[Banisirayilaganko daaxe Yeriiho kanma : 22 - 25]
[Balaaxi xirinde katta Balaamu yi]
22
Banisirayilaganko giri xadi nan daga daaxe Mowaaba napon ŋa Yaradefanŋe dan ken kaara yi, Yeriiho jonkonmen ŋa. 2 Cipooro renme Balaaxi da Banisirayilaganko fi ɲaŋinton wari Hamoorikaarankon ŋa. 3 Balaaxi do Mowaabanko jooti ke jama kaane moxoburu, baawo a gaben ya ni. I hawuje Banisirayilaganko kaane buru. 4 Mowaaba ti Mediyaananko xirisun danŋa : « Fo wo fo gaa o kaaron ŋa, ke soroba faayi a birintana ya saasa, xo nan gaa gunnen sokken birintana moxo be. » Ken waxati, Cipooro renme Balaaxi ya ni Mowaaba tunkanyugon ŋa. 5 A da faarun xayi Balaamu yi, Booro renme, a gaa i saaredeben ŋa Petooro yi, Furaatafanŋe kanma, i nan ti a da : « Soroba ya na o maxa yere, nan bogu Misira, na ɲiiɲen kanma faga : i faayi ga taaxu in raqen ŋa. 6 N da an ɲaaga kuŋa, an nan ri, na i langa in danŋa, baawo a n fuŋu in ŋa senbe yi, ma in na kati i niini na i xata bakka jamaane ke yi. Baawo in wa a tu an ga na sere be langa, a kaman wa bonno ; an ga na duwa sere be xa da, a kaman wa barekini. »7 Mowaaba xirisun do Mediyaana xirisun gaa ke be fallana woli ke yi, i da a falla a yi. I ga kiɲe Balaamu yi, i da Balaaxi digaamun kiɲandi a yi. 8 Balaamu ti i danŋa : « Axa wuyi yere, Tunka Duumanten ga na ke be koni in da, n na ken jaabi axa yi. » Mowaaba seri daru ku toxo Balaamu banŋe kuŋa. 9 Alla ri Balaamu yi nan daali a da : « Koonu ni ku sero beenu gaa an noqu ? » 10 Balaamu ti Alla da : « Mowaaba tunkanyugo, Cipooro renme Balaaxi, a ya n da faaren xayi in ŋa, ti : 11 “ Jama ke be ga bogu Misira yi, ken ya faayi ga da ɲiiɲen faga. Yeli kuŋa an na i langa in danŋa ; a me wa du in na kati i gajanŋa, na i xata. ” » 12 Alla daali Balaamu da : « Maxa daga do i batten ŋa ! Maxa ke jama langa xa, baawo a barekinten ya ni. »
13 Suxuban ŋa Balaamu giri, a ti Balaaxi serixooro ku da : « Xa saage dagana xa jamaanen ŋa, baawo Tunka Duumanten ma duŋe in walla dagana do axa batten ŋa. » 14 Mowaaba seri xooro ku giri nan saage katta Balaaxi yi. I ti a da : « Balaamu ma duŋe riini do o yi. »
15 Xa Balaaxi da sere deru tana xayi xadi, ke ta fillandi jaman ya n fuŋu jama fana ke yi, a ya n xalasinta a yi xa. 16 I ga ri Balaamu yi, i ti a da : « Cipooro renme Balaaxi sefexannen ya faayi : “ N da an xanjo, maxa bara riini in noqu ! 17 Baawo in wa daroyen saqa an ŋa, an ga na fo wo fo ko, n wa a ɲaana an da, yeli kuŋa, an na ke jama langa in danŋa. ” »
18 Balaamu da Balaaxi xidimaaano ku jaabi nan ti i da : « Balaaxi ga na kanŋen do xaalisixullen kini in ŋa, a gaa a ka ke fakka, n ra nta fon fo roxe ɲaana, ma a fo xoore, ke be gaa Tunka Duumanten ɲaamariyen sooxini, n Alla. 19 Axa xa n wuyi yere wuro ke yi kuŋa, nan dugu in na a tu ke be gaa Tunka Duumanten maxa na a ko in da xadi. » 20 Alla ri Balaamu yi wuron ŋa nan ti : « Ku sero ga ri na an xiri ya, sukke do i ya, an nan daga. Xa ganta, n ga na ke be ko an da, an na ken baane ya ɲaana. » 21 A suxuban ŋa, Balaamu giri, a da xirixen ro i fari yaxaren ŋa, nan daga do Mowaaba xirisun ŋa.
