Jaatu 18

[Sadaxakiɲandaanon taqu]

daali da : « Keeta ke, garamajigingollu beenu gaa ɲaana axa maxa dingira senne ke yi, anken do an renyugun do an faabankan ya na i likken wuttu. Ganta, ku beenu gaa ɲaana sadaxakiɲanden noxon ŋa, an do an renyugun baane ya na kun garamajigingollu likkun wuttu. 2 An na an waaxinu ku xa tinkondi du yi tilliise ke yi, Leewikaaranko ku, kun ga ni an faabankaadunkoonu ku yi, i na kafi an ŋa, nan ɲa an deemandaano yi. Xa anken do an renyugu ku, axa ya n sikki seedaaxun tilliisen jon ŋa. 3 An faabankadunkoonu ku na koroosindi an da allanbatika yiranma ke gollun danman su yi, na a ɲi i nta tinkoono gemmanlenmaaxun tilliise ke yokkun do sadaxaxurumindifo ke yi, kuudo kallen nan maxa sere su kita, ikun do axakun. 4 I na kafi an ŋa gemmanlenmaaxun tilliisen koroosinden ŋa, tilliisen gollun su. Seri tanan nan maxa tinko axa yi. 5 Xa, axakun ya na dingira sennen do sadaxaxurumindifon gollu tiŋana, ken ya ni Alla butten yanganxatan na waase ragana. 6 An da a wari de, nke yinme ya n da an maaren Leewikaaranko ku sugandi Banisirayilaganko naxa, na i kini axa yi : i kini Tunka Duumanten ŋa ya, kuudo i na allanbatika yiranman koroosinden gollun dabari. 7 Anken do an renyugu ku, axa ya na sadaxakiɲanden gollun dabarini, a do fo wo fo su gaa taŋeene falle gollun ŋa, axa nan sigi ti i ya. N da sadaxinden gollun kini axa yi, axa gollen ya ni in ga da a kini axa yi. Seri tanan ga na tinko, a nan kara. »

8 Tunka Duumanten daali Haaruna da : « Haaruna, an da a wari de, nke yinme ya n da in taqun xaliifa an ŋa ; Banisirayilaganko gaa fo wo fo bagandini, an taqen ya ni. Nke ya fo ni in ga da a kini an ŋa, na a kini an renyugun ŋa xoyi an moxo, abadanfarilan ya ni. 9 Sadaxa senni sennu beenu ga ni an taqen ŋa, i ga nta buyini yinbe yi, i faayi : soxofonsadaxan su, a do yangonsadaxan do senoyinsadaxa be gaa bakka in da, kun ni sadaxa senni sennun ya, i wa ɲaana an do an renyugu da taqu yi. 10 Axa wa i yigana dingira senni senne yi. Yugun baane ya n katta a yigana ; fo sugandinton ya ni.

11 « An xallen ga ni fo tana be yi : Banisirayilaganko gaa sadaxa yigi-yiginto be kinni in ŋa, bakka i sadaxa kininten su yi, n da i kini an do an renyugun do an renyaxarun ŋa. Abadanfarilan ya ni ke yi. Be su sennen ga ni an ka ke yi, a kaman ra wa a yigana. 12 Te xayen fo sire, reesenji kurunban fo sire, a do yille, kun ya ni fateyifano be i gaa i kinni Tunka Duumanten ŋa, n da i kini an ŋa. 13 I jamaanen fateyifano be i gaa i kinni Tunka Duumanten ŋa, n da i su kini an ŋa. Be su senne ga ni an ka ke yi, a kaman ra wa a yigana.

