Yuusawu 8

[Haayi buruxeye]

Tunka Duumanten daali Yuusawu da : « Maxa kanu, maxa jooti xa. Kuranlenmon su wutu kafiini du yi, axa nan giri nan sege katta Haayi yi. N da Haayi tunkanyugon ro an kitten ŋa, a do i jama, a do i debe, a do i jamaane. 2 An wa Haayi do i tunkanyugon ɲaana xoyi an ga da Yeriiho do i tunkanyugon ɲa moxo be. Ganta [ke kille], axa ra wa i naaburu juran do i naaburu siginten wuttu. An na juyimaxankuren wara deben ŋa ti falle yi. »

3 Yuusawu do kuranlenmon giri, kuudo nan sege katta Haayi yi. Yuusawu da tanjikke wujune yugo sagara, kurayugu xoto, na i xayi do wuron ŋa. 4 A da i ɲaamari ti : « Xa da a wari ! Axa nan daga deben falle, nan tugundi katta debe ke yi. Axa nan maxa laato bakka debe ke yi buru, axa danmon su nan tugundi. 5 Nke do jama ke be gaa do in ŋa wa tinkoono deben ŋa. I ga na bogu katta o yi xo ta fanan moxo, o na wuru i kaane. 6 I na xosi bogu do o batten ŋa, ma o ga na n da i laatondi deben ŋa, baawo i tini ya : “ I wuru o kaane xo ta fanan moxo. ” Oku kun wa wurunu i kaane [keeta]. 7 Ken bire ya ni keeta, axakun xa na giri muqu, axa na deben raga. Tunka Duumante, axa Alla, a wa debe ke roono axa kittun ŋa. 8 Axa nda debe ke raga, axa na yinben ɲa na debe ke buyi, Tunka Duumante digaamen ya ni axa gaa a ɲaana. N faayi ga da axa ɲaamari ke ya yi. »

9 Yuusawu da i deni, i daga muxura ke yi, i taaxu Haayi do Beeti-yeli naxa, Haayi kinxenna. Yuusawu wuyi jama ke noxon ŋa ken wuro yi. 10 Yuusawu furute gilli suxuban ŋa, nan daga bogu jaman ŋa. A sege katta Haayi ya, aken yinme do Isirayila xirisun wa jaman kaane. 11 I janbandi nan ri deben jonkonmen ŋa, nan yanqa Haayi saahelin ŋa, xoolen wa i do Haayi naxa. 12 Yuusawu da wujunu karagi yugo me wutu na i wara muqu Beeti-yeli do Haayi naxan ŋa, deben kinxenna. 13 Jaman daaxan su ɲa ke [daaxa] be gaa deben saahelin ŋa, a do deben kinxennan ŋa. Ken wuro yi, Yuusawu daga wuyi guufure ke noxon ŋa.

14 Haayi tunkanyugon ga da ken wari kuŋa, i furute jawoye, deben yugon su bogu, kuudo nan xirindi Isirayila maxa ti gajanŋen ŋa. Aken do i jaman su, nan sigi i gajallan ŋa Yaradenguufure jonkonmen ŋa, xa, a ma ɲi a tu ti janbayen wa ti i ya deben falle yi. 15 Yuusawu do Isirayila su wuru i kaane taŋeene gunjuran killen ŋa. 16 Yugo su gaa deben ŋa, i da a su xawula, kuudo nan fanpe do i ya. I fanpe do Yuusawunu yi kuŋa, na deben toxo. 17 Yugo ma toxo Haayi do Beeti-yeli yi, ke be ga ma bogu do Isirayila batten ŋa. I da deben wuɲinten toxo nan fanpe do Isirayila yi.

