Yuusawu 7

[Haxanna do i koren yanganxataye]

kutandi kuteye yi roono haraamen ŋa : Jeera renmen ya ni Jabidi, ken renmen ya ni Karimi, ken xa renmen ni Haxanna, Yehuudakaarankon ya ni. Ken Haxanna da haraamen wutu. Tunka Duumanten butu Banisirayilaganko yi.

2 Yuusawu da yugu xayi gilli Yeriiho yi katta Haayi deben gaa Beeti-weeni kaaran ŋa, Beeti-yeli kinbakka, a da a koni i danŋa nan ti : « Xa sege, axa na jamaanen sonsolo. » Yugu ku sege na Haayi sonsolo. 3 I saage katta Yuusawu yi nan ti a da : « Jaman su nan maxa sege, wujunu filli ma sikko yugo me nan daga xenu Haayi ya tannu. Maxa jaman su tooro dagana, baawo i nan roxo. » 4 Wujunu sikki yugo me sege non ŋa gilli jama ke yi, xa i wuru Haayinkon kaane. 5 Haayinko yugun da tanjikke do yugu tunmi me kari bakka i ya, i wuru i kaane gelli bulunlaxa xooren ŋa, ma Sebariimu yi, na i kari yanqandan ŋa. Jaman buttun kanu ; i ɲa xo jinmulle.

6 Yuusawu da i yiraamun booxo i feten ŋa, na du sedi i taŋen kanma ɲiiɲen ŋa Tunka Duumanten jon ŋa, ma lelle, aken do Isirayila xirisu, na dulunqan ro i yinmun ŋa. 7 Yuusawu ti : « Aah ! N kaman Tunka Duumante, man xa n sigi an ga da ke jama karandi kutan ŋa, na o ro Hamoorikaarankon kittun ŋa, i na o buruxa ba ? Ken ke, yelli o gan n duŋe nan toxo Yaradefanŋe ken kuta yi tan ! 8 N Kama, n da an ɲaaga, Banisirayilaganko ga da i kofon koyi nan wuru i xonnon kaane, n na man koono ken falle ? 9 Kanaanagankon na a mukku ya, a do jamaane ke taaxaanon su, i na o ro naxangooren ŋa, na o toxon sankundi bakka jamaanen ŋa. An na man ɲaana an toxo dare ke da ? »

10 Tunka Duumanten daali Yuusawu da : « Giri ! Ke ni an danŋa manne, anken gaa du sedde an taŋen kanma ? 11 Isirayila da junuubun gollen ya golli, na in laayidun xa guruja, n ga da i ɲaamari ke be yi, nan saage na haraamen wutu, nan saage fayini xadi, nan yille a muxundini kafiini i yokkun ŋa xadi. 12 Banisirayilaganko ra nta sikki i xonnon kaane. I kofon ya koyini i xonnon kaane, baawo i halakinton ya ni. N ra nta ɲaana do axa yi axa ga ma haraame ke buruxa bakka axa du maxa. 13 Giri, an na jaman senondi. An nan ti : “ Xa da du senondi katta xunbane, baawo ke ni Tunka Duumante, Isirayila Alla daalen ya : ‘ Haraamen wa an maxa, Isirayila. An ra nta sikki an xonnon kaane, ma axa ga na haraame ke bogu du kaaran ŋa. ’ 14 Suxuban ŋa, axa xabiilanun wa tinkoono me yi. Xabiila be Tunka Duumanten ga na a raga, i fonlaqun na tinko me yi. Fonlaqe be Tunka Duumanten ga na a raga, a kaanu na tinko me yi. Ka be Tunka Duumanten ga na a raga, a yugun na tinko me yi. 15 I be ga na taagumanse ti haraame ke yi, a kaman wa buyini yinben ŋa, a do fo wo fo gaa a da. Baawo a da Tunka Duumanten laayidun ya guruja, na fi loxosonte ɲa Isirayila yi. ” »

16 Suxuban ŋa, Yuusawu furute, na Isirayila xabiilanun tinkondi me yi ; Yehuuda xabiilan rage. 17 A da Yehuuda xabiilan tinkondi me yi ; Jeera fonlaqen rage. A da Jeera fonlaqen yugun tinkondi me yi ; Jabidi ya n rage. 18 A da a kan yugun tinkondi me yi ; Haxanna ya n rage. Ken Haxanna ni Karimi renmen ya, Karimi ni Jabidi renmen ya, Jabidi ni Jeera renmen ya, Yehuudakaarankon ya ni. 19 Yuusawu ti Haxanna da : « In renme, tiigandi Tunka Duumanten da, Isirayila Alla, an nan darondindi a maxa, an na a laxami in da ; an ga da ke be ɲa, maxa fo wo fo muxundi in ŋa. » 20 Haxanna da Yuusawu jaabi nan ti : « Tonŋun tonŋu, nke ya n da Tunka Duumanten kuta, Isirayila Alla. Ɲangolle be n ga da a ɲa : 21 n da sinaarindoroko kallanŋunte ya wari kafiini laxalloxonaaburen ŋa, a do kame do tanmu do karago godoxulle, do kame do tannaxate do menqallu filli. N jaarabi do i ya, n da i wutu. I faayi buliini ɲiiɲen ŋa in tilliisen wure, xaalisixulle ke wa a wure yi. »

22 Yuusawu da faarun xayi, i wuru telle tilliisen ŋa. I muxunton faayi tilliisen wure, xaalisixulle ke wa a wure. 23 I da i wutu gilli tilliisen wure, na i riiti katta Yuusawu do Banisirayilaganko su yi. I da i jurumi Tunka Duumanten jon ŋa. 24 Yuusawu da Haxanna raga, Jeera renme, a do xaalisixulle ke do doroke ke, kafiini kanŋe ke tufullen ŋa, ken do a ren yugun do a ren yaxaru, a do a nan do a faren do a tanmise, kafiini a tilliise, a do fo wo fo ga na a xalle yi, [a da i su xooro,] a da i segendi Haxooro guufuren ŋa, Banisirayilaganko su wa do a batten ŋa. 25 Yuusawu ti : « Manne xa ni an tooran ga da o kiɲa ? Tunka Duumanten xa gan na an tooro ke lenki yi kundu ! » Banisirayilaganko su da a gididunwara. I da a su gididunwara ti gidun ŋa na i buyi. 26 I da gidinjurugalli xoore wara a kanma, ma lenki ke koota. Tunka Duumanten fiidumaxanyille gelli i butiyen ŋa. Ken ya saabu da, i ga da ken dingira noqu ke xiri « Haxooro guufure » ma lenki ke koota.