[Jin funtiye bakka giden ŋa]
20
Banisirayila jaman kiɲe Siini gunjuran ŋa xasu fanan ya, jaman daaxe Xadesi. Mariyaamu faati nan buli non ya.2 Ji ma ɲi jaman maxa no ; I da me mugu ti Muusa do Haaruna yi. 3 Jaman da Muusa gajanmuuru, nan ti : « Hari o xa gan kara dubaane xoyi o maarenmu ku ga kara daaxan ŋa Tunka Duumanten jon me naxa ! 4 Manne saabu da axa ga da Tunka Duumanten jaman riiti ke gunjura yi, ti o do o naaburun nan kara ? 5 Manne saabu da axa ga da o girindi Misira yi, na o riiti ke noqu maɲante yi ? Yere feti noqu yi soxoodi ra gaa tifiini : turo nta yere, reese nta yere, runmaani nta yere. Hari miniji nta yere. »
6 Muusa do Haaruna giri jaman ŋa, nan daga genmanlenmaaxuntilliisen raqe. I da du sedi bipi ɲiiɲen ŋa. Tunka Duumanten nooron xosi bange i da. 7 Tunka Duumanten daali Muusa da : 8 « Dokko ke wutu, an do an waaxi Haaruna na jaman kafu me yi. Axa nan sefe giden da jama ke siginten jon ŋa, a na i jin bagandi. An na jin funtindi bakka giden ŋa, jaman do i naaburun na mini. »
9 Muusa da dokko ke wutu bakka Tunka Duumanten jon ŋa tilliisen wure xoyi a ga da ɲaamariyen kita moxo be. 10 Muusa do Haaruna da jaman kafu me yi giden jon ŋa, nan ti i da : « Xa terinke de murutinto ku ! Yaala axa wa saqa a yi nan ti o ra wa jin funtindi axa danŋa bakka ke gide yi ba ? » 11 Muusa da i kitten do dokkon wutu na giden katu ta fillo, jin funti. Jaman mini, na i naaburun minindi.
12 Tunka Duumanten daali Muusa do Haaruna da : « Baawo axa ga ma saxu in ŋa, axa ga ma in senontaaxun tuyindi Banisirayilaganko yi, ken saabu da, n gaa jamaane ke be kinni i ya, axakun nta i rondini non ŋa. »
13 Ke jinyaaxe ni Meriba¤ ya, noqu ke be Banisirayilaganko ga da Tunka Duumanten gajanmuuru.* A da i senontaaxun bangandi i da non ya yi.
[Hedoomugankon balle Banisirayilaganko dangiyen ŋa]
14 Muusa da faaru girindi Xadesi yi, na i xayi katta Hedoomu tunkanyugon ŋa, nan ti a da : « An waaxi Isirayila ya n ti : “ O ga da xoteye su wari, an yinme wa a tu. 15 O faabanu ya n daga Misira yi, o da waxati gabe ɲa non taaxen ŋa, xa Misirankon da bonnen danben su ɲaŋi o do o faabanu yi. 16 O laxaraxaasa katta Tunka Duumanten ŋa, a da o mugu, a da maliikan¤ xayi katta o yi, ti a na o bagandi Misira. Saasa, o na Xadesi ya yi, debe ke be gaa an ɲiiɲen raqen ŋa. 17 Keeta ke, o na a mulla o n dangi ya de ; a ga nta an toorono, an na o wara o na bogu ti an jamaanen ŋa ! O nta roono soxante yi, o nta roono reesengoore yi. O nta hari axa gedun jin minni. O bakka do killinbutte¤ ke ya yi tannu. O nta seleene ti taye, o nta seleene ti nooge yi, ma o ga n bogu an ɲiiɲen ŋa. ” » 18 Xa Hedoomu ti a da : « An nta bakka ti in jamaanen ŋa, ken ga fe xa, n do kaafan na gemu an ŋa. » 19 Banisirayilaganko ti a da : « O tereene do killinbutten ya yi. Xa selli o do o naaburun ga na ji mini an da, o na a jonkon tuga an ŋa. O da fo baane ya muuru, ken ga ni dangiye. » 20 Xa ken do i fi su, Hedoomu ti : « Axa nta dangini ! » A do jaman do kuru xoora senbente bogu nan gemu i ya. 21 Hedoomu ga bara ke moxo yi Banisirayilaganko gaa bakka ti i jamaanen ŋa, Banisirayilaganko xa laato bakka i ya.
[Haaruna faatiye]
22 Banisirayila jama ke su giri Xadesi, nan joofe Hoori giden ŋa, a gaa Hedoomu jamaanen gingen ŋa. 23 Tunka Duumanten daali Muusa do Haaruna da ken noqu yi : 24 « Haaruna wa bakka axa yi, nan daga kafi i saaraanon ŋa, baawo in ga da jamaane be kini Banisirayilaganko yi, aken nta xawa roono. Ken ni a axa ga da in kuta Meriba jinyaaxen ŋa ya.* 25 An do Haaruna do i ren yugo Lajaari nan ri Hoori giden ŋa. An do i na sege. 26 An na Haaruna sadaxakiɲandiyiraamun bagandi a yi, na i rondi a renme Lajaari yi. Ken falle Haaruna na daga kafi saarannon ŋa. A faatini yere ya yi. » 27 Jaman su siginten jon ŋa, Muusa do i sege Hoori giden ŋa. Tunka Duumanten ga da Muusa ɲaamari moxo be, a da gollen dabari kundun ya. 28 Muusa da yiraamu ku bagandi Haaruna yi, na i rondi a renme Lajaari yi. Haaruna faati non ya yi, giden tonben ŋa.¤ Ken falle Muusa do Lajaari yanqa bakka giden ŋa. 29 Banisirayilaganko su da Haaruna bonnen tu, jama ke su da Haaruna wu tanjikke bito.