Yuunusu 3

[Niniwenko tuubiye]

Tunka Duumanten| daalen ɲa da ta fillandin ŋa nan ti : 2 « Giri, daga Niniwe yi, debi dare ke, an nan gangundi a maxa ti gangundixanne be inke yinme gaa a koono an da ! » 3 Annabi Yuunusu giri kuŋa nan daga yi, xoyi Tunka Duumanten digaame. Niniwe xa ni debi dari konkonte ya, bito sikki yaalanŋe ya ni. 4 Yuunusu xenu deben yaalanŋen ŋa : koota baane yaalanŋe, a wa gangundini ; a wa tini : « Yere do tannaxate bito Niniwe wa felexitene ! » 5 Niniwe seron xosi toŋondi ti Alla yi, i da suumen gangu, na caakunyiraamun yetu, gelli i fo daru ma i fo maxaroxo. 6 Xibaaren joofe Niniwe tunkanyugon ŋa, a giri i taaxaaden ŋa, na i tunkanyiraamun boora bakka du yi, na caakun yetu, nan taaxu xamanxullen ŋa. 7 I da a gangu do Niniwe yi nan ti tunkanyugon do i seri darun ɲaamarindixannen ya ni, nan ti : haadaman do fonmuume, nan do tanmise, i n maxa temi muume, i n maxa nagaani, jin xa be ga ni, i n maxa a mini. 8 I na caakunun yetu, haadaman do fonmuume, i na Alla gangu xoteye maxa, sere su n saage bakka i killi buren do fo bure be a kitten gaa a yi. 9 Ko na a tu ma Alla wa fiidumaxanyillene, nan hinne, a na fintoxi gelli butiyi xoten ŋa, a ga nta o bonondini ?

10 Alla da i ɲangollen wari, nan ti i saage bakka i ɲangolli burun ŋa. Alla fiidumaxanyille bakka fo bure ke be a ga da a ɲanŋen koni i danŋa. A maxa a ɲa.