Yuusawu 18

[Xabiila ɲeri toxinto ku sokkiwutte]

danman su kafi me yi Silo na banba non ŋa. Jamaanen xenu i mareyen noxon ŋa. 2 Xabiilanu ɲeri toxo Banisirayilaganko yi, ku beenu ga ma i faabantaqun xallaaxu.

3 Yuusawu ti Banisirayilagankon da : « Ma kan bire ni axa gaa riini jamaanen ŋa na a xeyimaxakaraba, Tunka Duumanten ga da a kini axa yi, axa faabanu Alla ? 4 Xa da yugu sikki riiti bakka axa xabiila su yi, n na i xayi. I na giri na jamaane ke tera, na taqun safa i xabiilanun lanɲaran da, do i nan ri katta in ŋa. 5 I na a taxandi taxandu ɲeri. Yehuudakaarankon na toxo ti kutiyen ŋa ; Yuusufukaarankon xa na toxo ti saahelin kutiyen ŋa. 6 Axakun kuŋa, axa na jamaanen safa taxandu ɲeri, xa nan ri katta in ŋa yere, n na sokkun saxundi axa danŋa yere yi, Tunka Duumanten jon ŋa, o Alla. 7 Xa ganta, taqe nta ɲaana Leewikaarankon danŋa kafiini axa yi, baawo ikun taqen ni sadaxakiɲanden ya yi Tunka Duumanten da. Gaadikaarankon be ga ni, i do Rubeenikaaranko, ken do Manaasekaara taxande, ikun da i taqen yinme kita kinbakkan ŋa, dan ken kuta yi, Tunka Duumanten kome annabi Muusa ga da ke be kini i ya. »

8 Yugu ku giri nan daga. Yuusawu da dagaano ku ɲaamari i na jamaanen safa nan ti : « Xa daga, axa na jamaanen wura, axa na a safa nan saage katta in ŋa yere. N wa sokkun sedde axa danŋa Tunka Duumanten jon ŋa Silo yi. » 9 Yugu ku daga, nan kutundi jamaanen maxa, na a taxandi debun jaaten ŋa, taxandu ɲeri, na a safa safaderen ŋa, nan ri katta Yuusawu yi daaxan ŋa Silo. 10 Yuusawu da sokkun sedi i danŋa Tunka Duumanten jon ŋa Silo yi, na jamaanen taxandi Banisirayilaganko danŋa i taxandimoxon ŋa.

[Beniyamiina taqikutiye]

11 Beniyamiinakaarankon sokken wuti ti i fonlaqen lanɲaran ya, i taqikutiyen wa bakka Yehuudakaarankon do Yuusufukaarankon naxan ŋa. 12 Saahelinkitten ŋa, i gingen da a wutu gelli Yaradefanŋe, nan sege katta Yeriiho gidinkunken ŋa gelli saahelin banŋe, nan sege gidinjamaanen ŋa kinxenna, a xenpan ɲa Beeti-weeni gunjuran ya yi. 13 Gingen kare gilli Luuja yi non ŋa, Luuja gidinkunken ŋa banboxu, i gaa a xilli Beeti-yeli. Ginge ke yanqa Hatirooti-daari yi giden kanma, ke be gaa Beeti-horoona wureedun banboxun ŋa. 14 Ginge ke sele nan fananfane kinxennan ŋa taŋeene banboxu gelli gide ke be gaa Beeti-horoona jonkonmen ŋa banboxu. A xenpan ɲa katta Xiriyaata-baali ya, ken ga ni Xiriyaata-yarimi, Yehuudakaarankon debe. Ku ni kinxennan raqen ya. 15 Banboxun raqen ŋa, a wa gilli Xiriyaata-yarimi fataama, nan bogu kinxennan gingen ŋa nan daga katta Nefutooha waranlaqen jinyaaxon ŋa. 16 Ginge ke wa yanqana katta gide be gaa Beni-hinnoomunxoole kanbe be gaa Lefaayigankon guufuren saahelin ŋa. A yanqa gilli Hinnoomunxoole yi ma Yebuusingide kunken ŋa banboxun banŋe, nan yanqa Heeni-rogeli yi. 17 A goori saahelin ŋa nan bogu katta Heeni-semesi, nan bogu katta Gelilooti be gaa Dumiimu segendan jonkonmen ŋa, nan yanqa katta Rubeeni dibakke Bohaana gidindungan ŋa. 18 A kare katta saahelin kitten ŋa, Haraaba jonkonme, nan yanqa Haraaba yi. 19 Ginge ke kare katta Beeti-hogola gidinkunken ŋa saahelin banŋe. Ginge ke xenpan ɲa katta Sapinxaare neenen ya yi saahelin ŋa, katta Yaradefanŋe karen ŋa, banboxun banŋe. Ke ni banboxun gingen ya. 20 Kinbakkan kutan ŋa, Yaradefanŋe ya n gingini a yi. Ku do i yoorindan su ni Beniyamiinakaarankon taqen ya, i fonlaqen lanɲaran da.

21 Beniyamiinakaarankon fonlaqen lanɲaran debun ɲa : Yeriiho, a do Beeti-hogola do Hemexeci 22 do Beeti-haraaba do Semuriimu do Beeti-yeli, 23 a do Wiimu do Paara do Hofaara ; 24 Kefaari-hamooni, Hofini, Geeba : debu tanmi do fillo do i debinlenmu. 25 Gibooni, a do Raama do Berooti, 26 a do Micipe do Kefiira, a do Moca, 27 a do Lexeemu do Yiripeela, a do Taraala, 28 a do Seela do Heleefu do Yebuusikaarankon [debe] (ken ga ni Yerusalaamu), Gibeeya, Xiriyaata-yarimi : debu tanmi do naxato do i debinlenmu. Ku ni Beniyamiinakaarankon taqen ya, i fonlaqen lanɲaran da.