14
Jama ke danman su da sonqon sigindi nan toxo xaarunu, i wuyi wuunu ken wuro yi. 2 Banisirayilaganko su toxo nuxudunsefene ti Muusa do Haaruna yi. Jama ke muuman su ti i da : « Ah ! Hari o gan kara Misira yi, ma o gan kara ke gunjura yinme yi ke ! 3 Manne n sigi Tunka Duumanten ga da o riiti ke jamaane yi, nan ri o saatun jongi kaafan ŋa ? O yaqun do o renmu na komaaxu. O nda saage katta Misira yi dubaane, ken ya nta faso o da ba ? » 4 I ti me da : « O na yinmanke tana wutu, o n saage katta Misira ! »5 Muusa do Haaruna da du wara yanqana bipi ɲiiɲen ŋa Banisirayila jaman su kafumanten gaa me kanma. 6 Nuunu ren yugo Yuusawu, do Yefunne ren yugo Kaalebu, ikun beenu ga ɲi kapa jamaane ke sonsolondaanon ŋa, i suno ma i gaa i yiraamun booxono. 7 I ti Banisirayila jaman da : « O ga daga sonsolondi jamaane ke be yi, o ga bogu ti a yi na a yiila, jaman siri-sire ya ni. 8 Tunka Duumanten gaa o mulla, a na o kiɲana jamaane ke yi ya, na a kini o yi xa mene, xattin do tamarileeman waranlaqen jamaanen ya ni. 9 Xa, Tunka Duumante, xa maxa muruti katta ken ŋa ! Axa maxa kanu ke jamaane seron ŋa ; i ɲaana o da logon baane ya yi tannu. I alla tanganden ntaxa do i ya, Tunka Duumanten ken xa wa do oku batten ŋa. Xa maxa kanu i ya ! » 10 Jaman xosi ti i na Yuusawu do Kaalebu gididunwara.Tunka Duumanten nooron xosi bange Banisirayilaganko su danŋa ken sigira baane yi genmanlenmaaxuntilliisen kanma.
11 Tunka Duumanten daali Muusa da : « Ke jama na i tan fatana inke roxonden ŋa kan bire ? I saqa in ŋa kan bire ? Xoyi in ma kaawafi gabe ɲaŋi i jon ŋa harisa ? 12 N wa a katta ti taawoonen ŋa, na a kuma i xayimaxantafon ŋa. N na jama xoore bagandi anken Muusa yi, a ga n fuŋu ke jama yi, a ga n senbenta i ya. »
13 Muusa jaabi Tunka Duumanten da : « Misirankon da a mugu ti an senben ya n da ke jama segendi bakka Misira jamaanen ŋa. 14 I da a laxami ke jamaane xa seron da, kun xa da a mugu ti anken Tunka Duumante, an wa kafiini ke jama yi. Anken ya ni Tunka Duumanten ŋa, an gaa du koyini i ya yaaxe ti yaaxe. An tabullen wa biirini i kanma. Kiyen ŋa, an tabullen gondomanma giilen wa i kaane. Wuron ŋa an tabullen gondomanman wa i kaane xo yinbikuma. 15 An na yille ken jama buruxana xo seri baanen moxo ! Ee ! Ken ŋa, jamaanu be ga da an xibaaren mugu, i na ti : 16 “ Jaaxa Tunka Duumanten ga da jamaane ke be laayidun wutu ke jama da, a konto i joofandini ya ! Ken ya n sigi a ga da i ɲamallexu gunjuran ŋa. ” 17 Gelli saasa, n Tunka Duumante, an senben nan bange, xoyi an yinme ga da a ko moxo be nan ti : 18 Tunka Duumanten ni nooxen ya, fonnansiren ya ni, a gaa futuxiyun do murutiyun muɲini, xa a nta dangini junuubunte yi. Aken ya na renme batta ti faabe junuubun ŋa, ma a buru sikkan do a naxata. 19 Ken kuŋa, yanpa ke jama maxa i junuubun ŋa ti an fonnansiraaxun ŋa, xoyi an ga da a muɲi gelli Misira yi ma yere. »
20 Tunka Duumanten daali : « N yanpa a yi xoyi an ga da in ɲaaga moxo be. 21 Xa inke Tunka Duumante, n ya ga ni ŋalinten ŋa, n nooron gaa ɲiiɲen loogono ! 22 Ku beenu ga da in nooron do in kaawafiinun wari Misira, a do in ga da fo be ɲa gunjuran noxon ŋa, ikun ya ga yille inke xenpene taanu tanmi yi xadi, i ga nta in terinkana ! 23 N kuna, i du baananbe su ga da in roxo, n ga da jamaane be laayidun wutu i faabanu da, i nta a walla i yaaxen ŋa. 24 Xa in kome Kaalebu, haqile tana da aken kanda, a do sikka ma in batu. N wa aken rondini jamaane ke be a ga daga a sonsolo. A bonsonŋun na taqe kita a yi.
