[Annabi Muusa Kuusinka yaxarinyaxiye]
12
Mariyaamu do Haaruna da Muusa bexu, ti baawo a da Kuusinka yaxaren yaxi. 2 I ti : « Keeti Tunka Duumanten na sefon roono Muusa baane ya raqen ŋa ? Yaala a nta sefon roono o xa raqun ŋa ya ba ? » Tunka Duumanten da a mugu. 3 Xa Muusa ni sere ya kuŋa, duna muuman su, a me nooxe nta du yi.4 Ken noxoodu tan, Tunka Duumanten daali Muusa do Mariyaamu do Haaruna su nan daga genmanlenmaaxuntilliisen ŋa. I sikki su daga. 5 Tunka Duumanten yanqa, a gaa tabullu xooren noxon ŋa, nan sigi tilliisen raqen ŋa, na Mariyaamu do Haaruna xiri, i filli su daga katta a yi. 6 Tunka Duumanten daali i da :
« Axa da in sefon terinka :
Selli annabinyinme gaa axa yi,
nke Tunka duumante, n na a kaman ɲaana wallaanan ya, na du koyi a yi.
N sefene a da kuyin ya.
7 Xa, ken do in kome Muusa xalle nta baana ;
aken be ga ni in seri saxiironten ŋa katta in kan su yi.
8 N sefene aken da yaaxe ti yaaxen ya,
gundo fe.
A na inke Tunka duumante yinme saanan ya walla.
Axa saako kan moxo, na in kome Muusa bexu ? »
9 Tunka Duumanten butu i wure nan daga. 10 Tabullen giri tilliisen kanma. Saafin bange Mariyaamu yi ken batte su, a xura xa fexefexe.
Haaruna tiirinbe katta a yi na saafin wari a yi. 11 Haaruna ti Muusa da kuŋa : « Ee, kaman yugo, n da an ɲaaga, maxa o raga ti o haqilanloxaaxun do o junuubun gollun ŋa ! 12 Ee ! Mariyaamu gan nta ɲa xo xosondirenme be dusuxaaliyan ga da a yiga i ma noxon ŋa ! »
13 Muusa laxaraxaasa katta Tunka Duumanten ŋa, nan ti : « He Alla, a sahandi ! » 14 Tunka Duumanten daali Muusa da : « A faaba gan n tufa a yeeson ŋa, xo bito ɲeri yaagu ma a raga sa ? Ken kuŋa, a nan xate bakka daaxan ŋa bito ɲeri. Ken falle a na ri kafu axa yi. » 15 I da Mariyaamu laatondi bakka daaxan ŋa bito ɲeri, jaman ma girindindi ma a gaa saagene riini kafu i ya.
16 Ken falle ya ni jaman ga giri Haceroota nan daga taaxu Paraana gunjuran ŋa.