi pyi:
«Kafooŋi báarapyiŋi Musa à tùnnture ntemu jwo yii á ke,
yii à ti puni pyi,
maa mii ɲwɔmɛɛni cû mii jwumpe puni i.
3 Mà lwɔ́ fo tèemɔni i mà pa nɔ niɲjaa na,
yii ɲyɛ a cyé yii cìnmpyiibii na mɛ.
Kafooŋi,
yii Kileŋi à tùnnture ntemu jwo yii á ke,
yii à tire puni pyi.
4 Ɲyɛ numɛ,
Kafooŋi,
yii Kileŋi à taŋɔɲcyaga kan yii cinmpyiibilʼá bà u mpyi a yi jwo pi á mɛ.
Yii núru yii a si yii pyɛnɲyi i yii kùluni i,
Kafooŋi báarapyiŋi Musa à lire ndemu kan yii á Zhurudɛn baŋi canŋafyinmpe e ke.
5 Ŋka,
Kafooŋi báarapyiŋi Musa à tùnnture ntemu jwo maa sàliyaŋi ŋgemu kan yii á ke,
yii yaha uru na sèlʼe yii raa u kurigii ɲaare,
yii i Kafooŋi,
yii Kileŋi kyaa táan yiyʼá,
yii raa ɲaare u kurigii puni i,
yii i u toŋi kapyaagii puni yaha yiye funŋʼi,
yii i yiye pwɔ u na,
yii raa báare u á ná yii zòmpyaagii puni ná yii munahigii puni i.»
6 Lire kàntugo,
ka Zhozuwe si jwó le pi á maa pi kuni yaha,
ka pi i núrʼa kàre pi pyɛnyi i.
7 Musa mpyi a názhan kan Manase tùluge niŋɛ taaga á Basan kùluni i.
Ka Zhozuwe si nàzhan kan niŋɛ taage sanŋkʼá pi cìnmpyiibii ŋkère na Zhurudɛn baŋi kàmpanŋke sanŋke na canŋacwumɔ yyéreŋi i.
Zhozuwe à kuni kan pi á,
maa jwóŋi le pi á ke,
8 maa jwo:
«Yii núru yii a si yii pyɛnyi i ná yii nàfuɲyahage ná yatoɲyahaɲyahare ná wyɛ́rɛfyinŋi ná sɛɛnŋi ná dàɲyɛŋi tɔɔnte ná tɔɔnwoŋi ná vàanɲyahayi i.
Yire yaayi yii à kuu kàshige takwɔnge e yii zàmpɛɛnbii na ke,
yii yire táa ná yii cìnmpyiibilʼe.»
Sárayi tawwuge ɲjaaŋi
9 Urubɛn tùluge shiinbii ná Gadi woge shiinbii ná Manase woge niŋɛ taage shiinbilʼà yîri Izirayɛli shiinbii sanmpiitaan Silo e Kana kìni i,
mà kàre Galadi i,
uru ŋgemu u mpyi pi nàzhanŋi bà Kafooŋi mpyi a yi jwo Musa cye kurugo mɛ.
10 Urubɛn tùluge shiinbii ná Gadi woge shiinbii ná Manase woge niŋɛ taage shiinbilʼà sà nɔ Geliyɔti kànhe e Zurudɛn baŋi byanhampe e Kana kìni i ke,
maa sáraya tawwugo yaa Zhurudɛn baŋi byanhampe e.
11 Izirayɛli shiinbii sanmpilʼà pa lógo na pi wa na ŋko:
«Urubɛn tùluge shiinbii ná Gadi woge shiinbii ná Manase woge niŋɛ taage shiinbii wa a sáraya tawwugo yaa Kana kìni yyetiimpe na Geliyɔti i,
Zhurudɛn baŋi byanhampe e pi taare e.»
12 Izirayɛli shiinbii sanmpilʼà yire lógo ke,
ka pi puni si piye bínni Silo e,
maa bégele pi mɛɛ na.
13 Ka pi i sáragawwuŋi Eliyazari jyaŋi Fineyasi tun Galadi kùluni i Urubɛn tùluge shiinbii ná Gadi woge shiinbii ná Manase woge niŋɛ taage shiinbilʼà.
