[Sadaxon sariyanu]
15
Tunka Duumanten daali Muusa da : 2 « A ko Banisirayilaganko da nan ti : “ N gaa riini ɲiiɲe ke be kini axa yi, axa ga na ro bire be nan taaxu a yi, 3 axa ga na ɲi yinbidunsadaxa sadaxini Tunka Duumanten da, xo sadaxa xuruminte ma tekke, walla xa yonkiliŋunsadaxa, ma walla axa ga na ɲi sadaxa sadaxini axa salli xerexerenton ŋa, kuudo na timi liŋen dabari Tunka Duumanten da, ken sadaxa ga na ɲa nan ya yi ma tanmise, 4 an na soxofonsadaxan xa bagandi kafiini a yi : muude jura mullu-mulli xootinte ti liitara baane te yi, an na i do a sadaxi Tunka Duumanten da. 5 Xa na liitara baane reesendolo dabari minifonsadaxa yi. Ken ya n kafiini jaxandiginlenme su yi, ken ga na ɲa sadaxa xuruminte ya yi, walla allatiigeyinsadaxa. 6 A ga na ɲa jaxandiginlenme ke ya yi kuŋa, an na muudu filli jura mullu-mulle ɲa soxofonsadaxa yi, a xootinten ga ni ti liitara baane do taxande te yi, 7 ken do reesendolon liitara baane do taxande, ken ni minifonsadaxan ya, an na i tinkondi. Kani liŋen ya ni katta Tunka Duumanten ŋa.8 « “ An ga na ɲi gunbunlenme ke ɲaana sadaxa xuruminten ŋa, ma tegufo, walla xa allatiigeyinsadaxa Tunka Duumanten da, 9 ken ŋa an na soxofonsadaxan ya kapa gunbunlenme ke yi, ken ga ni muudu sikki jura mullu-mulli xootinte ti liitaranu filli te, 10 an na minifonsadaxan xa tinkondi, reesendolon liitara baane do taxande, yinbidunsadaxan ya ni, kaniliŋen ya ni Tunka Duumanten da. 11 Gunbu baane, ma jaxandigi baane, ma jaxanlenmu, walla xa sugunlenmu, an na i ɲaana ken moxo ya. 12 An ga da jaatu ku be dabari kundu, an na kun me ya dabarini baane su da, baane baane, na a gemundi i jaatun ŋa.
13 « “ Saaridon su n xawa ku me ya dabarini ke moxo kundu yi, a ga na ɲi yinbidunsadaxa sadaxini kani liŋe yi Tunka Duumanten da. 14 Fo be ga ni xo mukke be gaa taaxunu kafiini axa yi, ma a gaa woloxiini kafiini axa bonsonŋun ŋa, a ga na ɲi yinbidunsadaxan bagandini kani liŋe yi Tunka Duumanten da, axa gaa a ɲaana moxo ke be, a xa n xawa a ɲaana ken moxo ya. 15 Jaman danma ! N na a ko axa da ti : farila baane ke be gaa axa kanma de, a ya n ɲaana mukken xa kanma ; abadanfarilan ya ni axa bonsonŋun kanma, xo a gaa axa do axa mukkunun kanma moxo be yi Tunka Duumanten jon me naxa. 16 Sariyan ni baane ya, kiiten ni baane ya, a gaa ɲaana axa kanma, kafiini axa mukkunu be gaa do axa yi. ” »
[Fateyifanon sariya]
17 Tunka Duumanten daali Muusa da nan ti : 18 « Digaamu Banisirayilaganko da nan ti : “ N gaa riini axa rondi ɲiiɲe ke be yi, axa ga na ro 19 nan saage ɲiiɲe ke yiganden yigana bire be, axa na taqe wutu, na a sadaxi Tunka Duumanten da. 20 Axa gaa joŋaana jura fana be yeregene, xa na tufullu wutu bakka a yi, xo axa gaa ke be me wuttu bakka yillifunsu fanan ŋa. 21 An nan xawa an goroda fana ke juran yogo wuttu ya, na a kini Tunka Duumanten ŋa taqe yi, ken na toxo wutiini sadaxa yi axa bonsonŋu su maxa. ” »
[Yangonsadaxon sariya]