25 « Ken kuŋa, xoyi Hamaleexigankon do Kanaanagankon gaa xuna ke yi, xunbane su, axa n saage katta gunjuran ŋa, ti Xulunjuumufanŋe killen ŋa. »
26 Tunka Duumanten daali Muusa do Haaruna da : 27 « N na ke jama bure muɲini ma kan bire yi, a gaa nuxudunsefene ti in ŋa ? Banisirayilaganko gaa nuxudunsefe su yi katta in ŋa, n da i mugu. 28 A ko i da ti : “ Nke Tunka Duumante ti : N kuna ti in ŋalintaaxun ŋa, ti in ga da axa digaamun mugu katta in ŋa moxo ke be, n na ken me haqen ya ɲaana axa yi. 29 Axakun beenu toxonun ga wuti gelli axa gaa tanpille siine, axa su kalla ke gunjura ya noxon ŋa, axakun beenu ga muruti katta in ŋa ! 30 N ga da jamaane ke be laayidun wutu axa da taaxura yi, n kuna ti axa ntaxa roono, ma a ganta Yefunne renme Kaalebu do Nuunu renme Yuusawu baane. 31 Axa ga ti i wa axa renmu ku be ɲaana komo, n wa ikun rondini jamaane ke be axa ga ma duŋe roono, i na a wari. 32 Xa axakun kalla ke gunjura ya yi. 33 Axa ren yugun wa tannaxate siine nagaanini ke gunjura yi, axa fillakapen tooran na saxu i kanma, ma axa su ga n kara ke gunjura noxon ŋa. 34 Axa da tannaxate bito ya ɲa sonsolondini jamaane ke yi. Axa wa axa junuubunun tooran xa wuttu tannaxate siine. Ken ŋa, koota baane su na ɲa axa da siine. Axa wa a tuunu ken moxo yi nan ti in sooxinden buren ya ni. 35 Nke Tunka Duumante, n ya n da a ko ; ke jama bure be su ga da me mugu ti in ŋa gunjura ke yi, i saate fakka ke gunne ya yi, i kalla non ya yi. N na ken ya ɲaana i ya. ” »
36 Muusa ga da sero ku beenu deni jamaanen sonsolo, i ri falle i da jamaanen maxankuton bonondi jaman da, na jaman janba Muusa yi. 37 Kun sero be ga da jamaane ke botoburu, a su toxo taawoonen ŋa Tunka Duumanten jon me naxa. 38 Xa ku beenu su ga daga jamaane ke sonsolo, Nuunu renme Yuusawu do Yefunne renme Kaalebu baane ya n toxo bireene.
39 Muusa ga da ku sefo kiɲandi Banisirayilaganko yi, jama ke suno. 40 Bita fillan suxuba fana, i da gidinjamaanen killen wutu segene, i gaa a tini : « O wa segene katta Tunka Duumanten ga da noqu be sugandi. Tonŋun ya ni o ɲa junuubunto. » 41 Muusa ti i da : « Axa na manne ken ɲaana kundu ? Axa faayi Tunka Duumanten ɲaamariyen ya sooxini de ! Axa do sahaaba nta genme. 42 Axa maxa sege, baawo Tunka Duumanten nta do axa yi ; xa maxa daga du ro axa xonnon kittun ŋa. 43 Hamaleexigankon do Kanaanagankon wa axa kaane non ŋa. Axa su wa xenne i kaafon wure, baawo, axa da axa da falle koyi Tunka Duumanten ŋa ya, a nta ɲaana do axa batten ŋa. »