[Jaarabiye do Mowaaba yaxarun ŋa]
25
Banisirayilaganko bibire Sitiimu yi, xa jaman jope jeenini do Mowaabanko ren yaxarun ŋa, ma i gaa xuubene. 2 Kun yaxaru da jama ke xiri i munonun musundon ŋa, jaman da musundo ke yiga nan sujudi i munonu ku jon ŋa. 3 Isirayila da du ro Baali-poora xallankacen ŋa kundu ya yi, Tunka Duumanten xosi butu a wure. 4 Tunka Duumanten daali Muusa da : « Jama ke yinmankon su raga, an na i xandunlogga kiyen ŋa Tunka Duumanten jon ŋa, kuudo Tunka Duumanten butten yanganxata xooren na yille bakka Banisirayilaganko yi. » 5 Muusa ti Banisirayilaganko kiitaanon da : « Axa du baananbe su na i yinme seron kari, ku beenu ga da du ro Baali-poora xallankacen ŋa. »6 Muusa do Isirayila jaman do wuyen gaa me yi genmanlenmaaxuntilliisen raqen ŋa, ma Banisirayilaganke yogo do Mediyaananka yaxaren riyinten faayi ke yi i waaxinun ŋa. Muusa do jama ke su da ken wari. 7 Pinaasi ga da ken wari, a giri sigi jama ke noxon ŋa, na bundanŋen wutu i kitten ŋa. Pinaasi ke ni Haaruna renme Lajaari ya renme yi, sadaxakiɲandaanan ya ni. 8 A da Banisirayilaganke ke do yaxare ke batu ma tilliisen noxo, a da i filli su sufa ma yaxaren gijinmen kanma. Taawoone be ga xanu Banisirayilaganko yi xenpe ken ya yi. 9 Sere be haqen ga toxo kun fanko yi, ken ni tanpille do wujunu naxati sere (24 000) ya. 10 Tunka Duumanten daali Muusa da : 11 « Pinaasi, ken ga ni sadaxakiɲandaana Haaruna renme Lajaari renme ke, a da in yanganxata xaxacen yillandi bakka Banisirayilaganko yi, a ga da in suuxuyen suuxu in danŋa, na a toxo Banisirayilaganko noxon ŋa, ken ya saabu da ni, n ga ma in suuxukitten batu, na Banisirayilaganko buruxa. 12 Ken kuŋa, a ko a da : “ N faayi ga da laayidun wutu a da, xeerin laayidu. 13 A wa ɲaana aken yinme do i bonsonŋun su da. Ken laayidu wa sadaxakiɲanden sabatindini duumaye yaaxe maxa, na a sababu a ga da du sugandi suuxaana yi i Alla da, a ga xafarigeesimuuri Banisirayilaganko da. ” »
14 Banisirayilaganke ke be do Mediyaananka yaxaren ga kara doome, a toxon ni Simiri, Saalu renmen ya ni, Simoona fonlaqun du baananbe yinmanken ya ni. 15 Mediyaananka yaxare ke xa toxon ni Koojibi. Suuru ren yaxaren ya ni. Ken Suuru xa ni Mediyaana fonlaqun du baananbe yinmanken ya. 16 Tunka Duumanten daali Muusa da kuŋa : 17 « Xa xanu Mediyaanankon ŋa, axa na i gaja, 18 baawo ikun da xa gaja ti i feera feeranton ya yi, na axa loxoso do du yi ti Baali-poora batunden do Madiyananka yaxaren saqanlenmaaxun ŋa, ken yaxare ga ni Koojibi, Madiyananko yinmanken ren yaxare. Taawoonen koota yi, ken ya n kara do Baali-poora xibaarenŋa. »