Yuusawu 6

[Yeriiho ragaye]

Yeriiho raqen ginbiini ya, a ginbinten xa ya n ɲi kaane : an nta roono an nta bakka. 2 Tunka Duumanten daali Yuusawu da : « In da Yeriiho ro an kitten ŋa, a do i tunka, do i kuralen xoto. 3 Axa na debe ke rawanga, kuren seren danman su, koota su axa na debe ke yoori ta baane, axa na a ɲaana kundun ya yi bito tunmi. 4  ɲeri na jaxandigibenbuutunu ɲeri wutu kaane. Bita ɲerundin ŋa, axa na deben yoori ta ɲeru, sadaxakiɲandaano ku na buutun tallan timi. 5 Bire be jaxandigibenbuutun ga na wurugi xoyi moxon maxa, axa ga na buutun xannen mugu, jaman na xaaru, xaaruyi xoore, deben tagayun na xenu a wure. Jama ke, yugo su na sege ti i taŋon ŋa. »

6 Nuunu renme Yuusawu da sadaxakiɲandaanon xiri nan ti i da : « Xa da laayidunwaxanden wutu, sadaxakiɲandaano ɲeri na jaxandigibenbuutunun wutu Tunka Duumanten waxanden kaane. » 7 A ti jaman da : « Xa dangi axa na deben yoori, kuranlenmon nan ware Tunka Duumanten waxanden kaane. » 8 A ɲa xo moxo be Yuusawu ga da a ko jaman da : sadaxakiɲandaano ku ɲeri be ga da jaxandigibenbuutunun wutu Tunka Duumanten jon me naxa, i wa buutunun tinmi dagana ; Tunka Duumanten laayidunwaxanden wa i falle. 9 Kaanamaxankuren wa tereene buututimaanon kaane, fallamaxankuren xa wa tereene waxanden falle, buutun wa timiini.

10 Jama ke, Yuusawu da i gongo nan ti i da : « Xa maxa xaaru, axa xannen nan maxa mugi, digaame su n maxa bogu axa raqun ŋa, ma koota be in ga na ti axa da : “ Xa xaaru ! ”, axa na xaaru. »

11 Tunka Duumanten waxanden da deben kaaron yoori ta baane a ɲaamariyen kanma, nan ri daaxan ŋa, nan wuyi no.

12 Yuusawu furute suxuban ŋa, sadaxakiɲandaano ku xa da Tunka Duumanten waxanden wutu. 13 Sadaxakiɲandaano ku ɲeri beenu ga da jaxandigibenbuutunun ɲeri wutu Tunka Duumanten waxanden kaane, i janbandi, i wa tereene i wa buutun tallan tinmi. Kaanamaxankuren wa tereene i kaane, sapan wa tereene Tunka Duumanten waxanden falle, i wa buutunun tinmi tereene.

14 A bita fillan ŋa, i da deben yoori ta baane, nan saage daaxan ŋa. I da ke ya ɲa bito tunmi. 15 Bita ɲerundin ŋa, fajirin ga yingi, i furute debe ke yoorini, xo kun kooto kiiten moxo, taanu ɲeri. Ken ni ken koota ya yi tannu, i ga da deben yoori taanu ɲeri. 16 Ta ɲerundin ŋa, sadaxakiɲandaanon gaa buututimiini, Yuusawu ti koren da : « Xa xaaru, baawo Tunka Duumanten da deben kini axa yi. 17 Debe ke de ! A buruxeene Tunka Duumanten da ya, a do fo wo fo gaa a noxon ŋa. Ganta Lahaabu baane nan toxo bireene, sangaana yaxare ke, aken do fo wo fo su gaa do a yi i ka ke yi, baawo a ya n da o faaru be o ga da i xayi muxundi. 18 Yelleeni xa na du tanga haraamen ŋa, xa kanu haraamen ŋa, xa nan maxa Isirayila daaxan sobindi ti haraamen ŋa, axa gaa a bonondini. 19 Xaalisin fo wo fo, a do kanŋe, a do boronsinyokku, a do mexe, xa da i sugandi Tunka Duumanten da, i roono Tunka Duumanten manankunmen ya yi. »

20 Jaman xaaru na buutunun timi. Bire be jama ke ga da buutun mugu, i xaaru xaaruyi xoore, tageyen xurufu xenne. Jama ke, yugo su sege ti i taŋon ŋa katta deben ŋa. I da deben raga. 21 I da fo wo fo gaa deben ŋa ɲamallexu ti kaafan neenen ŋa : gelli yugon do yaxare, gelli leminen do xirise, a do nan do tanmisen do fare. 22 Sero ku filli be ga da jamaanen sonsolo, Yuusawu ti i da : « Xa ro yaxarin sangaana ke kan ŋa, xa na yaxare ke bagandi non ŋa, a do fo wo fo gaa a maxa, xoyi axa ga sape a da moxo be. »

23 Fonnanxayi sonsolondaano ku ri, i da Lahaabu bagandi, a do faaben do saaxe, do waaxinu, a do fo wo fo gaa a da, a do sunpun do i xattin su, i bogu nan yanqa Isirayila daaxan falle. 24 Debe ke ken ke, i da yinben ro a yi na a buyi, a do fo wo fo gaa a noxon ŋa. Ganta xaalisi, kanŋe, a do boronsinyokku, do mexe, i da kun ro Tunka Duumanten manankunmen ŋa.

25 Lahaabu, sangaana yaxare ke, a do i faaba ka, a do fo wo fo gaa a da, Yuusawu da i toxo bireene. A wa taaxunu Banisirayilaganko kaaran ŋa hari lenki ke koota. Baawo a da Yuusawu ga da sonsolondaano beenu mullin xayi dagana Yeriiho yi muxundi.

26 Yuusawu langandi ken waxati yi nan ti :

« Yugo lange Tunka Duumanten jon me naxa,

ken be gaa gilli na ke debe taga, ke Yeriiho kundu,

A na jope ti a kaman sooman ŋa,

baafun na sigi a ren lagaren ŋa. »

27 Tunka Duumanten ɲi do Yuusawu yi, a toxon bange jamaanun su yi.