Yuusawu 10

[Yuusawu niyinde Hamoorinun kanma]

Yerusalaamu tunkanyugo Dooni-sidiixi da a mugu nan ti Yuusawu da Haayi raga, na a buruxa, xoyi a ga da Yeriiho do i tunkanyugon ɲa moxo be ; a da ken ya ɲa Haayi do i tunkanyugon ŋa, nan ti xadi Isirayila da kisiye laayidun tafu i do Gibooninkon naxa, i taaxu i noxon ŋa. 2 I kanu moxo siri, baawo Gibooni ni debi xoore ya yi, xo tooridebu ku du baananbe, a nan fuŋu Haayi ya, a yugon xa su ni kuranlenman ya yi. 3 Yerusalaamu tunkanyugo Dooni-sidiixi da faaren xayi Heburoona tunkanyugo Hoyaamu yi, a do Yarimuuti tunkanyugo Piraamu, a do Laxiisi tunkanyugo Yaafiya, kafiini Giloona tunkanyugo Debiiri yi, nan ti i da : 4 « Xa sege katta in ŋa, o na Gibooni gaja, baawo i da me jamun laayidun tafu i do Yuusawu do Banisirayilaganko naxa. » 5 Hamoorikaarankon tunkanyugun karagi kafi, nan sege : Yerusalaamu tunkanyugo, Heburoona tunkanyugo, Yarimuuti tunkanyugo, Laxiisi tunkanyugo, a do Giloona tunkanyugo. I do i kurun su ri yanqa Gibooni raqen ŋa, na a gaja.

6 Gibooni yugun da faaren xayi dagana a ko Yuusawu da daaxan ŋa Giligaali, nan ti : « Maxa an kitten bogu an komon wure, axa setu katta o yi jawoye yaaxe maxa, na o deema, na o kisi, baawo Hamoorikaarankon tunkanu beenu taaxunton gaa gidinjamaanen ŋa su kafi o gajanŋen xanne maxa. » 7 Yuusawu setu gelli Giligaali yi kuŋa, kuranlenmon jaman danman wa do a yi, kafiini kuranlen xoton su yi. 8 Tunka Duumanten daali Yuusawu da : « Maxa kanu i ya, baawo n da i ro an kitten ŋa, i yugo su ra nta sikki an kaane. »

9 Yuusawu da wuron xooro segene gilli Giligaali, nan ri juyintanware i kanma. 10 Tunka Duumanten da i kuren hawujandi Isirayila kaane, a da i sanpa Gibooni yi sanpandi xoore, a da i faraxatu do Beeti-horoona segendan killen ŋa, na i ɲamallexu, ma Hajeexa, ma Maqeeda. 11 I gaa wurunu Isirayila yi, i da du ɲi Beeti-horoona jipandan ŋa, Tunka Duumanten da i warandi ti gidi dinkanun ŋa gilli kanmun ŋa ma Hajeexa. Maramallingide ke ya n da i fo gabe kari diinanta Banisirayilaganko ga da fo be kari ti kaafan ŋa.

[Kiyen sikke]

12 Ke ni Yuusawu digaamen ya yi Tunka Duumanten da Banisirayilaganko jon ŋa, koota be Tunka Duumanten gaa Hamoorikaarankon roono Banisirayilaganko kittun ŋa :

« Kiye, sabati Gibooni kanma ! »

« Xaso, sigi Yaloona guufuren kanma ! »

13 Kiyen sabati, xason sigi, ma koren gaa i butte murana i xonnon ŋa. Ken safante nta Teleŋonten kitaaben ŋa ya ba ? Kiyen sigi kanmun naxaanen ŋa koota muuma me ; a ma keɲe roono. 14 A me ma ɲa ke koota kaane, a falle xa fe, Tunka Duumanten na seren digaamen mugu, baawo Tunka Duumanten yinme yan gaja Isirayila danŋa ! 15 Yuusawu saage riini daaxan ŋa Giligaali, Isirayila su wa do a batten ŋa.

[Hamoorinun tunkanyugun karagi karamoxo]

16 Tunkanyugu ku karagi wuru kuŋa, i wa muqu gidinkunmen ŋa Maqeeda yi. 17 I da a laxami Yuusawu da nan ti : « Tunkanyugu ku karagi kite muqu gidinkunmen ŋa Maqeeda. » 18 Yuusawu ti : « Xa da gidi dinkanun gulun-gulu katta gidinkunmen raqen ŋa, xa na yugu sigindi non ŋa na a tanga. 19 Xa maxa sigi, xa wuru do axa xonnon batten ŋa, axa na i falle kutu ; xa maxa i debun royen killen kini i ya, baawo Tunka Duumanten da i ro axa kittun ŋa, axa Alla. » 20 Yuusawu do Banisirayilaganko da i ɲamallexu, ɲamallexundi xoore, ma i nan ɲi i ɲamana. Firaanon firi bakka i ya, nan ro debi koorinton ŋa ti tagayinbinnun ŋa. 21 Jaman danman su kisinten yille katta Yuusawu yi daaxan ŋa Maqeeda yi ; sere neene ntaxa manexeene Banisirayilaganko fi yi. 22 Ken falle Yuusawu ti : « Xa da gidinkunme ke raqen wuɲi, xa na tunkanyugu ku karagi bagandi katta in ŋa gelli gidinkunme ke yi. » 23 I da ken ɲa, na ku tunkanyugu karagi kundu bagandi gidinkunmen ŋa katta a yi : Yerusalaamu tunkanyugo, Heburoona tunkanyugo, Yarimuuti tunkanyugo, Laxiisi tunkanyugo, a do Giloona tunkanyugo. 24 I gaa ku tunkanyugu kundu bagandini gidinkunmen ŋa katta Yuusawu yi, Yuusawu da Isirayila yugon su xiri, nan ti kurayugun yinmanko beenu gaa do a batten ŋa da : « Xa tinko, xa da axa taanun ro ku tunkanu kundu xannun kanma. » I tinko, na i taanun ro i xannun kanma. 25 Yuusawu ti i da : « Xa maxa kanu, xa maxa jooti, xa duruxoto, xa nan saako, baawo axa do xa xonne su ga na gaja, Tunka Duumanten na ke moxo kundu ya ɲaana. »

