[Maxawaseyinsallen farilanun do a kiitu]
9
Misira bakken falle siina fillan xasu fanan ŋa*, Tunka Duumanten daali Muusa da Tuurisiina gunjuran ŋa nan ti : 2 « Banisirayilaganko na Maxawaseyinsallen waxati xerexerenten tanga. 3 Ke xaso tanmun do naxaton koota, katta futuron waxati, axa na a dabari i waxatin yinme yi, na a farilanun su do a kiitun su koroosi. » 4 Muusa da a ko Banisirayilaganko da kuŋa ti i na Maxawaseyinsallen salli. 5 I da Maxawaseyinsallen salli siinen xasu fanan ŋa, Tuurisiina gunjuran ŋa, xason tanmun do naxaton koota, katta futuron bire. Tunka Duumanten ga da Muusa ɲaamari ti ke be yi, Banisirayilaganko da ken dabari.6 Xa ganta, sero ɲi non ŋa, kun ga sobi ti seri fure yogo yi, kun ra ma ɲi Maxawaseyinsallen sallini ken koota yi, i tinko Muusa do Haaruna yi a koota, 7 i ti i da : « Seri furen ya n da oku sobindi de ; manne na o kabana tinkoono Tunka Duumanten ŋa, na o sadaxon sadaxi do Banisirayilaganko batten ŋa, a yinme waxati xerexerenten ŋa ? » 8 Muusa ti i da kuŋa : « Xa sigi yere, n na Tunka Duumanten terinka, a gaa ɲaamarindini ti fo be yi axa xibaaren kanma. »
9 Tunka Duumanten daali Muusa da nan ti : 10 « A ko Banisirayilaganko da nan ti : “ Axa do axa bonsonŋun su, sere wo sere ga na kati fure yi an ga sobi, ma walla an gaa terendi laaten ŋa, an ra wa Maxawaseyinsallen sallini Tunka Duumanten danŋa, 11 xasu fillandin tanmun do naxaton koota, katta futuron bire, i wa a dabarini. I na Maxawaseyinsallintiyen do buuru lewiirintanŋen ya yigana, a do sokki xaxacu. 12 I n maxa yigandi kutte toxo ma suxuba, i n maxa xotte su xa xoso. Maxawaseyinsallen ɲaamariyen ga ri moxo be, i na a ɲaana ken moxo ya.
13 « “ Xa sere su sennen ya ga ni, an nta terende xa yi, an ga na Maxawaseyinsallen xenundi, an ga ma a dabari, an wa kutiini bakka an xabiilan ŋa. Baawo an bara Tunka Duumanten sadaxan ya sadaxini i waxati xerexerenten ŋa. Ken sere yinme ya na i yangon likken tiŋana. 14 Selli mukke gaa taaxunu axa noxon ŋa, a gaa a mulla na Maxawaseyinsallen salli Tunka Duumanten da, Maxawaseyinsallen farilanun do a kiitun ga ri moxo be, a na a dabarini ken moxo ya. Farilan ɲaana baane ya mukken do ɲiiɲen renmen su kanma. ” »
[Banisirayilaganko girindinde do tabullen batte]
15 Allanbatika yiranman ga sigi koota be, ken ga ni seedaaxun tilliisen ŋa, tabullen xufi a kanma. Gelli futuron bire, tabullen du-yinbinman bange tilliise ke kanma ma suxuba. 16 Ken moxo ya n duume : Tabullen wa xufiini a yi kiyen ŋa, wuron xa, a du-yinbinkuman wa xufiini a yi. 17 Bire su tabullen ga na giri tilliise ke kanma, Banisirayilaganko xa ga ɲi noqu be, i na giri non ŋa. Noqu be tabullen ga na sikkine, Banisirayilaganko na daaxe non ŋa. 18 Banisirayilaganko wa girindindini na a saxu Tunka Duumanten daalen kanma, i wa daaxene na a saxu Tunka Duumanten daalen kanma. Na tabullen toxo i batten ŋa tilliisen kanma, i na i batten ya. 19 Na tabullen toxo i batten ŋa tilliisen kanma koota gabu, Banisirayilaganko xa nta girindindini ; i na Tunka Duumanten ɲaamariyen ya tangana. 20 Tabullen ga na bito ɲa tilliisen kanma waxati be, i xa na daaxe Tunka Duumanten ɲaamariyen kanma. I girindindini Tunka Duumanten ɲaamariyen ya kanma. 21 Noqu be tabullen ga na ɲa non ŋa, na a wutu futuro katta suxuba, suxuban ŋa a ga giri, ma walla xa kiye do wuro, a nda giri tannu, i xa na girindindi. 22 Ma walla xa a nda ɲa bito filli, ma xaso, ma walla xa a ga dalla bita gabu, na tabullen toxo sikkinene tilliisen kanma, Banisirayilaganko daaxene ya ; i nta gilli. Tabullen ga na giri bire be ya ni, i na girindindi. 23 I daaxene Tunka Duumanten daalen ya kanma ; i girindindini Tunka Duumanten daalen ya kanma. Tunka Duumanten ga ɲaamarindi Muusa maxa moxo be, i na ken ya tangana.