18 Tunka Duumanten daali Yuusawu da : « Gajanxedo ke be gaa an kitte ke yi ɲoomi katta Haayi ya, sabu n na a roono an kitten ŋa ya. » Yuusawu da gajanxedo ke be gaa i kitten ŋa ɲoomi katta debe ke yi. 19 Yuusawu ga da i kitten banba, muqaano ku giri i noqun ŋa karama, nan wuru riini deben ŋa, na a raga, na yinben ro deben ŋa, na a buyi. 20 Haayinko ga da i falle faayi, ma i yaaxen ga nta tiiden ŋa segene kanmun ŋa debe ke yi, firiye maxa ɲa ti kaara su yi. Ku ga ɲi wurunu telle gunjuran ŋa, i felexite do fanpandaanon ŋa. 21 Yuusawu do Isirayila su ga da a wari ti juyimaxankure ke da deben raga, tiiden wa segene bakka deben ŋa, i yille na Haayi seron sanpa. 22 Ku bogu deben ŋa kuudo nan gemu i ya. I ɲa Isirayila naxan ŋa, ku wa i da yere, ku wa i da dooke. I da i sanpa, ma kutte ga ntaxa toxo, sere su ma kisi nan firi xa. 23 I da Haayi tunkanyugo ke ken biranten ya raga, na a joofa Yuusawu yi.

24 Isirayila ga da Haayi taaxaanon su kari nan duguta bire be, noqu be i ga da i xata roono gunnen ŋa gunjuran noxo, kaafan neenen da a su xenundi ma i gaa ɲemeene. Isirayila su yille katta Haayi ya, na i sanpa ti kaafan neenen ŋa. 25 Yugon do yaxare, ken koota, wujunu tanmi do fillo ya n xenu, Haayi seren su. 26 Yuusawu ma i kitten do gaawallen saagandi (gilli) ɲoomini, ma i gaa Haayi taaxaanan su buruxana. 27 Debe ke naaburu siginten do a naaburu juran kuŋa, Isirayila da a wutu laxanloxonaabure yi du da, xo Tunka Duumanten digaame be, a ga da Yuusawu ɲaamari ti a yi. 28 Yuusawu da Haayi buyi, na a ɲa abadan kaajon ŋa, a gurujanten wa finna du yi ma ke lenki. 29 Haayi tunkanyugo ke, na a jongi yitten ŋa, ma kiyen xenne, yelleeni kiyen ga xenu, Yuusawu da i ɲaamari, i da a furen yanqandi bakka yitten ŋa, na a sedi bulunlaxaxooren fonlaqen ŋa, na gidindunga dinkanun sigindi a kanma, ma ke lenki ke koota kundu.

[Laayidukurunbaaxuye Heebali giden kanma]

30 Yuusawu da sadaxindinoqu taga Tunka Duumante Isirayila Alla da Heebali giden kanma. 31 Xo Tunka Duumanten kome Muusa ga da Banisirayilaganko ɲaamari moxo be yi, ken safanten gaa Muusa sariya safanten ŋa, Tawureeta noxo : sadaxindira gelli gidi kafumanta tinmanton ŋa, ku be mexenyokke ga ma gooli i maxa, na sadaxi a kanma Tunka Duumanten da, a do allatiigeyinsadaxa. 32 Yuusawu da Tawureeta safa gidun ŋa ken noqu yi ta fillandin ŋa, ke be Muusa ga da a safa Banisirayilaganko jon ŋa. 33 Isirayila danman su, a do i xirisun do i yinmanko, kafiini i kiitaanon ŋa, i sigi da ke kaara do ken kaara yi, Leewikaaranka ku jon ŋa, i ya ga ni Tunka Duumanten wutundaano, mukke xo debinlenma : a taxanden wa Gerijiimu giden jon ŋa, a taxanden wa Heebali giden jon ŋa xoyi Alla kome Muusa ga ɲi ga ɲaamarindi moxo be yi ti nan duwa Isirayila danŋa fina. 34 Ken falle, Yuusawu da sariyan su xara, a duwanŋen do a langande, xoyi a su safanten gaa Tawureeta kitaaben ŋa moxo be. 35 Digaame ma toxo Muusa ga da ke be ɲaamari, ke be Yuusawu ga ma a xara Isirayila kafon danman su jon ŋa, kafiini yaxarun ŋa, a do leminu, a do mukkunu beenu gaa bireene do i ya.