26 Yuusawu giri ken falle, a da i kari. A da i jongi yittu karagi yi. I toxo jongiini yittu ku yi ma kiyen xenne. 27 Kiyen xenuwaxatin ga ri, Yuusawu ɲaamarindi ti i na i yanqandi bakka yittun kanma, na i sedi gidinkunme ke be i ga ɲi muqu no, na gidi dinkanun ro gidinkunme ke raqen ŋa, ma lenki ke koota yinme xotte.

[Banboxun debun tunmi niyinde]

28 Ken koota yinme, Yuusawu da Maqeeda raga, na non sanpa ti kaafan neenen ŋa, na a do i tunkanyugon ɲamallexu, kafiini yonki su gaa non ŋa : firaana ma firi. A da Maqeeda tunkanyugon ɲa xoyi a ga da Yeriiho tunkanyugon ɲa moxo be. 29 Yuusawu da Maqeeda kutu katta Libina yi, do Libina nan gaja. Isirayila su wa do a yi. 30 Tunka Duumanten da i xa ro Isirayila kittun ŋa, a do i tunkanyugo. A da i sanpa ti kaafan neenen ŋa, kafiini yonki su gaa non ŋa ; kutte ma toxo no. A da a tunkanyugon ɲa xoyi a ga da Yeriiho tunkanyugon ɲa moxo be.

31 Yuusawu da Libina kutu, nan daga Laxiisi ; Isirayila su wa do a yi. A daaxe i raqen ŋa, do i nan gaja. 32 Tunka Duumanten da Laxiisi ro Isirayila kittun ŋa. A da non raga bita fillandin ŋa, na i sanpa ti kaafan ŋa kafiini yonki su gaa non ŋa, xo moxon maxa a ga da fo be su ɲa Libina yi. 33 Ken falle Gejeere tunkanyugo Horaamu setu kuudo na Laxiisi deema. Yuusawu da a sanpa a do i jama, ma moxon maxa kutte ga ma toxo i ya. 34 Yuusawu da Laxiisi kutu, nan daga Giloona ; Isirayila su wa do a yi. A daaxe i kanma nan gaja a maxa. 35 A da a raga ken koota yinme su, na a sanpa ti kaafan neenen ŋa, a do yonki su ga ɲi non ŋa. Ken koota, a da a su buruxa xo moxon maxa a ga da a ɲa Laxiisi yi.

36 Yuusawu sege gilli Giloona, Isirayila su wa do a batten ŋa, katta Heburoona, nan gaja i maxa. 37 A da a raga na a sanpa ti kaafan neenen ŋa, a do i tunkanyugon do i deben su, a do yonki be su gaa non ŋa ; kutte ma toxo i ya, xo moxon maxa a ga da fo be su ɲa Giloona yi. A buruxandi i maxa kafiini yonki su ga ɲi non ŋa. 38 Yuusawu saage katta Debiiri, nan gaja a maxa ; Isirayila su wa do a yi. 39 A da a raga na a tunkanyugon do i debun su raga, na i sanpa ti kaafan neenen ŋa. Yonkinte su ga ɲi non ŋa, a da i buruxa ; kutte ma toxo i ya. A ga da Heburoona ɲa moxo be, a da Debiiri do i tunkanyugon ɲa ken moxo ya, xoyi a ga da Libina do i tunkanyugon ɲa moxo be.

40 Yuusawu da jamaanen su ni : gidinjamaane, a do Negeba, gidintaanu, a do jipandanu, i do i tunkanyugun su ; kutte ma toxo i ya. Neegaanan su buruxe xoyi Tunka Duumanten ga ɲaamarindi moxo be, Isirayila Alla. 41 Yuusawu da i ni, gelli Xadesi-barineeya ma Gaaja, ken do jamaanen danma ma Gibooni. 42 Ku tunkanyugu do i jamaanun danmo, Yuusawu da i su raga ta baane, baawo Tunka Duumanten gaja Isirayila da, Isirayila Alla. 43 Ken falle, Yuusawu saage katta daaxan ŋa Giligaali, Isirayila su wa do a yi.