Yuunusu 2

[Annabi Yuunusu allanɲaageye]

Tunka Duumanten| da a ramuuru, kuudo ɲexi dinka na toni, Yuunusu ɲa ɲexe ke noxon ŋa wuru sikki do kiyu sikki. 2 Yuunusu bati Tunka Duumanten da ɲexe ke noxon ŋa, a Alla. 3 A jaabi :

« Tunka Duumante, gelli in gaa liixiyen ŋa furun noxo,

n xirindi katta an ŋa, an da in ɲumi,

n gangundi, an da in gangundixannen mugu.

4 An da in sedi jintinŋen ŋa, geejin butte,

wuran da in xufaari, an tellequn do an boxomansanun danmon su dangi in kanma.

5 Nke ken ti n xate gilli an yaaxon ŋa ya,

jaaxa in wa finna faayindini katta an batika sennen ŋa.

6 Jin da in fanama ma in yonkinkille,

jufoyen da in xufaari,

sokkun da in yinmen xaraasi,

7 n yanqa gidun xurudunmun ŋa,

ɲiiɲen da in ginbi ma abada.

Tunka Duumante, an da in yonki segendi bakka kunmen ŋa, n Alla.

8 N ga jikkirankuti in yonkin da,

n sinme Tunka Duumanten ŋa,

N batiyun daga katta an ŋa an batika sennen ŋa.

9 Ku beenu ga tigiti xafu duurun ŋa,

i da du kuma neeman ŋa.

10 Nke kuŋa, n ga da tekke be wutu ti tiigandixannen ŋa,

n wa a xurusini an da, na a tinmandi.

Kisiyen wa Tunka Duumanten da. »

11 Tunka Duumanten ɲaamarindi ɲexe ke maxa, a da annabi Yuunusu fica katta doŋan ŋa.