Jaatu 13

[Kanaana jamaanen sonsolonde]

daali Muusa da : 2 « Sero xayi telle sonsolondi Kanaana jamaane ke be in gaa a kinni yi. Axa na xabiila su seri baane deni, i nan ɲa yinmankon ya yi de. » 3 Muusa da i xayi gilli Paraana gunjuran ŋa, Tunka Duumanten ɲaamarinden kanma. Kun sero su ni Banisirayila kaanankon ya. 4 I toxonun faayi :

Rubeenikaarankon xabiilan ŋa, Jakuura renyugo Saama ya n daga.

5 Simoonakaarankon xabiilan ŋa, Hoori renyugo Safaata ya n daga.

6 Yehuudakaarankon xabiilan ŋa, Yefunne renyugo Kaalebu ya n daga.

7 Yisaxaarikaarankon xabiilan ŋa, Yuusufu renyugo Yigaali ya n daga.

8 Hefarayimukaarankon xabiilan ŋa, Nuunu renyugo Hoosa ya n daga.

9 Beniyamiinakaarankon xabiilan ŋa, Raafo renyugo Palaati ya n daga.

10 Jebuluunukaarankon xabiilan ŋa, Soodi renyugo Gadiyeeli ya n daga.

11 Yuusufu renyugo Manaase xabiilan ŋa, Suusi renyugo Gaadi ya n daga.

12 Daanikaarankon xabiilan ŋa, Gemeli renyugo Hamiyeli ya n daga.

13 Haseeri fonlaqe, Mixayeeli renyugo Setuura ya n daga.

14 Nafutaalikaarankon xabiilan ŋa, Waafesi renyugo Nahaabi ya n daga.

15 Gaadikaarankon xabiilan ŋa, Maaxi renyugo Guweeli ya n daga.

16 Muusa da ku sero ya deni sonsolondi jamaanen ŋa. Muusa da Nuunu renyugo Hoosa ken toxora « Yuusawu ».

17 Muusa da i xayi telle sonsolondi Kanaana jamaanen ŋa nan ti i da : « Axa royinton nan bogu ti Negeba ya yi, nan sege gidinjamaanen ŋa. 18 Axa na jamaanen faayi a gaa moxo be, selli senbe gaa a jaman ŋa, ma senbe ga nta a yi. Axa na a jaman faayi, selli a gabe ga ni ma a roxe ga ni. 19 I gaa taaxunu jamaane ke be yi, axa na a faayi, selli a sire ga ni ma a ga maɲa, selli gundundebun ya ga ni, ma tageyinbinnen ya gaa i ya. 20 Axa na a faayi selli soxanɲiiɲa siren ya ga ni, ma a ga maɲa, yitte gaa a yi, ma a ga nta a yi. Axa na duruxoto, axa do jamaanen yittirenmu na ri. » Ken bire ni moyinta fanon sanjaanen ya.

21 I sege, nan daga sonsolondi jamaanen ŋa, na a wutu Siini gunjuran ŋa, nan daga a wara Rehoobu yi, Leebo-hanmaati kaaran ŋa. 22 I sege ti Negeba ma i gaa kiɲeene Heburoona, noqu be ga ni Hayimaana do Sesaayi do Talama taaxuran ŋa, kun ga ni soxoodin ŋa. Ke Heburoona ya n taaxu Sowaana deben kaane yi ti siino ɲeri, Sowaana be gaa Misira. 23 I kiɲe ma Hasikooli waranlaqen ŋa, na reesekingen do i konbon kutu, sero filli da a wutu ti dokkon ŋa. I da yittirenmu yogonu wutu, i gaa xiriini « runmaani », a do tururenmu yogonu. 24 I da ken noqu xiri « Hasikooli », a wure ga ni « konbo », na a sababun ɲa Banisirayilaganko ga da konbon kutu non ŋa.

25 Tannaxate bito noxo, i daga jamaanen duuxura nan saage. 26 I da Muusa do do Banisirayila jaman su ɲi Xadesi yi Paraana gunjuran ŋa. I ga da ke be wari, i da a ko jaman da, na jamaane ke yittirenmun xa koyi i ya.

27 I ti Muusa da : « O daga an ga da o xayi jamaane be. Tonŋu, waranlaqe jamaanen ya ni, a yittirenmun yogo faayi ! 28 Ganta, sero be taaxunton gaa jamaane ke yi, senbenton ya ni de ! A deben su xooren ya ni, tageyinbinnen wa a su yi. O da Hanaaxi soxoodi yinme xa ya wari kapa i ya. 29 Hamaleexigankon wa taaxunu Negeba maran ŋa. Heetiganko, Yebuusikaaranko, do Hamoorikaaranko, kun wa taaxunu gidinjamaanen ŋa. Kanaanagankon wa taaxunu geejin kaaran do xannen ŋa. »

30 Jaman ga taŋe Muusa yi, Kaalebu da i sabarindi, a do a gaa me yi : « O nan setu, o n daga ! O na jamaanen ɲa o xalle yi. Sikka nta a yi, o na a ragana ya. » 31 Xa, a do sero beenu ga daga doome yi da du toxo ti : « O ra nta xenne ke jama yi, baawo a ya n fuŋo o yi senbe. » 32 I xosi toxo jamaane ke maxankutuburunu Banisirayilaganko da, i gaa tini : « Oku ga daga jamaane ke be yaala kuudo na a duuxura, jamaane ya ni, sere ra ga nta bireene no ; o ga da sero ku xa be wari no, a su dinkan giile ya ni. 33 O da dinkanu xa wari kapa i ya, ya ni, Hanaaxi soxoodi. Oku na kun wure xo fuuɲun ya, i yinme xa na o faayini xo fuuɲu ya xa mene. »