[Xaalisixullunbuutunun filli]
10
Tunka Duumanten daali Muusa da ti : 2 « Xaalisixullen katu, an na buutunu filli dabari, an na toxo meɲiyen gangunu ti i ya, a do girindinden ga na ɲi ɲaana daaxan ŋa.3 « I nda i filli su timi doome, jaman danman su na me ɲi gemmanlenmaaxun tilliisen raqen ŋa. 4 Xa i nda baane ya timi, ken ŋa yinmankon ya na me ɲiini an ŋa, Banisirayilaganko kurunsapon yinmanko.
5 « Axa ga na buutuxannen taaxu me yi, na a wurugi, ken ŋa daaxa be gaa kinbakkankitten ŋa, ken wa girindinden jopana dagana. 6 An ga na timindun taaxu me yi ta fillandin ŋa, ken ŋa daaxa be gaa banboxunkitten ŋa, a wa girindindini. Timindixan wuruginte ke ni girindinden taagumansen ya. 7 Bire be jaman gaa xiriini meɲiyen ya yi, buutun timiini ya tannu, xa timindun nta taaxunu me yi. 8 Haaruna renmu ku, kun ya ga ni sadaxakiɲandaanon ŋa, i ya na buutunu ku tinmi. Ke ni abadanfarilan ya yi axa do axa bonsonŋun su maxa ma abada. 9 Axa xonne nda xenu axa yi, axa do a ga gaja axa ɲiiɲen kanma, axa na buutuxannun taaxu me yi, Tunka Duumanten na sinme do axa yi, axa Alla, axa na kisi axa xonnon ŋa. 10 Axa salli xerexerenton do axa xasun raxafano, kun ga ni axa ɲaxalikooton ŋa, xa na buutunun timi axa sadaxa xuruminton do axa allatiigeyinsadaxon kanma, ken moxo yi axa Alla na sinme do axa yi. Nke ya ni Tunka Duumanten ŋa, axa Alla. »
[Nan giri Tuurisiina giden ŋa katta Mowaaba]
[Forogon merabatimoxo]
11 Siina fillan xasu fillan tanpille, tabullen janbandi bakka seedaaxun tilliisen kanma. 12 Banisirayilaganko da me batu gilli Tuurisiina gunjuran ŋa, sapa ti sapa, ma tabullen gaa sabatini Paraana gunjuran ŋa.
13 Ken ni i ta fanan ya, i ga girindindi nan daga Tunka Duumanten ɲaamarinden kanma Muusa kitten ŋa. 14 Yehuudakaarankon kurunsapon fina ya n janbandi gilli daaxan ŋa, i bandeerin wure. Hamidaabu renyugo Nahasoona ya na i yinmen ŋa. 15 Yisaxaarikaarankon kuren yinmankaaxun wa Suwaara renyugo Nataneeli maxa. 16 Jebuluunukaarankon kuren yinmankaaxun wa Heloona renyugo Heliyaabu maxa. 17 Allanbatika yiranma, Geresooni renmun do Meraari renmun da a wutu do a nan daga.
18 Rubeenikaarankon kurunsapon janbandi i bandeerin wure. Seduura renyugo Licuura ya na i yinmen ŋa. 19 Simoonakaarankon kuren yinmankaaxun wa Surisaada renyugo Selumeeli maxa. 20 Gaadikaarankon kuren yinmankaaxun wa Duweeli renme Yelisaafu maxa. 21 Xehaatilankon xa da gemmanlenmaaxun tilliisen yokki sennun wutu do i nan daga, i na tilliisen sigindi saado kun gaa riini.
22 Ken falle ya ni, Hefarayimukaarankon kurunsapon xa ga janbandi i bandeerin wure. Mihuuda renme Yelisaama ya na i yinmen ŋa. 23 Manaasekaarankon kuren yinmankaaxun wa Pedacuura renme Gamaleeli maxa. 24 Beniyamiinakaarankon kuren yinmankaaxun wa Gidooni renme Habidaana maxa.
25 Daanikaarankon kurunsapon ya n lagari janbandini i bandeerin wure. Ikun ya ni kurufallatangaanon ŋa. I kuren yinmankaaxun na Hamisadaayi renme Hejeeri ya maxa. 26 Haseerikaarankon kuren yinmankaaxun wa Haxaraana renme Pagiyeli maxa. 27 Nafutaalikaarankon kuren yinmankaaxun wa Yenaana renme Hiira maxa. 28 Banisirayilaganko do i kurunsapon daganton da me batu kundu ya.
[Sukkeye do Tunka Duumanten batten ŋa]
29 Muusa jaabi i kallu yugu Mediyaananke Suwayibu* renyugo Hobaabu da : « O daganton ya ni Tunka Duumanten ga da jamaane be ko ti i wa a kinni o yi. Li do o batten ŋa, o na taqe wutu an da bakka Tunka Duumanten ga da xeeri be laayidun wutu Banisirayila danŋa. » 30 Hobaabu ti Muusa da : « N nta telle ; n dagana in jamaanen ya, n xabiilan noxo. » 31 Muusa saage tini : « Maxa booxe bakka o yi ! O gaa dagana noqu be, an ya na non tu ; an na ɲa o geesundaanan ŋa o ga n xawa daaxene gunjuran dan noqu be yi. 32 An ga na ri do o batten ŋa, Tunka Duumanten ga na xeeri be kini o yi, o na taqe wutu an da*. »
33 I giri falle Tunka Duumanten giden ŋa, i da bito sikki tera. Tunka Duumanten tafunden waxanden daga i kaane ken bitosikkinterende yi, kuudo i na katu i yanqaran tuunu. 34 I girinto daaxan ŋa kiye, Tunka Duumanten tabullen biiri i kanma.
35 Waxanden ga na ɲi dagana, Muusa na ti :
« Tunka Duumante, giri !
An xonnon nan sanqi,
an gajanlenmon nan wuru an kaane. »
36 Bire be waxanden ga na ɲi sikki xa, Muusa na ti :
« Saage riini Tunka Duumante,
katta Banisirayilaganko wujuunun sapa gaben ŋa. »