14 « Banisirayilaganko ga da fo wo fo su sabatindi in da, ken xa wa axa da taqe yi. 15 Ren fanan xa su ni axa xallen ya, fo wo fo su gaa kiniini Tunka Duumanten ŋa, ren fanan ya ga ni, seron do daabanu, axa xallen ya ni. An na seren renyugu fanan ken maxawasana ya, a do daabanu be sennu ga fe. 16 An gaa n xawa renyugo ke be maxawasana, an na a maxawasana a saareye xasu fanan ya. Jonko be an gaa a koono a yi nan ɲa godoxullu sikki, dingira sennen godoxullen xiima, godoxullen ga ni tanpille garaamunu. 17 Ganta, axa ra nta nan do sugon do jaxen ren fanon maxawasana, i sugandinton ya ni. An na i foron tollini sadaxaxurumindifon kanma ya, na i kateyun xurumindi, i timen nan liŋi Tunka Duumanten da. 18 Tiyen ni axa xallen ya, xo gijinmen do togi tayi yigi-yiginten ga ɲa axa xalle yi moxo be. 19 Fo wo fo su Banisirayilaganko gaa a sugandini Tunka Duumanten danŋa bakka i sadaxa sennun ŋa, n da ken ɲa an do an renyugun do an renyaxarun da taqe yi. Ken ni abadanfarilan ya. A nta gurujeene an do Tunka Duumanten naxa, tafundi duumanten ya ni an do an bonsonŋun do i bonsonŋun da. »

20 Tunka Duumanten daali Haaruna da : « Anken nta faabankutiye kitta i jamaane ke yi, an nta duran taqe tana xa kitta do i batten ŋa. Nke ya n ɲaana an durantaqen do an durankutiyen ŋa Banisirayilaganko naxa. 21 Jakka su gaa kiteene Banisirayilagankon ŋa, n da a kini Leewikaaranko ku yi. N wa jakkan su kinni i ya faabanxaye yi i golli ɲaŋunton muson ŋa, ken ga ni gemmanlenmaaxun tilliisen gollu. 22 Ke moxo yi, Banisirayilaganko ntaxa tinkoono gemmanlenmaaxun tilliisen ŋa, i gaa yangon kitta, ken gaa ɲaana i saaten sababun ŋa. 23 Leewikaarankon ya na gemmanlenmaaxun tilliisen gollun tiŋana, i na i garamajigingollun likken tiŋa. Ikun nta faabankutiye kitana Banisirayilaganko noxon ŋa, ken ɲaana abadanfarilan ya yi axa bonsonŋun kanma. 24 Xa, Banisirayilaganko ga n xawa jakka be kinni Tunka Duumanten ŋa, n wa a ɲaana Leewikaarankon da faabanxaye yi. Ken ya saabu da in ga ti i nta faabankutiye kitta do Banisirayilaganko yi. »

[Leewikaarankon jakkan farila]

25 Tunka Duumanten daali Muusa da : 26 « An na a ko Leewikaarankon da : “ N ga da jakka be farilaaxun rakutu Banisirayilaganko kanma axa danŋa taqe yi, i ga na i kini axa yi, axa xa na i jakka Tunka Duumanten da, ken ni jakkamaxanjakkan ya. 27 Ke jakka wa jaatene axa maxa, xo soxofonsadaxo be axa gaa i wuttu bakka dugaanun do reesenji bollinton ŋa. 28 Ken moxo ya ni, axa gaa jakka su kita Banisirayilaganko yi, axa na Tunka Duumanten taqen wuttu bakka a yi, na a kini sadaxakiɲandaana Haaruna yi. 29 Fo wo fo gaa kiniini axa yi, axa na Tunka Duumanten taqi sennen wutu bakka a yi. ”

30 « An na ti i danŋa xadi : “ Axa ga na ke su fo siren wutu bakka a yi bire be Leewikaaranko, a kutten ni xo yilli soxonton do reesenji bollinton ya axa maxa. 31 Axa do axa kaadunkon na i yiga noqu su, baawo axa muson ya ni axa gollen batten ŋa gemmanlenmaaxun tilliisen noxo. 32 Axa ga na ku fo sennu wutu kundu, ken ŋa yango ntaxa xenne axa yi, axa gaa Banisirayilaganko jakka sennun loxosono, kallen gaa telle xenu axa yi. ” »