[Fitillun moxosironde]
8
Tunka Duumanten daali Muusa da : 2 « A ko Haaruna da, ti a ga na ɲi fitillu ku ɲeri segendini, a na i taaxundi moxo yi, i gaa fitillinxare ke taŋon xurandini. »3 Haaruna da a ɲa ken moxo yi ; a da fitillun segendi, na i taaxundi fitillinxaren taŋon ŋa na i taŋandi a yi, xo Tunka Duumanten ga ɲaamarindi Muusa maxa moxo be. 4 Fitillinxare ke dabarimoxon faayi : kanŋen ya n kati, na a golli, gelli a taaxaade ma a dufuugu be i ga da a ɲaaga ti i ya. A dabarimoxon wa xo Tunka Duumanten ga da ke be koyi Muusa yi*.
[Leewikaarankon senondinde]
5 Tunka Duumanten daali Muusa da : 6 « Leewikaarankon wutu bakka Banisirayilaganko noxon ŋa, an na i senondi. 7 An gaa ke be ɲaana na i senondi, ken ya faayi ke : an na senondindijin ya sanpana i kanma, i na i faton yinten su siyi, na i yiraamun wanqi, i na seno. 8 Ken falle, i do gunbunlenme do i soxofonsadaxan na ri, jura mullu-mulli xootinte ti ten ŋa. An na gunbunlen fillande raga yangonsadaxa yi. 9 An na Leewikaarankon riiti gemmanlenmaaxun tilliisen taŋon ŋa, na Banisirayilaganko jaman danman su kafu me yi. 10 Ken falle, an na Leewikaarankon riiti Tunka Duumanten jon me naxa, Banisirayilaganko na i kittun saxu Leewikaaranko ku kanma ; 11 Haaruna na Leewikaaranko ku kini Tunka Duumanten ŋa, xo Banisirayilaganko sadaxa yigi-yigindimoxo, ken ŋa i na katu Tunka Duumanten gollen dabarini. 12 Leewikaarankon na i kittun saxu gunbunu ku yinmun ŋa, an na baane ke sadaxi yangonsadaxa yi, an na baanen xa ɲa sadaxa xuruminte yi Tunka Duumanten da, nan yanpeyimuuri Leewikaarankon da. 13 An na Leewikaaranko ku sigindi Haaruna do i renmun jon me naxa. Ken falle, an na i kini Tunka Duumanten ŋa xo sadaxa yigi-yiginte. 14 An na Leewikaaranko ku duranbooxo bakka Banisirayilaganko yi, n xallun ya ni.
15 « Ken falle ya ni, Leewikaarankon na ro gemmanlenmaaxun tilliisen gollen ŋa. An na i senondini ke moxo ya, na i kuyi xo sadaxa yigi-yiginte. 16 Baawo i danmon su kiniini inke ya yi bakka Banisirayilaganko noxo. Baawo i kini in ŋa ya renyugu fanan su batten ŋa, bakka Banisirayilaganko danmon su yi. 17 Baawo Banisirayilaganko renyugu fanan su ni inke ya fo yi, seren do daaban su. Bire be in ga da renyugu fanan su buruxa Misira yi, n da ikun duransugandi in du da. 18 Ken kuŋa, n da Leewikaarankon wutu Banisirayilaganko renyugu fanon su batten ŋa. 19 N da Leewikaarankon kini Haaruna do i renmun ŋa bakka Banisirayilaganko noxon ŋa, i nan golli Banisirayilaganko da gemmanlenmaaxun tilliisen ŋa, ken do i nan yanpeyimuuri Banisirayilaganko da, kuudo Banisirayilaganko n maxa tinko dingira sennen ŋa, taawoonen gaa xenne i ya. »
20 Muusa do Haaruna kuŋa, kafiini Banisirayilaganko danman su, i da ku fiinu ɲa ti Leewikaarankon ŋa. Tunka Duumanten ga da ɲaamarindixannu beenu su haqen kini Muusa yi Leewikaarankon fin kanma, Banisirayilaganko da ken ya ɲa ti i ya. 21 Leewikaarankon da du senondi, na i yiraamun wanqi. Ken falle, Haaruna da i kuyi xo sadaxa yigi-yiginte Tunka Duumanten jon me naxa, a yanpeyimuuri i da, na i senondi. 22 Leewikaarankon ri gemmanlenmaaxun tilliisen ŋa ken moxo ya yi nan golli Haaruna do i renmun wure. Tunka Duumanten ga ɲaamarindi Muusa maxa moxo ke be yi Leewikaarankon fin kanma, i da a ɲa ken moxo ya yi.
[Leewikaarankon golle]
23 Tunka Duumanten daali Muusa da nan ti : 24 « Fo be gaa xo Leewikaaranko ku, na a wutu tanpille do siino karagi renme katta fo be gaa ken kanma, a n xawa i sigan sikki gemmanlenmaaxun tilliisen gollun ŋa. 25 Tankarage siine renme, ken nan bogu gollen ŋa, a ntaxa gollini. 26 I ra wa i waaxinun deemana gemmanlenmaaxun tilliisen gollun noxon ŋa, kuudo gollen nan sabati, xa i yinme nta gollini. An ga n xawa feero be wuttu Leewikaarankon gollun xanne maxa, kun ni ku ya. »