22 « “ Tunka Duumanten ga da ku ɲaamarixannu be danmon su ko Muusa da kundu, i be nda faareti, an ga ma i ɲa, 23 Tunka Duumanten ga da an ɲaamari fo be su yi Muusa kandan noxon ŋa, gelli koota fana be a ga ɲaamarindi Muusa maxa, nan daga a wara ma axa bonsonŋun ŋa, 24 selli ken sankunten gaa jaman ŋa, ken ŋa jama ke danman su ya n xawa gunbunlen baane sadaxini sadaxa xuruminte yi. Kani liŋe ya ni Tunka Duumanten da. Ken do i soxofonsadaxan do i minifonsadaxa, xoyi a ga n xawa ɲaana moxo be. Ken do sugundigi baane, ken na ɲa yangonsadaxa yi. 25 Sadaxakiɲandaanan na yanpeyimuuri Banisirayilagankon jaman danman su da, yanpeyen na ɲaŋi i da, baawo futuxiyen ya ni. I da i yinbidunsadaxon do i yangonsadaxon xa bagandi Tunka Duumanten da. 26 Yanpeyen wa ɲaana Banisirayilaganko jaman danman su da. Mukkunu be taaxunten gaa i noxo, yanpeyen wa ɲaana kun xa da, baawo jama ke danman su futuxi ya.
27 « “ Selli seri baane ya nda futuxi na yango golle dabari, a wa sugu yaxarin baane riitini, a gaa i siinen ŋa, na a ɲa yangonsadaxa. 28 Sadaxakiɲandaanan na yanpeyimuuri ken sere da ti a futuxiye ke yangon ŋa Tunka Duumanten jon me naxa. A nda yanpeyimuuri a da, yanpeyen na ɲaŋi a da. 29 Banisirayila saare renmen do mukken su, futuxiyen sariyan ɲaana baane ya yi axa kanma.
30 « “ Xa ganta, yonkinte su ga na a wutu a xanne maxa, na Tunka Duumanten toxon ya battaraaxu, ken kaman ɲa saarido yi wo, a ɲa mukke yi wo, a kutiini bakka i xabiilan ŋa ya. 31 Baawo ken kaman da Tunka Duumanten daalen ya battaraaxu, na a ɲaamarixannun guruja, ken ken nan xate ya tannu, a garamajigingollen likken na a yinme ya kanma. ” »
[Tuumayinkootan dorondiye]
32 Banisirayilaganko gaa gunjuran ŋa, i da yugo yogo ɲi suwon suwana tuumayinkootan ŋa. 33 Ku beenu ga da a wari, i do a ri katta Muusa do Haaruna do jaman su yi. 34 I da a kaso, baawo a ma bange i danŋa fina fo be ga n xawa ɲaana a yi. 35 Tunka Duumanten daali Muusa da : « Sere ke nan kara, jaman danman su na a gididunwara ti gidinlenmun ŋa daaxan sellan ŋa. » 36 Jaman danman su da a bagandi katta daaxan falle, na a gididunwara ti gidinlenmun ŋa, xo moxo be Tunka Duumanten ga ɲaamarindi Muusa maxa.
[Sinmeyinden kacu]
37 Ken falle Tunka Duumanten daali Muusa da nan ti : 38 « Digaamu Banisirayilaganko da, an nan ti i do i bonsonŋun su na kacun dabari do i xupiyiraamun kanpon naxati yi, na baxa xaxacen kacun kutu do ɲuuɲun ŋa. 39 Xa na kun yiransinqinton rondi, axa ga na kun sinqu do kun kacu wari, ken ŋa axa na sinme do Tunka Duumanten ɲaamarixannun ŋa, axa na i dabari xa. Ken ŋa axa ntaxa axa sondomun batta, axa ntaxa axa yaaxon batta, axa gaa fillakafini do kun beenu batten ŋa. 40 Ken maanan ni ya, axa na sinme, na in ɲaamarixannun su dabari, axa na seno axa Alla da. 41 Nke ya ni Tunka Duumanten ŋa, axa Alla, ke be ga da axa bagandi Misira ɲiiɲen ŋa, kuudo nan ɲaŋi axa da kamane yi. Nke ya ni Tunka Duumanten ŋa, axa Alla. »