Yuunusu 1

Annabi

Yuunusu

[Annabi Yuunusu wuruye]

Biren ya ni biren ŋa Tunka Duumanten| ga daali Mattaayi renme danŋa nan ti : 2 « Giri, daga yi, debi dare ke ! An nan gangundi a maxa, nan ti i tooɲonden sege kiɲene in ŋa. »

3 Yuunusu giri nan ti i wa wurunu laatono Tunka Duumanten ŋa katta Tarisiisi yi, nan yanqa Yaafo yi, a da fuuren kita dagana Tarisiisi yi, a da a muson kini, nan yanqa fuuren ŋa kuudo nan daga do i batten ŋa Tarisiisi yi, gilli bakka Tunka Duumanten jon me naxan ŋa.

4 Tunka Duumanten xa da fanka xooren kara geejin kanma, nan ɲa dundu kasapen ŋa geejin noxo. Fuuren ɲa xoyi a gaa xose-xosene. 5 Sunbandaanon kanu. Sere su xaaru i raqen naxaanen ŋa katta i alla yi. I da yokku be gaa fuuren ŋa sedi geeji yi, kuudo nan newondindi i du maxa.

Yuunusu yanqa ma fuuren loxolonmen ŋa, a soxu nan xenqe, xenqon jupe. 6 Sunbandaanon yinmanken tinko a yi, nan ti a da : « Man ni an da xenqo yi ? Giri, an nan an alla xiri, ma sa o ken alla na hatte do o yi, o ga nta bonno. »

7 Sero ku ti me da : « Xa ri o na sokkun sedi, o na a tu ke bone sababun ga ni i be yi o danŋa. » I da sokkun sedi, sokken xenu Yuunusu yi. 8 I ti a da kuŋa : « A laxami o danŋa de, ke bone sababun ga ni sere be yi o danŋa. Anken gollen ni manne ? An gilli minne xa ? An jamaanen ni minne ? Anken ni kan xabiila yi ? » 9 A ti i danŋa : « Habaraaniganken ya ni in ŋa, nke kanna Tunka Duumanten ya yi, kanmun Kama, a be ga da geejin do doŋan dabari. » 10 Sero ku kanu kanuyi xoore, i ti a da : « Anken da manne xa ɲa ke yi kundu ? » Sero ku da a tu keeta nan ti a wuru Tunka Duumanten ya yi, baawo a da a laxami i danŋa. 11 I ti a danŋa : « O na man ɲaana an ŋa, geejin gaa sabarini bakka o kanma ? » Baawo geejin wa tallan buttu a wa dillinkene. 12 A ti i danŋa : « Xa da in wutu, xa na in fitta geejin ŋa, geejin na sabari gilli axa kanma, baawo in wa a tu nan ti, ke butiyi xoore be gaa axa kanma yi, a sababun ni inke ya yi. »

13 Sero ku sunbandi kuudo i na doŋan kita, xa i ma katu, baawo geejin wa tallan buttu nan dillinke i kanma.

14 I xaaru katta Tunka Duumanten ŋa, i ti : « Tunka Duumanten wo, maxa o bonondi ti ke sere yonkin ŋa, an nan maxa yonki senne jongi o yi. Anken ya ni Tunka Duumante, an ga da a xanu moxo be, an da ken ya ɲa. » 15 I da annabi Yuunusu wutu kuŋa, na a fitta geejin ŋa, geejin sigi gelli i jaagoyen ŋa. 16 Sero ku kanu Tunka Duumanten ŋa kanuyi xoore, i xurusindi Tunka Duumanten da, na tekkun wutu.