[Xaaruuna xibaare]
16
Leewikaaranke yogo, a toxon ga ni Xaaruuna, a faaba ga ni Yicaari, Xehaati kaadunke ga ni, a da sero murutindi. Kun sero ni Heliyaabu renmun ya, Dataani do Habiraama, kafiini Peleeti renyugo Woona, kun ga ni Rubeeni bonsonŋun ŋa. 2 I saako nan taŋe Muusa yi, i do kamo filli do tankarage Banisirayilaganke, jamanyinmankon ya ni, batunfaabenun ya ni, toxonton ya ni. 3 I da me mugu ti Muusa do Haaruna yi, na du toxo i da : « An da a wari, an laato keeta de ! Ke jama seren su sennen ya ni, Tunka Duumanten wa i noxon ŋa xa ! Axa na du wuttu Tunka Duumanten ke jama su kanma ti kan kille ? »4 Muusa ga da ku digan koninto mugu, a da du sedi bipi ɲiiɲen ŋa. 5 Ken falle, a ti Xaaruuna do i jaman da : « Xunbane suxuba, Tunka Duumanten wa a tuyindini o yi, sere be ga ni a seren ŋa, a do sere be ga ni a seri sugandinten ŋa, a do a gaa a mulla sere be nan tinko i ya. A ga na i be sugandi, a na ken tinkondi i du yi. 6 Anken Xaaruuna do an bajanlenmo, axa gaa ke be ɲaana, axa na futaadinbeelunun wutu, 7 xunbane, axa na yinben ro i ya, na futaaden ro i ya Tunka Duumanten jon ŋa. Tunka Duumanten ga na i be sugandi, ken ya sennen ni. Axa laato keeta de Leewikaaranko ! »
8 Muusa saage tini Xaaruuna da : « Axa terinke de Leewikaaranko ! 9 Banisirayila Alla ga da axa duran booxo bakka Banisirayila jaman ŋa*, na axa tinkondi du yi, na Tunka Duumanten batika yiranman gollun xaliifa axa yi, nan ti axa na Banisirayilaganko sigan wutu i batten ŋa, axa nexu ken ŋa ya ba ? 10 A duŋe axa nan tinko i ya, anken do an waaxinun su Leewikaaranko. Saasa, axa wa a mulla nan ɲa sadaxakiɲandaano xa yi ! 11 Ken ya saabu da, an do anke jama ga da me mugu ti Tunka Duumanten ŋa ! Haaruna xa ni ko yi, axa gaa baqa a yi ? »
12 Ken falle Muusa da faaren xayi Heliyaabu renmun ŋa, Dataani do Habiraama. I ti : « O nta telle. 13 An ga da o segendi bakka xattin do tamarileeman waranlaqe jamaanen ŋa, nan ri o kari ke gunjura yi, ken ma an baga ? An gaa finna tini an wa du wuttu o kanma na o kanda xa ? 14 Tonŋun ga ni ke be, an ma o riiti jamaane yi ke yi de, xattin do tamarileeman waranlaqen gaa a yi ! An ma taqe kini o yi, soxante fe, reesengoore fe. An da ku sero raga finkinton ya yi ba ? O nta telle noqu ! » 15 Muusa butu ma a gaa dangini haqen ŋa. A ti Tunka Duumanten da : « Maxa i allankuyen raga. Hari fare, n ma a raga i ya abada, n ma i dubaananbe su tooro. »
16 Muusa ti Xaaruuna da : « An do an jama ke su, axa ɲa Tunka Duumanten jon ŋa yere yi xunbane, anken do ikun do Haaruna. 17 Axa dubaananbe su na i futaadinbeelon wutu, na futaaden ro a yi, do i nan ri Tunka Duumanten jon ŋa. A su kafumante, kamo filli do tankarage futaadinbeelo, kafiini an do Haaruna, be su do i xalle. »
18 Sere su da i futaadinbeelon wutu na yinben ro a yi, na futaaden ro a yi. I daga sigi gemmanlenmaaxun tilliisen raqen ŋa, kafiini Muusa do Haaruna yi. 19 Xaaruuna da i bajanlenmon kafu me yi Muusa do Haaruna xanne maxa gemmanlenmaaxun tilliisen raqen ŋa. Tunka Duumanten nooron xosi bange jaman su da.
20 Ken falle Tunka Duumanten daali Muusa do Haaruna da : 21 « Axa booxe bakka ke soroba yi, n nan xosi i buruxa dubaane. » 22 I da i du sedi bipi ɲiiɲen ŋa nan ti : « Eh Alla ! Alla ke be tagefon su yonkiranwareyen gaa a maxa, seri baane yangon saabu da, an na butu katta an jaman su yi ? » 23 Tunka Duumanten daali Muusa da : 24 « A ko jaman da, ti i nan laato bakka Xaaruuna kan do Dataani kan do Habiraama kan ŋa. » 25 Muusa giri. A gaa dagana Dataani do Habiraama sagata, Banisirayila xirisun da a batu. 26 A ti jaman da : « Axa laato bakka ku seri bononto tilliisun ŋa, axa maxa kati i fo wo fo su yi, ken ga fe, axa n maxa halaki i yangonun saabu da. » 27 I laato bakka Xaaruuna do Dataani do Habiraama kaanun kaaran ŋa. Dataani do Habiraama do i yaqun do i renmun do i kisimarun bogu nan sigi i tilliisun raqun ŋa.
28 Muusa ti : « Axa wa a tuunu ken ŋa, nan ti Tunka Duumanten ya n da in xayi riini ku gollu dabari. N ma i dabari ti in du yi. 29 Ku sero ga na kara xo duna su karamoxo, kallen masiibon ga da i kita xo duna kutten su moxo, an na a ɲi Tunka Duumanten ma inke xayi ya. 30 Xa selli Tunka Duumanten ga na finjaŋu dabari, ɲiiɲen ga da i raqen wuɲi, na i do i naaburen su toni, i biranton ga na yanqa furun kaara, a na xura axa da, ti ku sero da Tunka Duumanten roxondi ya. »
31 A ga da ku digaamu ko nan duguta baane tan, ɲiiɲen booxe bakka i taanun wure, 32 nan wuɲi, na i do i korun su toni, kafiini Xaaruuna seron do a naaburen su yi. 33 I fo ga ni fo wo fo su yi, i biranton do a su yanqa dagana furun kaara, ɲiiɲen da i bulu. I buruxe bakka kafon ŋa ke moxo ya. 34 Banisirayilaganke su ga ɲi i kaaran ŋa, i xaaruyen da a su wurundi, ti ɲiiɲen nan maxa daga i xa toni. 35 Kamon filli do tankaragen sere be ga da futaaden tiidindi, yinben giri Tunka Duumanten ŋa na i xurumindi.