[Senondindijin dabariye]
19
Tunka Duumanten daali Muusa do Haaruna da : 2 « Tunka Duumanten sariyan farila be a ga ti an na a ko Banisirayilaganko da, i faayi ku : i na na yaxarin dunbe riiti katta an ŋa, a sahante ga ni, ke be leebu su ga nta a yi, xandunsolle ga ma demu roono a yi. 3 I na a kini sadaxakiɲandaana Lajaari yi, i do a na bogu daaxan ŋa, a na xurusi a jon ŋa. 4 Aken sadaxakiɲandaana Lajaari na a foro ku wutu ti i doronmen ŋa, na i sanpa katta genmanlenmaaxuntilliisen teŋon ŋa taanu ɲeri. 5 Na ke na buyi a jon ŋa : a fate, a tiye, a fore, do a nuxudufoonu, i buyini a jon ya yi. 6 Sadaxakiɲandaana ke na hereejinsollen wutu, a do fo dunbu xaxace, kafiini tulunbannen ŋa, a na i sedi roono yinben noxon ŋa, na i buyi kafiini na ke kutten ŋa. 7 Sadaxakiɲandaana ke na i yiraamun wanqi, a yinme na i faten wanqi, ken falle a na ri daaxan ŋa, xa, a sobinten ya n toqo ma futuro. 8 Sere be gaa na ke buyini, ken xa n xawa i yiraamun wanqini ya, na i faten xa wanqi. Xa a sobinten ya n toqo ma futuro.9 « Ken falle, seri senne na na ke xamon xooro, na i wara dingira senne yi daaxan falle. Kun taaxini Banisirayilaganko jama ke ya da, i gaa roono senondinjin ŋa. Ken ni futuxiyinsadaxan ya. 10 Sere ke be gaa na ke xamon kapa me yi na i xooro, a xa n xawa i yiraamun wanqini ya, xa a sobinten ya n toqo ma futuro. Ke ni abadanfarilan ya yi Banisirayilaganko kanma, a do i mukkunu beenu taaxunton gaa i noxon ŋa.
11 « I be nda kati haadamaren fure yi, an sobinten ya n toqo bito ɲeri. 12 A kaman nan xawa du senondini ti ken ji ya yi a bita sikkan koota, a do bita ɲerundin koota, ken bire ya ni a ga seno. Xa a ga ma du senondi bita sikkandi ke do bita ɲerundi ke yi su, a nta senoono. 13 Sere su nda kati haadamaren fure yi, an ga ma du senondi, an na Tunka Duumanten allanbatika yiranman ya sobindini. Ken sere n xawa kutiini bakka Isirayila yi ya, baawo senondindijin ma sanpe a kanma. A sobinten ya ni, a sobinten ya n toqo.
14 « Sariyanun faayi : sere nda kara tilliisen wure, sere su ga ro tilliise ke wure, ken do sere be ga ɲi tilliise ke wure, axa su sobinton ya ni bito ɲeri. 15 Yokke su raqen wuɲinten ya ga ni, texaade ga nta a kanma, ken sobinten ya ni. 16 Sere be i ga da a sufa ti nepen ŋa gunnen noxo, na a kari, ma a ga kara ti du yi kundun ya yi, ken do serixotte, ma walla xabura, an ga na kati ku yi, an sobinten ya n toqo bito ɲeri.
17 « Kuudo na ku seri sobinto senondi, sere ya na futuxiyinsadaxa ke xamajuron wuttu, na i ro ji biranten ŋa xolle noxo. 18 Ken falle seri senne na tulunbannen kingen wutu, na a deebi ji ke noxon ŋa, na a sanpa-sanpa do tilliisen ŋa, na a sanpa-sanpa do a yokken su yi. Sero beenu ga ɲi tilliise ke noxon ŋa, ken do ke kaman be ga kati serixotten ŋa, ma seri karinte ke, walla xa seri fure ke, ma walla xa sere ke be ga kati xaburan ŋa, a na a sanpa-sanpa kun xa kanma. 19 Ken seri senne n xawa jin sanpa-sanpana seri sobinte ke yi bita sikkandin do bitan ɲerundin ya yi. Bita ɲerundin ŋa, a na seno. Ken falle seri sobinte ke na i yiraamun wanqi, a yinme na wanqi, a senoono ken ya yi futuron ŋa. 20 Xa sere be sobinten ga ni, a ga ma duŋe du senondini, ken sere n xawa kutiini bakka i jaman ŋa ya. Baawo a da Tunka Duumanten tilliisi sennen ya sobindi ; senondindijin ma sanpe a kanma, ken kuŋa a sobinten ya ni.
21 « Ke ni abadanfarilan ya yi Banisirayilaganko kanma : ke be gaa senondindijin sanpa-sanpana, a na i yiraamun wanqi ; sere xa be nda kati senondindiji ke yi, an wa sobiini ma futuro. 22 Seri sobinten ga na kati fo wo fo su yi, ken fo xa wa sobiini, sere su ga kati a yi, ken kaman xa wa sobiini ma futuro. »