23
Balaamu ti Balaaxi da : « Sadaxindinoqunu ɲeri taga in da yere yi ; an nan xosi in deema ti gunbunu ɲeri do jaxandigu ɲeri yi dubaane. » 2 Balaaxi da a ɲa xoyi Balaamu ga da a ko moxo be. I filli da gunbo do jaxandige sadaxi sadaxindinoqu su kanma. 3 Balaamu ti Balaaxi da : « Sigi an sadaxa xuruminte ke kaaran ŋa, in wa laatono fonne, ma Tunka Duumanten na in genmanlenmaaxu. A ga na fo be koyi in ŋa, n na an xibaari ti ken ŋa. » A daga do segendan banŋe.4 Alla da Balaamu genmanlenmaaxu, Balaamu ti a da : « N da sadaxindinoqunun ɲeri sigindi, na gunbo do jaxandige sadaxi i du baananbe su kanma. » 5 Tunka Duumanten da sefe ro Balaamu raqen ŋa nan ti a da : « Saage katta Balaaxi yi, an nan digaamu a da ke moxo yi. »
6 Balaamu saage katta Balaaxi yi, na a ɲi sikki i sadaxa xuruminten kaaran ŋa, kafiini Mowaaba seri xooren su yi. 7 A da faarannaaxun suugen suugu, a ti :
« Balaaxi da in riiti gilli Haraami yi,
Mowaaba tunkanyugo, na in xiri gilli kinbakkan gidun ŋa :
“ Yeli Yaaxuba langa in da !
Yeli Isirayila xajafi ! ”
8 Alla ga ma i be langa, nke xa na ken langana kan moxo ?
Tunka Duumanten ga ma i be xajafi, nke xa na ken xajafini kan moxo ?
9 Biren be in ga da i faayi giden kanma,
ma biren be in ga da i wari gidintonben ŋa,
N da jama wari i dura,
ayiwa a ma du do duna xabiila kuttun jaate baane yi.
10 Ko xa n katta Yaaxuba koren do a buqen¤ jaatene ?
Ken do Isirayila jaati gabe ?
Yelli inke yinme gan kalla teleŋonton kallen ŋa !
N lagarun do i xallen gan baanono ! »
11 Balaaxi ti Balaamu danŋa : « An da manne ɲaŋi in ŋa kundu ? N da an riiti ti an na in xonnon ya langa, an xosi duwa i danŋa ! » 12 Balaamu ti a da : « Tunka Duumanten ga da ke be ro in raqen ŋa, n ma xawa xenpeene ken ya yi ? » 13 Balaaxi saage tini : « Yeli do in batten ŋa noqu tana yi ; an gaa jama ke walla noqu be, an na i langa in da ti non ŋa, an yaaxen na i yogonu ya yi ti yere, an nta i su su walla ! »
14 A do a daga hacandan ŋa, Pisiga kanma. A da sadaxindinoqunu ɲeri taga, na gunbo do jaxandige sadaxi baane su kanma. 15 Balaamu ti a da : « Sigi an sadaxa xuruminte ke kaaran ŋa ; in wa dagana dugundi dooke. » 16 Tunka Duumanten ri katta Balaamu yi, na faarannaaxu ro a raqen ŋa, ken falle nan ti a da : « Saage katta Balaaxi yi, an sefene kundu ya yi. » 17 Balaamu saage katta Balaaxi yi na a ɲi sikki i sadaxa xuruminten kaaran ŋa, kafiini Mowaaba seri xooron ŋa. Balaaxi ti a da : « Tunka Duumanten da man ko ? » 18 Balaamu da i suugen wutu nan ti :
« Giri Balaaxi, an nan terinke !
An taron tugu, Cipooro renme !
19 Alla feti sere yi a gaa gaarana !
Sakkati haadamarenme a gaa fallanyillene !
Yaala a wa fo koono a ga nta a ɲaana ?
Ma na sefe ko a yaaxe nta bakka ?
20 N koome ti duwanŋen ya yi,
baawo a duwa, n nta ken faraaxunu.
21 A ma yango wari Yaaxuba yi,
a ma bonoye xa wari Isirayila yi.
A Alla wa do a batten ŋa, Tunka Duumante.
Tunkansoyiraqen ya na a yi.
22 Alla da a bagandi Misira,
Gundunan senben wa a yi.
23 Korote nta Yaaxuba ragana.
Dabare nta Isirayila ragana.
Alla gaa ke be dabarini,
A wa koniini Yaaxuba da i waxatin yinme yi,
Yabo, a wa koniini Isirayila da.
24 Jama faayi gilli xo fonɲaate,
a na sigi xo jarinte.
A nta saqa ma a ga na i tumujan yiga,
ma a ga na i xaɲefon foren mini. »
25 Balaaxi ti Balaamu da : « Selli hari an ga nta i langana ke, maxa duwa i danŋa ken ke ! » 26 Balaamu ti a da : « N ma a ko an da nan ti : “ Tunka Duumanten ga na fo wo fo ko, n na ken ya ɲaana ” ? »
27 Balaaxi ti Balaamu da : « Yeli kuŋa ! N na an deni dingira tana yi ; a me wa du, Alla na duŋe an gaa ke jama langana in da ti non ŋa. » 28 Balaaxi da Balaamu deni Pewoore kanma, non ni hacandan ya yi gunjuran ŋa.