Yuusawu 11

[Saahelin gajanŋe]

Hacooro tunkanyugo Yabiine ga da ke mugu keeta, a da faaren wara katta Madoona tunkanyugo Yobaabu yi, ken do Simerooni tunkanyugo, a do Haxisaafu tunkanyugo, 2 ken do tunkanu beenu gaa gelli saahelin banŋe gidinjamaanen ŋa, a do Kinereetixaare ŋa Yaradenguufure yi, a do gidintaanu, a do Dooro tintiŋo gelli geejin ŋa, 3 kafiini Kanaanagankon ŋa kinbakkan do kinxennan ŋa ; Hamoorikaaranko, a do Heetiganko, a do Perijinu, a do Yebuusikaaranko, kun wa gidinjamaanen ŋa, Hiiwikaaranko, kun wa Herimoona [giden] wure, Micipe jamaanen ŋa. 4 I bogu kuŋa ; i kurun danmon su xa wa do i ya, jaman gabe, a gaboyen wa xo seyinfunsen gaa geejinxannen ŋa, ken do sin do gajanwotoron gabi-gabe. 5 Ku tunkanyugu kundu su sereti, nan ri daaxe Meroomu jin ŋa, kuudo do Isirayila nan gaja.

6 Tunka Duumanten daali Yuusawu da : « Maxa kanu i kaane, baawo xunbane dan ke dinma kundu, n wa i su baramanton kinni Isirayila yi. An na i siinun fallanɲiimun kutu, an na yinben ro i wotoronun ŋa na i buyi. » 7 Yuusawu, kafiini kuranlenman su yi ri do a batten ŋa, i ri i kanma Meroomu jinyaaxen di juyen ŋa, nan xenu i ya. 8 Tunka Duumanten da i ro Isirayila kittun ŋa. A da i sanpa na i xata ma Sidooni-xoore xa mene, ma Misirifooti-mayime, a do ma Micipe guufurunnoxon ŋa kinbakka. A da i ɲamallexu, ma bire be kutte ga ma toxo i ya. 9 Yuusawu da i ɲa xo Tunka Duumanten ga da ke be ko a danŋa : a da i siinun fallanɲiimun kutu, na yinben ro i wotoronun ŋa na i buyi.

10 Yuusawu saage ken waxati, na Hacooro raga ; a da non tunkanyugon sanpa ti kaafan ŋa. Ku kaane, Hacooro ya ni ku tunkaaxunu su toorideben ŋa. 11 I da yonki su ga ɲi non ŋa sanpa ti kaafan neenen ŋa, na i buruxa ; yonkinte su ma toxo non ŋa. Hacooro, i da yinben ro a yi na a buyi.

12 Ku tunkandebu danmon su, a do i tunkanun danmon su, Yuusawu da i raga, na i sanpa ti kaafan neenen ŋa, na i buruxa, xoyi Tunka Duumanten kome annabi Muusa ga ɲaamarindi moxo be. 13 Debu ku kun beenu su siginton gaa tintiŋon kanma, Isirayila ma i buyi, ganta Hacooro tannu, Yuusawu ga da a buyi. 14 Ku debu yokki bogunten su, a do naaburu siginte, Banisirayilaganko da a su wutu laxanloxonaabure yi. Yelleeni i da haadamarenmen ken su sanpa ti kaafan neenen ya, ma i gaa i su ɲamana ; i ma neegunte toxo. 15 Xoyi Tunka Duumanten ga da i kome Muusa ɲaamari, Muusa da Yuusawu ɲaamari ken ya yi, Yuusawu xa da ken ya ɲa. A ma dangi digaame yi Tunka Duumanten ɲaamarindixannun ŋa Muusa da.

[Yuusawu niyindu]

16 Yuusawu da ku jamaanu kundu su raga ke moxo ya : gidinjamaane, Negeba danma, a do jamaanen muuma, gidintaanun do Yaradenguufure, Isirayila gidinjamaanen do i gidintaanu. 17 Gelli Halaaxi gide be ga wurugi katta Seyiri, ma Baali-gaadi gaa Libaano guufurunnoxon ŋa Herimoona giden wure, a da i tunkanun su raga, na i sanpa, na i kari. 18 Bitanjaati gabe ya ni Yuusawu ga da a ɲa ku tunkanu kundu su gajanŋa. 19 Debe nta du yi, ke be ga kisi Banisirayilaganko yi, a ga feti Hiiwikaaranko ku gaa taaxunu Gibooni : ken ga fe, a su rage ti gajanŋen ya yi. 20 Baawo Tunka Duumanten da i buttun xotondi ya, kuudo i na gajanŋen xiri Isirayila maxa ; maana, i na buruxe, a ga feti neema gaa do i ya ; maana, i na buruxe xoyi Tunka Duumanten ga da annabi Muusa ɲaamari moxo be.

21 Yuusawu ri ken waxati yi na beenu gaa taaxunu gidinjamaanen ŋa gaja, a do ku beenu gaa Heburoona, Debiiri, Hanaabu, Yehuuda gidinjamaanen muuma, Isirayila gidinjamaane ; Yuusawu da a su do i debun buruxa. 22 Hanaaxiganke ma toxo Banisirayilaganko ɲiiɲen ŋa. Ganta Gaaja, a do Gaata, a do Sidoodo, fo toxo ku yi.

23 Yuusawu da jamaanen su raga xo moxo be Tunka Duumanten ga ɲaamarindi Muusa maxa, na a kini Isirayila yi xayimaxantafo yi, na a taxandi i naxa, i xabiilan lanɲara. Jamaanen kude.