14 Maa pyɛnyi feebii shiin kɛ bâra u na,
tùlugo maha tùlugo shin niŋkin.
Pire punʼà pyi Izirayɛli pyɛnyɛ fee.
15 Pi à sà nɔ Urubɛn tùluge shiinbii ná Gadi woge shiinbii ná Manase woge niŋɛ taage shiinbii na Galadi kùluni i ke,
maa jwo:
16 «Kafooŋi shiinbii punʼà jwo wuu pa yii yíbe na ɲaha kurugo yii à nde kapiini pyi Izirayɛli u Kileŋi na yɛ?
Ɲaha kurugo yii à ɲùŋɔ kyán Kafooŋi na numɛ maa wâlʼa láha maa sáraya tawwugo yaa yiyʼá niɲjaa yɛ?
17 Kapiini wuu à pyi Pehɔri i ke,
lire ɲyɛ a wuu tìn mà?
Kafooŋi mɛɛ ɲyɛ u à kakyara nɔ wuu na li kani kajyilʼe ke,
ali niɲjaa wuu sàha lire láha wuye ɲuŋʼi mɛ.
18 Yii sʼà kàntugo wà Kafooŋi á niɲjaa!
Yii aha ɲùŋɔ kyán Kafooŋi na niɲjaa,
u lùuni sí n-yîri Izirayɛli shiinbii puni taan nùmpanŋa.
19 Ká mpyi yii à li ta na yii kùlunʼà ɲwɔhɔ,
yii núru yii a ma Kafooŋi wuuni i u vàanŋke bage ɲyɛ lire ndemu i ke,
yii i mpa ntɛ̀ɛn wuu shwɔhɔlʼe.
Ŋka yii àha ɲùŋɔ kyán Kafooŋi na si wâa n-láha wuu na,
si sárayi tawwuge kabɛrɛ yaa yiyʼá mà ta wuu Kileŋi woge bà mɛ.
20 Ta Zera jyaŋi Akan ɲyɛ a kapii pyi,
yaayi yi mpyi a yaha Kafooŋi yaharʼe ke,
maa yire yà lwɔ́,
ka Kafooŋi lùyirini si ntîge Izirayɛli shiinbii puni ɲuŋʼi mɛ?
Uru nàŋi kanni bà u à kwû u kapiini kajyilʼe mɛ.»
21 Ka Urubɛn tùluge shiinbii ná Gadi woge shiinbii ná Manase woge niŋɛ taage shiinbii si Izirayɛli pyɛnyi feebii ɲwɔ shwɔ:
22 «Kafooŋi,
Siŋi punifoo Kile,
Kafooŋi,
Siŋi punifoo Kileŋi à li cè ɲùŋke na wuu à nde pyi ke,
Izirayɛli shiinbii mú sí li cè.
Ká mpyi ɲùŋkyanra ti,
lire ɲyɛ mɛ,
kapii wuu à pyi Kafooŋi na,
Kafooŋi kà wuu yaha wuu shwɔ̀n niɲjaa mɛ.
23 Ká mpyi wuu à sárayi tawwuge yaa si ɲùŋɔ kyán Kafooŋi na,
kampyi ku kayaani li ɲyɛ sʼa sárayi nizogoyi ná sùmaŋi sárayi ná funntanga sárayi wwû ku ɲuŋʼi,
Kafooŋi yabiliŋi u wuu kíbʼa li mɛgɛ yyére.
24 Wuu ɲyɛ a li pyi ná kuru funŋke e mɛ,
fyagare tʼà wuu pyi wuu à li pyi.
Wuu na sɔ̂nŋi na yii pyìibii sí n-jà n-pa wuu wuubii pyi canŋka:
“Ɲaha shi ku ɲyɛ yii ná Kafooŋi,
Izirayɛli u Kileŋi shwɔhɔlʼe yɛ?
25 Kafooŋi à Zhurudɛn baŋi pyi wuu ná yii Urubɛn tùluge shiinbii ná Gadi woge shiinbii tɛgɛni.
Nàzhan sàha ɲyɛ yii á mà yîri Kafooŋi yyére mɛ.”
