[Ren yaxarun taqe]
27
Ken falle Celofaadi renyaxarun ri. Ken Celofaadi faaba ya ni Hefere, Hefere faaba ni Gilaadi, Gilaadi faaba ni Maxiiri, ken Maxiiri faaba ni Manaase. Manaasekaarankon fonlaqen ya ni, Yuusufu ya renme ni Manaase ke yi. Kun renyaxaru ya toxonun faayi ku kundu : Mahala, Noowa, Haagila, Milika, a do Tirica. 2 I taaxu Muusa do sadaxakiɲandaana Lajaari wure gemmanlenmaaxun tilliisen raqen ŋa, ken do yinmankon do jaman danman su, nan ti : 3 « Oku faaba kara na o toxo gunjuran ŋa, Xaaruuna jama ke be ga da me kafu na Tunka Duumanten gaja*, aken ma ɲi kapa kun ŋa. Xa, a xa kara ti i duran yango ya yi, ganta a ma renyugo toxo. 4 O faaba toxon buruxeene bakka i xabiilan ŋa kan moxo nan ti renyugo nta a maxa ? Xa da kutiye kini o yi o faaba waaxinun kutiyen noxon ŋa. »5 Muusa da i xibaaren kiɲa Tunka Duumanten ŋa. 6 Tunka Duumanten daali Muusa da : 7 « Celofaadi renyaxaru ku sefen ni tonŋun ya. An nan xawa i xallikutiyen kinni i ya xeye yi kafiini i faaba waaxinun xallikutiyen noxon ŋa ; i faaba xalli taqe ke yinme ya n xawa kiniini i ya. 8 An na a ko Banisirayilaganko danŋa xa, nan ti : “ Yugo nda kara a ga ma renyugo toxo, axa n xawa a xeyen kinni a renyaxarun ya yi. 9 Selli renyaxare xa ga nta a maxa, axa na a xeyen kini a waaxi yugun ŋa. 10 Waaxi yugo xa ga nta a maxa, ken bire axa na a kini a faaba waaxinun ŋa. 11 Selli waaxi ga nta faaben maxa, ken bire axa n xawa a kinni a sunpu tinke ya yi i xabiilan ŋa, a kaman na a xallaaxu. Ke ɲaana Banisirayilaganko danŋa farilan ya, xo Tunka Duumanten ga ɲaamarindi Muusa maxa moxo be. ” »
[Yuusawu sikke Muusa batten ŋa]
12 Tunka Duumanten daali Muusa da : « Sege dagana Bariimu ke gide yi. N gaa ɲiiɲe ke be kinni Banisirayilaganko yi, an na a faayi. 13 An ga na a wari bire be, an wa dagana kafi an seri fanon ŋa, xo Haaruna ga daga kafi i seri fanon ŋa moxo be. 14 Baawo bire be jaman ga muruti in kanma Siini gunjuran ŋa Meriba yi, axa xa da in digaamen kuta, axa ma in senontaaxun bangandi i jon me naxa. Ken ni Meriba jinyaaxe ke ya, a gaa Xadesi yi Siini gunjuran ŋa. » 15 Muusa jaabi Tunka Duumanten da : 16 « Tunka Duumante, fateganken su yonkin kama, ma an ga da sere sugandi na a ro jama ke yinmen ŋa, 17 i gaa royinanbakka do ke be batten ŋa, a gaa i geesunu dagana, a gaa i geesunu riini, ken ŋa Tunka Duumante, an jaman nta ɲaana xo tanmiso be nagaana ga nta i ya. »
18-19 Tunka Duumanten saage daalini Muusa da nan ti : « Nuunu renme Yuusawu wutu, yugo ke be yonki ŋalinten gaa a yi, an na a sigindi sadaxakiɲandaana Lajaari do jaman danman su jon ŋa. An na an kitten saxu a kanma, na sigan kini a yi i jon ŋa. 20 An na an dankan yogo ro a yi, ken ŋa Banisirayilaganko jaman danman na a terinka. 21 A na sigi sadaxakiɲandaana Lajaari jon ŋa, aken Lajaari ya na Tunka Duumanten tirindini Yuusawu da ti Wuriimu¤ yi. Aken Yuusawu do Banisirayilaganko jaman danman su, i bakka nan daga Lajaari ya ɲaamariyen kanma ; i yillene nan ri ro a ya ɲaamariyen kanma. »