24
Balaamu da a wari ti ke be gaa genme Tunka Duumanten ŋa, ken ni nan duwa Isirayila danŋa ya. A maxa daga ɲaagandi xo ta fano ku moxo, ganta a felexite ya, na i jon koyi gunjuran ŋa. 2 Balaamu da i yaaxon wutu, a da Isirayila wari daaxene, xabiila ti xabiila. Alla fanka sennen yanqa Balaamu yi. 3 A digaamu ti i suugen ŋa nan ti :« Booro renme Balaamu faarannaaxun ga ni ke be,
Yaaxa wuɲinten faarannaaxu.
4 Sere ke be gaa Alla daalen mukku, ken faarannaaxu.
Ke be Raniyaanan gaa wariyen ɲaana a da,
ke be ga sujudi, a yaaxon ga wuɲi. N ti de :
5 “ Yaaxuba wo, an tilliisun ga n faranpara,
an dingiranun xa yinme ga n faranfara, Isirayila !
6 I wa faayiini dagana xo fanŋen gaa boyini,
xo naaxon gaa boyini fanxannen ŋa,
xo yitti deri xallu, Tunka Duumanten ga da a lori,
xo yitti xooron gaa jinxannen ŋa.
7 A jin jingallun ŋaami nan xaara,
a soxoodin xumaari siri.
A tunka wurugi Hajaaji kanma,
a tunkaaxun wa tallan wurugiini.
8 Alla da a bagandi Misira,
gundunan senben wa a yi.
Sero be ga na a xoni, a wa i tonno,
na i xottun juri, na i saate faga ti i bundanŋu.
9 A saxu, a fuuti xo jarinte,
xo fonɲaate, ko na a girindini ?
I be ga duwa an danŋa, duwaawun nan ɲaŋi a da,
langanden nan xenu i be ga da an langa yi. ” »
10 Balaaxi butu Balaamu wure, a butu buru, nan ti a da : « N da an xiri ya ti an na in xonnon langa ! Ee ! An ta sikkandin ya faayi ke yi an gaa duwanŋa i da ! 11 Baawo kundu ya ga ni, giri bakka yere, an nan daga an jamaanen ŋa ! N ɲi ga ti in na an darono ya daroye xenpa, xa a faayi ! Tunka Duumanten da an kuma ken darontaaxu yi. » 12 Balaamu ti a da : « Xoyi an ga da faaru be xayi in ŋa, n ma a xullen ko i da nan ti : 13 “ Balaaxi ga na i ka ke haqen kanŋen do a xaalisin su kini in ŋa, n ra nta Tunka Duumanten ɲaamariyen sooxini, na xeeri, ma bone riiti ti in du yi. Tunka Duumanten gaa ke be koono, n na ken ya koono tannu ? ” 14 Ayiwa a siro ! Saasa ken ke, n wa telle in yinme seron ŋa, xa, yeli in na an xibaari ti ke jama gaa riini fo be ɲa an jaman ŋa kaane. »
15 A da i faarannaaxun kiɲandi ke moxo yi kuŋa :
« Booro renme Balaamu faarannaaxun ga ni ke be,
Yaaxa wuɲinten faarannaaxu.
16 Sere ke be gaa Alla daalen mukku,
Alla wuruginten gundon gaa a maxa,
Ke be Raniyaanan gaa wariyen ɲaana a da,
ke be ga sujudi, a yaaxon ga wuɲi. N ti de :
17 “ N yaaxen wa a yi, xa saasa fi fe,
n wa a laabana, xa tinkoye fe,
saane gaa segene gilli Yaaxuba yi,
tunkandokkon gaa bakka Isirayila yi,
a gaa Mowaabanko fentellun jurini,
na Seeti renmun su halaki.
18 Hedoomu na ɲa kittidufo yi,
Seyiri xa be ga ni i xonnen ŋa, a na ɲa kittidufo yi, xa, Isirayila na senbekite.
19 Niyindaana bogu Yaaxuba yi ;
ku be ga toxo deben ŋa, a na i buruxa. ” »
20 Balaamu da Hamaleexi wari xadi, a da faarannaaxun suugu ke moxo yi, ti :
« Hamaleexi, jamaanun fana !
Xa a lagarun ni gurujeyen ya. »
21 Saage a da Xeeninun xa wari, a da i faarannaaxun suugu ke moxo yi, ti :
« An dingiran yonkinten ni, an sonkan taaxunten wa giden kanma.
22 Xa ganta, yinben na ro Xaabila yi ;
Hasuura na an komaaxunu ma kan bire ? »
23 A da i faarannaaxun suugu ta lagaren ŋa ti :
« Woyili ! Ko n kisiini Alla ɲanfin ŋa ?
24 Jiidunfuurun faayi ku gilli Kiiti, i wa Hasuura kulaadini,
na Hebeeri kulaadi,
aken yinme wurunu katta i halakiyen ya yi. »
25 Balaamu saage dagana i jamaanen ŋa, Balaaxi xa daga i kaara.