Lire ká mpyi,
yii pyìibii sí n-pyi kaɲuŋɔ wuu wuubii sì raa fyáge Kafooŋi na mɛ.
26 Lire kurugo wuu à jwo,
wuu sáraya tawwugo yaa wuyʼá.
Ku ɲyɛ a yaa sárayi nizogoyi,
lire ɲyɛ mɛ sárayi yabɛrɛ kurugo mɛ.
27 Ŋka ku pyi shéere yaaga wuu ná yii shwɔhɔlʼe ná wuu tùluyi ná yii wuyi shwɔhɔlʼe,
si li cyêe na kunʼà kan wuu á,
wuu a wuu Kafooŋi pêre u tapeeŋke e ná wuu sárayi nizogoyi ná wuu kapegigii yàfaŋi sárayi ná wuu funntanga sárayi ŋgwùŋi i,
yii pyìibii kà ŋkwɔ̀ mpa wuu wuubii pyi na nàzhan ɲyɛ pi á Kafooŋi i mɛ.
28 Wuu à li ta,
puru jwumpe fiige ká jwo wuu,
lire ɲyɛ mɛ,
wuu tùluge na canŋka,
wuu sí n-jà n-jwo na Kafooŋi sárayi tawwuge shi u ŋge wuu tulyeyi yʼà yaa.
Ku kayaani bà li ɲyɛ sárayi nizogoyi nà sárayi yabɛrɛ ŋwù mɛ,
ŋka ku pyi shéere yaaga wuu ná yii shwɔhɔlʼe.
29 Li ɲyɛ a sìi na ntîri wuu funŋʼi si ɲùŋɔ kyán Kafooŋi na si kàntugo wà u á si sáraya tawwugo yaa sárayi nizogoyi ná sùmaŋi sárayi ná sárayi yabɛrɛ ŋwù kurugo,
mà ta ŋke ku ɲyɛ Kafooŋi wuu Kileŋi vàanŋke bage yyaha yyére ke,
kuru bà mɛ.»
30 Sáragawwuŋi Fineyasi ná sùpyire yyaha yyére shiinbii ná Izirayɛli shiin kampwɔhii niɲyahamii pyɛnyi feebii pi mpyi ná u e ke,
tèni i pirʼà Urubɛn tùluge shiinbii ná Gadi woge shiinbii ná Manase woge niŋɛ taage shiinbii jwumpe lógo ke,
ka pi funɲyi si nta a ɲíŋɛ.
31 Ka sáragawwuŋi Eliyazari jyaŋi Fineyasi si jwo Urubɛn tùluge shiinbii ná Gadi woge shiinbii ná Manase woge niŋɛ taage shiinbilʼá:
«Wuu à tɛ̀ɛn ná lʼe niɲjaa na Kafooŋi na ɲyɛ wuu shwɔhɔlʼe,
ɲaha kurugo yɛ,
yii ɲyɛ a kapii pyi Kafooŋi na mɛ,
yii mú à pyi kaɲuŋɔ,
Kafooŋi ɲyɛ yaaga pyi Izirayɛli shiinbii na mɛ.»
32 Ka sáragawwuŋi Eliyazari jyaŋi Fineyasi ná yyaha yyére shiinbii si yîri Urubɛn tùluge shiinbii ná Gadi woge shiinbii táan Galadi kùluni i,
maa núrʼa kàre Kana kìni i Izirayɛli shiinbii sanmpiicyage e,
maa sà ɲcyii karigii puni yyaha jwo pi á.
33 Ka lire si Izirayɛli shiinbii sanmpiifunɲyi ɲíŋɛ,
ka pi i Kile kêe.
Pi sàha ɲyɛ a kàshige bégele Urubɛn tùluge shiinbii ná Gadi woge shiinbii mɛɛ na,
si pi kùluni kakyara mɛ.
34 Urubɛn tùluge shiinbii ná Gadi woge shiinbilʼà kuru sárayi tawwuge mɛgɛ le:
«Shéere».
Pi à jwo:
«Ŋke na ɲyɛ shéere wuu ná yii shwɔhɔlʼe mà li cyêe na Kafooŋi kanni u ɲyɛ Kile.»