[Banisirayilaganko teguye]
21
Haraadi tunkanyugon taaxunten gaa Negeba yi, Kanaanaganken ya ni. A da a mugu nan ti Banisirayilaganko ro ti Tariimu killen ŋa. A gemu i ya na i gaja, na Banisirayilaganko yogonu kasorankaaxu. 2 Banisirayilaganko xosi tekken wutu Tunka Duumanten da, nan ti : « An ga na ke jama ro o kittun ŋa, ma o ga da a debun buruxa bogobogo. » 3 Tunka Duumanten da Banisirayilaganko mugu ; a da Kanaanaganko ro i kittun ŋa. Banisirayilaganko da i do i debun su buruxa. I da non xiri « Harima » [a wure ga ni « buruxande »].[Jaxawallinsamaqe]
4 I giri Hoori giden ŋa, na Xulunjuumufanŋen killen wutu. I da Hedoomu jamaanen goori. Xa jaman butten roxo killen ŋa. 5 I toxo fo koono Alla do Muusa da nan ti : « Mannen sigi axa ga da o segendi bakka Misira yi, ti o nan ri kara gunjuran ŋa ? Baawo yigande nta yere, ji nta yere. Ke battaranyigande do i tu su bogu o yi. »
6 Ken saabu da kuŋa, Tunka Duumanten da saman tooxinton janba i ya, i gaa i xinɲi. Ken da seri gabe kari Banisirayilaganko yi. 7 Jaman ri katta Muusa yi nan ti a da : « O ga da fo ko an do Tunka Duumanten da, o da junuubun kita. Tunka Duumanten ɲaaga, a na samaqen laatondi bakka o yi ! » Muusa ɲaage jaman da.
8 Tunka Duumanten daali Muusa da kuŋa : « Saman tooxinte dabari, an na a jongi torunten ŋa ; samaqen ga da sere wo sere xiɲi, an ga na ken faayi, an toqo bireene ya. » 9 Muusa da jaxawallinsamaqen dabari na a jongi torunten ŋa. Samaqen ga da sere wo sere xiɲi, an ga da jaxawallinsamaqe ke faayi, an toxo bireene.
[Girindinde katta Mowaaba]
10 Banisirayilaganko giri nan daga taaxu Wobooti. 11 I giri falle Wobooti, i daga taaxu Yee-bariimu gunjuran ŋa, Mowaaba jamaanen kinbakkan kuta. 12 I ga giri non ŋa, i daga daaxe do Jeredi waranlaqen ŋa, 13 nan giri non ŋa, nan daga daaxe Harinooni waranlaqen kuta baanen ŋa, ken gaa gunjuran kuttu gilli Hamoorikaarankon ɲiiɲen ŋa, nan ɲa Mowaaba do Hamoorikaarankon naxan gingen ŋa. 14 Ken ya saabu da a safanten gaa Tunka Duumanten gajankitaabun noxon ŋa :
Waheebu gaa Suufa jamaanen ŋa,
Harinooni xa do i waranlaqu,
15 do i jipandanu,
i gaa wurunu dagana Yaari deben banŋe,
nan ɲa Mowaaba jamaanen do Hamoorikaarankon gingen ŋa.
16 I giri non ŋa, nan kiɲe Beeragede. Ken gede noqun ya ni, Tunka Duumanten ga daali Muusa da, ti : « Jaman kafu me yi, n na jin kini i ya. » 17 Banisirayilaganko da ke suuge suugu kuŋa nan ti :
Toyi gede ! Xa da a suugu !
18 Xirisun gedi jaabante,
Hooron da gede jaaba ti i tunkandokkonun ŋa.
19 I giri gunjuran ŋa katta Mataana, nan giri Mataana katta Nahaleeli, nan giri Nahaleeli katta Bamooti. 20 I giri falle Bamooti, i daga xoole be gaa taŋeene Mowaaba yi, Pisiga gidun ŋa. Na an toxo ken gide tonben ŋa an wa gunjuran hacene dagana.
[Niyinde, Sihoona do Wooga kanma]
21 Banisirayilaganko da faarun xayi Hamoorikaarankon tunkanyugo Sihoona yi, nan ti a da : 22 « N wa a mulla nan bogu ti an jamaanen ŋa, o nta killen walla o gaa roono soxante yi, o nta roono reesengoore yi, o nta ji xa minni gedun ŋa, o na killi xoore ke ya ragana ma o ga n bogu an ɲiiɲen ŋa. » 23 Xa Sihoona ma duŋe Banisirayilaganko gaa bakka ti i ɲiiɲen ŋa. A da i jaman su kafu me yi na i bagandi nan gemu Isirayila yi gunjuran ŋa. A ga kiɲe Yahaca yi, a da gajanŋen kutu Isirayila yi. 24 Banisirayilaganko da a sanpa ti kaafan ŋa, na a jamaanen raga, na a wutu Harinooni waranlaqen ŋa, nan daga a wara Yaaboxo waranlaqen ŋa, ma Hamoonigankon ginge, baawo non gingen tanganta xoten ya ni.
25 Banisirayilaganko da a debun su raga, nan taaxu do Hamoorikaarankon debun do Hesiboona do i gundundebun su yi. 26 Ke Hesiboona kundu ni Sihoona toorideben ya. Hamoorikaaranko ku ke tunka Sihoona ya n da Mowaaba tunka xasen gaja, na a jamaanen su raga a yi ma Harinooni waranlaqen ŋa. 27 Ken ya saabu da ni suugaanon ga ti :
Xa ri o na Hesiboona taga,
o na a sigindi, Sihoona debi xoore !
28 Yinben giri Hesiboona !
Yinbinkuman giri Sihoona deben ŋa, na Yaari toni Mowaaba,
Harinooni dingira yinginton kamannu.
29 Woyili xenu an ŋa, Mowaaba !
Keemosi batijama Mowaaba, an bono !
A da a yugun ɲa wuraano,
Na yaxarun ɲa tunbaaru yi
Hamoorikaarankon tunkanyugo Sihoona da.
30 Xa o xa da i sufa ti bundanŋun ŋa.
Na a wutu Hesiboona katta Dibooni, a su ɲeme.
O da a su sella ma Noofa,
ma Meediba.
31 Banisirayilaganko taaxu Hamoorikaarankon jamaanen ŋa kundu ya. 32 Muusa da sero wara dagana koroosindi Yaajere yi, i da a do i debinlenmun raga. Hamoorikaaranko be ga ɲi non ŋa, Muusa da i xata.
33 I yille ken falle nan sege do Basaani killen ŋa. Basaani tunka Wooga do i jaman su bogu nan gemu i ya, kuudo na i gaja Yedeeri yi. 34 Tunka Duumanten daali Muusa da : « Maxa kanu a yi de, baawo in da i ro an kitten ŋa, a do i jaman su, kafiini a ɲiiɲen ŋa, an na a ɲa xoyi an ga da Hamoorikaarankon tunka Sihoona ɲa moxo be, ke taaxunten gaa Hesiboona. » 35 Banisirayilaganko da a do i renmun do i jaman su kari, na a jamaanen wutu xa. Hari yonki baane ma toxo bireene.