17
Tunka Duumanten daali Muusa da : 2 « A ko sadaxakiɲandaana Lajaari da, Haaruna renme ke, ti a na futaadinbeelunu ku bogu yinbinkuman naxaanen ŋa, baawo i sennun ya ni. Yinbinxoro be gaa futaadinbeelunu ku noxo, a na i sanqi telle noqu laate. 3 Ku sero be ga da i bireyen faraaxu yangon ŋa, i futaadinbeelunu ku nan tapi, na i ɲa mexenlafan ŋa, kuudo na i ɲa sadaxindinoqun¤ da xufa yi. I sennun ya ni, baawo i da i sigi Tunka Duumanten jon ŋa tilliisen raqe. I na ɲa taagumanse yi Banisirayilaganko da. » 4 Ku sero beenu ga buyi, sadaxakiɲandaana Lajaari da i futaadinbeelunun wutu, i da i tapi na i ɲa sadaxindinoqun da xufa yi. 5 Ke ni haqili yanqande ya Banisirayilaganko da, kuudo sere be ga feti Haaruna soxoodi, a na waase tinkoono Tunka Duumanten jon ŋa, ti i wa futaade tiidindini. Kuudo karamoxo be ga da Xaaruuna do i bajanlenmon kita, a me na waase ɲaana, ken ga ni karamoxo be Tunka Duumanten ga da a ko Haaruna da ti Muusa faarannaaxun ŋa katta a gaa ɲaana.[Banisirayilaganko me mukke]
6 A yillakaran ŋa, Banisirayila jaman do diganmisen taŋe Muusa do Haaruna yi nan ti i da : « Axa da Tunka Duumanten jaman kari ! » 7 Jaman ga da i yinmen faga Muusa do Haaruna yi, i taŋe allanbatikan ŋa, ma i yaaxen ga nta tabullen ŋa a kanma. Tunka Duumanten nooron bange. 8 Muusa do Haaruna daga allanbatikan raqen ŋa. 9 Tunka Duumanten daali Muusa da : 10 « Xa bogu ke jama noxon ŋa, n na i buruxa dubaane ! » Xa Muusa do Haaruna da du sedi bipi ɲiiɲen ŋa. 11 Ken falle Muusa ti Haaruna da : « An futaadinbeelon wutu, an na yinben ro a yi sadaxaxurumindifon ŋa, an na futaaden ro a yi, na a jawondi katta jaman ŋa, an na yanpeyimuuri i da, baawo Tunka Duumanten butten giri, taawoonen jope yinme. » 12 Haaruna da futaadinbeelon wutu xo Muusa ga da a ko a da moxo be, a do a ro jaman noxon ŋa. Xa ken da a ɲi taawoonen jope yinme du. A da futaaden ro a yi, nan yanpeyimuuri jaman da. 13 A sigi furun do biranton naxa, taawoonen xosi dangi. 14 Wujuunu tanmi do naxato do kamo ɲeri (14 700) sere ya n toxo taawoone ke yi, Xaaruuna do i bajanlenmon taqen nta ken ŋa. 15 Taawoonen dangi, Haaruna saage katta Muusa yi gemmanlenmaaxun tilliisen raqen ŋa.
[Haaruna dokkon funtiye]
16 Tunka Duumanten daali Muusa da : 17 « A ko Banisirayilaganko da ti, xabiila su na i dokkon riiti, i xirisen na a kini an ŋa. A wa gemme dokkonu tanmi do fillo. An na i dubaananbe su toxon safa i dokkon kanma. 18 An na Haaruna toxon safa Leewi dokkon kanma, baawo xabiila su xirisen ni dokko baane ya. 19 An na dokkonu ku saxundi gemmanlenmaaxun tilliisen wure, seedaaxun waxanden taŋon ŋa, n do axa gaa me ɲiini noqu ke be yi. 20 Sere be dokkon ga na funti, n da ken ya sugandi. Ken moxo, Banisirayilaganko ga da murutiye be dabari katta axa yi, n na a laatondi du yi. »
21 Muusa da a kiɲandi Banisirayilaganko yi. I xirisun dubaananbe su da dokko kini a yi, xabiila su xirise dokko, i faabankaanun lanɲara, dokkonu tanmi do fillo, Haaruna dokkon wa i naxan ŋa. 22 Muusa da dokkonu ku su saxundi Tunka Duumanten jon ŋa seedaaxun tilliisen wure. 23 A yillakara, Muusa ro tilliise ke wure, a da Haaruna dokkon funtinten wari, Leewikaaranke ke, fuugen do ren moyinton¤ gaa a yi. 24 Muusa da dokkonu ku su wutu bakka Tunka Duumanten jon ŋa tilliisen wure, nan ri i koyi Banisirayilaganko su yi. I da i faayi, baane su da i dokkon wutu.
25 Tunka Duumanten daali Muusa da : « Haaruna dokkon saaga seedaaxun waxanden taŋon ŋa, an na tigiti a yi taagumanse yi murutinto ku da. Ken moxo ya ni, an na kace tafu i xuumu-xuumuye ke yi ti in ŋa, karamuqun na waase xenne i ya. » 26 Muusa da a ɲa xo Tunka Duumanten ga da a ɲaamari moxo be.