[Gibooninkon laayidunlenmaaxu]
9
Ku ga mugi keeta,
tunkanu beenu su gaa Yaradefanŋe ken kuta yi gidinjamaanen ŋa, a do gidinta, kafiini geejinxannen taaxaanon ŋa, katta Libaano jon ŋa : Heetiganko, Hamoorikaaranko, Kanaanaganko, Perijinu, Hiiwikaaranko, a do Yebuusikaaranko, 2 i kafi me yi xan baane,
kuudo i do Yuusawu do Isirayila n gaja.
3 Gibooni¤ taaxaanon da a mugu Yuusawu ga da ke be ɲa Yeriiho do Haayi ya.
4 I xa da gotontaaxun ɲa :
na du yilla,
i da caaku xason ro i farun ŋa ;
reesenjinsumalli xaso,
i booxo-booxonto,
i betelanto ;
5 tepu xasi betelanton wa i taanun ŋa ;
lanburu xason wa i ya ;
i silifandanbuurun su kaawante,
dunŋu-dunŋen ya ni.
6 I daga katta Yuusawu do Isirayila yugun ŋa Giligaali daaxan ŋa,
i ti a da :
« Oku giri jaman laate ya yi.
Saasa ke,
xa da laayidun wutu o da. »
7 Isirayila yugun ti Hiiwikaarankon da :
« Axakun ra wa ɲaana oku noxon ŋa ?
O na laayidun wuttu an da mendu moxo ? »
8 I ti Yuusawu da :
« Oku na an komo ya.
» Yuusawu xa ti i da :
« Koonu ni axakun ŋa ?
Axa giri minne ? »
9 I ti a da :
« An komo ku giri jaman laate ya yi katta yere.
O da Tunka Duumanten,
an Alla toxon ya mugu,
a do a ga da fo be su ɲa Misira yi,
10 a do a ga da ke be su ɲa Hamoorikaarankon tunkanun filli be gaa Yaradefanŋe ken kuta yi,
kun ga ni Hesiboona tunka Sihoona,
a do Basaani tunka Wooga,
ken gaa Sitarooti yi.
11 O xirisun do o jamaanen muuman su ya n da a koni o da nan ti :
“ Xa da killen silifandan wutu,
xa nan daga gemu i ya nan ti i da :
‘ Oku ni axa komon ya.
’ ” Saasa ke,
axa na laayidu ɲaŋi o da.
12 O buurun ya faayi,
o gaa bakka o kaara yi koota be ya ni,
nan tere katta axa yi,
o ga da a katu.
Saasa a dunŋu-dunŋunten kaawanten faayi.
13 Ku reesenjinsumallu kundu,
o da i kurunbon ya faga,
i faayi ga booxe-booxe ;
o yiraamun do tepunu,
i su xaso killen laatoyi buren maxa. »
14 Banisirayilaganko ku xosi i silifandanu ku yogo wutu ;
i maxa hari Tunka Duumanten nenpi tirindi.
15 Yuusawu xosi kisiyen laayidun ɲaŋi i danŋa,
na bireyen laayidun wutu i da ;
xirisun xa nan sape xadi.
16 Ken laayidu tafunden falle bito sikki,
i da a mugu ti jaaxa Gibooninko ku beenu i ga da laayidun ɲaŋi i da,
nan ti i na i kaaran ya yi,
i taaxunton na i kaaran ya yi.
17 Banisirayilaganko janbandi,
nan ri i debun ŋa i bita sikkan koota.
I debun ni Gibooni ya,
a do Kefiira,
do Berooti,
a do Xiriyaata-yarimi.
18 Banisirayilaganko ma xenu i ya,
baawo xirisun sape i danŋa ti Tunka Duumanten toxon ya yi,
Isirayila Alla,
kafon toxo xirisu ku maxansefene keeta.
19 Xirisu ku su ti kafo ke kutten da :
« Oku sape i danŋa ti Tunka Duumanten toxon ya yi,
Banisirayila Alla :
saasa ke,
o ra ntaxa katiini i ya de.
20 O gaa fo be ɲaana i da ni ya :
o na i toxo bireene,
o ga sape i danŋa sapeye ke yi,
bonen nan maxa ɲaŋi o yi. »
21 Xirisu ku ti kafon da :
« I n toxo bireene.
» I ɲa suwasuwanŋaano do jixesaano yi kafon danman su da,
xirisu ku da a ko ke moxo ya.
22 Yuusawu da i xiri nan ti i da :
« Manne saabu da axa ga da o xaru nan ti o do axa laatun ya ni buru,
axa xa taaxunton na o kaaran ya yi ?
23 Saasa ke,
axa lange,
axa du baananbe ntaxa ɲaana fo wo fo yi kome falle,
suwanŋaano,
a do jixesaano in Alla kan da. »
24 I da Yuusawu jaabi nan ti :
« A laxami nan laxami an komo ku danŋa ya nan ti,
an Alla,
Tunka Duumante,
a da i kome Muusa ɲaamari nan ti a na jamaanen su kini axa yi,
axa na jamaanen taaxaanon su buruxa bakka du kaane.
O da ken ya mugu,
o yonkinun kanu axa kaane buru,
o da ke fi kundu ɲa.
25 Saasa ke,
o faayi an kitten ŋa :
ke be siren ga ni,
a teleŋonten ga ni an danŋa,
xa da ken ɲa o yi. »
26 Ke ya n ɲaŋi i da na i kisi Banisirayilaganko yi,
i ga ma i kari.
27 Ken koota,
Yuusawu da suwasuwanŋen do jixesiyen kini i ya kafon do Tunka Duumanten sadaxindinoqu ke be gaa riini sugandi da,
ma ke lenki.