Yuusawu 17

[Manaasekaara kutten taqikutiye]

Manaasekaarankon taqikutiyen faayi, ke ya ni Yuusufu sooman ŋa. Maxiiri xa ni Manaase sooman ya, Gilaadi faaba ya ni. Gilaadi do Basaani ɲiiɲen ɲaŋi aken da, baawo kurayugon ya ni. 2 Manaase renmun kuttun xa taqen ɲaŋi i da, i fonlaqen lanɲara : Habijeerilanko, Heleexilanko, Hasiriyelilanko, Sixemulanko, Heferelanko, a do Semiidalanko. Ku su ni Manaase ren yugun ya, Yuusufu renme, i fonlaqen lanɲara. 3 Manaase renme Maxiiri renmen ya ni Gilaadi, ken renmen ni Hefere, Hefere renmen ni Selofaadi. Ken Selofaadi ma ren yugo kita, ren yaxarun ya n ɲi a maxa, a ren yaxaru ku toxonun ya faayi ku : Mahala do Noowa, Haagila, Milika, a do Tirica. 4 I kiɲe sadaxakiɲandaana Lajaari do Nuunu renme Yuusawu yi, a do yinmanko, nan ti : « Tunka Duumanten da Muusa ɲaamari a na taqe kini o yi o waaxinun noxon ŋa ! » I da taqe kini i ya Tunka Duumanten ɲaamariyen kanma yi, faaben waaxinun noxon ŋa. 5 Kutiyu tanmi xenu Manaasekaarankon ŋa, a ga feti Gilaadi do Basaani jamaane be gaa dan ken kuta yi. 6 Berini Manaase ren yaxaru ku da taqe kita a ren yugu ku noxon ŋa ya. Gilaadi jamaane ke kuŋa, Manaase renmun kuttun ya fo ni.

7 Manaase gingen wa wuttu Haseeri yi katta Miximeeta be gaa Sixemu jonkonme, nan taŋe katta Heeni-tapuuha taaxaanon ŋa banboxun kitte. 8 Tapuuha jamaanen ɲa Manaase ya xalle yi, nan giri Tapuuha deben ŋa katta Manaase ginge ke, Hefarayimukaarankon ya fo ni. 9 Ginge ke yanqa Xana waranlaqen ŋa. Waranlaqe ke debun ni Hefarayimu ya fo yi Manaase debun noxon ŋa. Manaase gingen ni gelli waranlaqen saahelin ya, a karen ɲa geejin ya yi. 10 Banboxun ni Hefarayimu ya fo yi ; saahelin ni Manaase ya fo yi ; geejin ni gingen ya yi. I do Haseeri wa kariini me yi gelli saahelin ŋa, kinbakkan ŋa a do Yisaxaari. 11 Manaase da Beeti-saani do i debinlenmun kita ti Yisaxaari do Haseeri ya yi, ken do Yibulaamu do i debinlenmu, do Dooro taaxaanon do i debinlenmu, Heeni-dooro taaxaanon do i debinlenmu, Tanaaxi taaxaanon do i debinlenmu, Megido taaxaanon do i debinlenmu, sikkande ke ni Dooro tintiŋon ya. 12 Ayiwa Manaasekaarankon ma katu ku debu kundu foyaaxunu ; Kanaanagankon ya n finna taaxunu ku ɲiiɲo yi. 13 A ri keeta senbekite, i da Kanaanaganko soxokomaaxu, xa i ma katu i girindini.

14 Yuusufukaarankon digaamu Yuusawu danŋa nan ti : « Manne saabu da ni an ga da kutiyi baane ya kini oku yi faabantaqe ? O xa jaman gaben ya ni, Tunka Duumanten da o barekindi ma lenki ke koota. » 15 Yuusawu ti i da : « Ayiwa, an jaman gaben ya ga ni, sege roono xoroban ŋa kuŋa, an na sagandi Perijinun do Lefaayigankon jamaanen ŋa, baawo Hefarayimu gidinjamaane ke nan roxa an da. » 16 Yuusufukaarankon ti a da : « Gidinjamaanen nta oku bakka, hari ken ga fe, Kanaanaganke su gaa taaxunu guufure ke yi, mexengajanwotoronun wa i maxa, ken do ku beenu gaa Beeti-saani, i do i debinlenmu, nan kafi Yijireeli guufuren taaxaanon ŋa. » 17 Yuusawu da a ko Yuusufukaarankon da kuŋa : Hefarayimukaarankon do Manaasekaaranko, nan ti : « Jama xooren ya ni an ŋa ; fanka xooren xa wa an ŋa ; anken sokkun nta ɲaana baane yi tannu. 18 Ganta gidinjamaane ke wa ɲaana an da, xoroban ga ni do i fi su, an na a saga, a fataaman su na ɲaŋi an da. An na a foyaaxu Kanaanaganko maxa, hari mexenwotoronun gaa i maxa, senben gaa i ya do i fi su. »