[Mannan do jaxanŋoɲi ɲaaɲante]
11
Koota yi, jaman toxo doxo misen ŋa, Tunka Duumanten ga da i mugu, a butu ma a gaa dangini haqen ŋa. A yinben da i raga, na daaxan kaara baanen buyi. 2 Jaman laxaraxaasa katta Muusa yi, a da Tunka Duumanten ɲaaga, yinben kara. 3 I da ken noqu toxora « Tabeera¤ », baawo Tunka Duumanten yinben da i raga.4 Xabiila tana jaman* ɲi kapa Banisirayilaganko yi, berexen da i raga. Banisirayilaganko yinme xa yille wuyen jopana xadi nan ti : « Ko xa na tiye yigandini oku yi ? 5 O da ɲexen sinma sa ! O ga ɲi a yigana Misira yi xafu, ken do mulunqunu, kiyu, basallu, layinu, do basallen xabiila tananu¤ ! 6 Saasa o yonkinun faayi bakka, o yaaxe nta yigande su yi kemanna ya ga fe. »
7 Finaanu, mannan funsunman ya ni, a yaaxen dumakkajinma. 8 Jaman na sanqi, i gaa a sagarana. Ken falle, i na a yinsi, walla i na a goro na a soro, ma ken ga fe xa, i na a ɲa tufulle, a daxanmen gaa xo furufuru ɲaaɲante. 9 Wuron ŋa nigijen ga na yanqa do daaxan kaaron ŋa ya ni, mannan xa na yanqa.
10 Ayiwa Muusa da i wuxannen mugu i gaa sikki i tilliisun raqun ŋa. Tunka Duumanten butu butte su xenpa. Ken ma gemu Muusa yi. 11 A ti Tunka Duumanten da : « Manne saabu da an gaa tooran ɲaana an komen ŋa ? Manne ni an ga da ke jama likken saxu in kanma, n ga nta jamu kitta an maxa ? 12 Xoyi inke ya n da ke jama taga ba ? Nke ya n da i saara ba ? An ga ti in na i wutu dagana ma jamaane be an ga da a laayidun wutu i faabanu da, xo lenmen gaa lendunjaaxen maxa konbon ŋa ? 13 N na tiye bakka minne, n gaa a kinni ke jama be do wuyen gaa me yi do in batten ŋa, i do a gaa me yi : “ O ku tiye, o na a yiga ! ” ? 14 Nke baane ra ntaxa ke jama likken wuttu, a n xoto in da moxo buru. 15 An gaa ke ya ɲaana in ŋa, selli an gaa jamu mulla in da, xosi in kari dubaane, n na tuuma yaaxaburufaayiyen ŋa. »
16 Tunka Duumanten daali Muusa da : « Tanɲere Banisirayilaganka xirise kafu me yi in da, an yinme gaa a tu ti yinmankon ya ni, jaman yaaxamaxon xa ya ni. An do i nan ri genmanlenmaaxuntilliisen ŋa. Axa su nan sigi no. 17 N wa yanqana non ŋa, n na sefe an da. Fanka senne be gaa an ŋa, n na fo kini i ya bakka a yi, ken moxo, an do i su na saage jama ke likken wutu doome, a ntaxa ɲaana an baane kanma.
18 « An na ti jaman xa da : “ Xa da du senondi, na axa moxo sirondi tiyiyigeyen xanne maxa katta xunbane suxuba. Baawo axa da a wu Tunka Duumanten ŋa nan ti : ‘ Ko na tiye yigandini o yi ? O moxon siren ɲi Misira yi sa ! ’ Tunka Duumanten wa axa kuunu tiye yi kuŋa, axa gaa a yigana. 19 A xa nta xenpeene bito filli ma sikko yigeye xa yi mene, ma bito karagi, walla xa bito tanmi ma tanpille bito. 20 Xa xasu muuman ya ni, ma tiyen ga n da i tu bogu axa yi, nan bogu ti axa nuxunboton ŋa. Ken su ni axa ga da Tunka Duumanten sedi ya, a gaa axa naxan ŋa, nan wu katta a yi, nan ti : ‘ O bogu Misira yi manne ? ’ ” »
21 Muusa jaabi : « N gaa jama ke be noxon ŋa, a yirigeyen ni kamo tunmi wujune yuguxoore ya, an xa ti an wa tiyen kinni ken su yi i gaa a yigana xasu muuma ! 22 Hari i be nda nan do tanmisen kari i da, ken wa i bakka ba ? An ga na geeji ɲexen su tangi katta i ya, ken wa i bakka ba ? » 23 Tunka Duumanten daali Muusa da : « N senben xa wa kontono ba ? An wa a walla saasa selli in sefen gaa ɲaana, ma a ga nta ɲaana. »
24 Muusa bogu tilliisen ŋa, na Tunka Duumanten digaamun kiɲandi jaman ŋa. A da tanɲere xirise kafu me yi bakka jaman ŋa, na i sigindi do tilliisen kaaron ŋa. 25 Tunka Duumanten yanqa tabullen noxon ŋa, nan sefe a da. A da fo wutu Muusa fanka sennen ŋa, na a kini tanɲere ke yinmanken ŋa. Gelli fanka sennen ga ro i ya tan, i sefe ta baane xo annabinyinmu.
26 Sero filli jaatanton ɲi kapa tanɲere ke xirisen ŋa, kun toxo daaxan ŋa, baanen toxon ni Yelidaadi, baanen xa toxon ni Medaadi. Fanka sennen yanqa i xa yi, i ma bogu nan daga tilliise ke yi xa, xa i xa toxo sefene daaxan ŋa xo annabinyinmu. 27 Murunte yogo wuru telle Muusa xibaari nan ti : « Yelidaadi do Medaadi faayi sefene daaxan ŋa xo annabinyinmu ! » 28 Nuunu ren yugo Yuusawu be gaa Muusa wure gelli a tugunne, a ti : « N yinmanke Muusa, i kaba ! » 29 Muusa ti a da : « An suuxunu in danŋa ya ba ? Yelli Tunka Duumanten gan na i yinme fanka sennen yanqandi i jaman ŋa, i su gaa ɲaana annabinyinmu yi ! » 30 Ken falle, Muusa do Isirayila tanɲere ke yinmanken saage katta daaxan ŋa.
31 Tunka Duumanten da fanke girindi geejin ŋa, na jaxanŋoɲen riiti daaxan ŋa. Daaxan kaara su, jaxanŋoɲen juruminten wa kiye terende bakka. A juruminten wa ɲiiɲen kanma ti sogone fillo. 32 Jaman da ken kiye do ken wuro su sigi kafiini bita fillanden ŋa, i gaa jaxanŋoɲen xoorono. Sere be ga ma fo gabe kita ya ni, farinlikku¤ tanmi. I da a fesi do daaxan kaaron ŋa. 33 Na tiyen toxo i raqun ŋa i gaa a kanbunu, Tunka Duumanten butten yanganxatan da i raga, taawoonen xanu i ya. 34 I da ken noqu toxora Kiborooto-hataawa, a wure ga ni « berexen xaburo », baawo berexen ga ɲi ku be yi, i da i firindi non ya.
35 I ga giri Kiborooto-hataawa, i daga Haceroota. I daaxe non ŋa.