22 Xa, a ga daga do i ya, Alla butu. Tunka Duumanten maliikan xosi bereti a kaane na killen kutu. Balaamu wa taaxunu i fari yaxaren kanma, a yugunnanlenmun filli wa do a batten ŋa. 23 Fari yaxaren ga da Tunka Duumanten maliikan wari beretini killen ŋa, kaafan duuron ga a kitte, a sele roono ɲegemen ŋa. Balaamu da a katu roono killen ŋa.
24 Maliika ke xosi sigi killi misaane yi, yittun noxon ŋa, tageyu filli naxa. 25 Faren ga da maliikan wari xadi, a senbe tageyen ŋa. Balaamu tan ga liixi do tageyen ŋa, a yille faren katta xadi. 26 Maliika ke dangi a yi xadi nan daga sigi noqu liixinti-liixinte yi, a ra ga nta a goorini moxo su, tayen fe, noogen fe. 27 Faren ga da Tunka Duumanten maliikan wari, a xurufu Balaamu wure. Balaamu mome, na fare ke lipa ti guman ŋa.
28 Tunka Duumanten da fare ke sefendi, a xosi ti Balaamu da : « N da man ɲaŋi an ŋa, an gaa in katta ku taanu sikki ? » 29 Balaamu ti a da : « An da in roxo ya ; kaafa gan ɲi in kitten ŋa, ganpinsa in da an kari ! » 30 Faren ti Balaamu da : « Nke feti an fare be an ga sette a yi ya abada ? Xoyi ke moxo ni in demunafin ya yi katta an ŋa ? » A ti : « Aayi. » 31 Tunka Duumanten da faaran bogu Balaamu yaaxon ŋa, a da Tunka Duumanten maliikan wari baratini killen ŋa, kaafan buusunten gaa kitten ŋa. A sujudi na i taŋen ro ɲiiɲen ŋa. 32 Maliika ke ti a da kuŋa : « Manne saabu da ni saasa an ga da an fare ke katu ku taanu sikki ? An da a wari, nke ya n ri killen raga an ŋa, baawo ke kille ni inke maxa battaraaxun ya. 33 Fare ke da in wari, a da in goori taanu sikki. A ga n maxa in goori, n ɲi anken karini ya, n na aken toxo bireene. » 34 Balaamu ti Tunka Duumanten maliikan da : « N da yangon kita, baawo in ma ɲi a tu ti an ya n ɲi sikki in kaane kille ke yi. Saasa ke, selli ke terende ga nta an ŋa, n wa yilleene. » 35 Xa Tunka Duumanten maliikan ti a da : « Daga do sero ku yi, ganta, n ga na digaamu be koni an da, an nan maxa fo kafi i ya. » Balaamu sukke do Balaaxi seri xooro ku yi.
36 Balaaxi ga da a mugi ti Balaamu wa riini, a daga a gemundi Mowaaba deben ŋa, a gaa Harinooni waranlaqen gingen ŋa, gingen raqe. 37 Balaaxi ti Balaamu da : « Xoyi in ma seren gaben xayi an ŋa ta fanan ŋa na an xiri ? Manne an ga ma ri ? Sefe in ra nta an darono ya ba ? » 38 Balaamu ti Balaaxi da : « N faayi ga ri katta an ŋa sa, iyo keeta wo, yelli in ra wa fo koono ti in du yi ba ? Alla ga na sefe be ro in raqen ŋa, n sefene ti ken ya yi de. » 39 Balaamu sukke do Balaaxi yi, i kiɲe Xiriyaata-huuco. 40 Balaaxi da daaba xooron do tanmison bagandi sadaxa yi, na fo xayi katta Balaamu yi, a do seri xooro beenu gaa do a batten ŋa. 41 A yillankaran ŋa, Balaaxi da Balaamu riiti, na a segendi Bamooto-baalu yi, an ra gaa du toqo noqu be yi na Banisirayila jama ke yogo wari.