2
Pasal Guru Mbal Bꞌnnal
1 Ma waktu palabay inān aniyaꞌ saga aꞌa magnabi-nabi di-sigām bay patuwaꞌ ni bangsa kami. Damikiyanna isab ma kaꞌam, aniyaꞌ du patuwaꞌ ma deyomanbi aꞌa maglaku-laku in sigām guru, boꞌ paꞌin mbal bꞌnnal pagguru sigām. Binowahan kam eꞌ sigām panduꞌ amakaꞌat pangandolbi ma si Isa. Pinaliluhan eꞌ sigām Panghūꞌtam si Isa, ya bay angalꞌkkat sigām min najaꞌ. Sakadjap sadja mulkaꞌ ma saga aꞌa buwattēꞌ. 2 Sagōꞌ aheka aꞌa ameyaꞌ-meyaꞌan sigām maghinang kasabulan makatamparasa. Ya heꞌ poꞌonna angkan binissalahan laꞌat bowahan kasabꞌnnalan ya pameyaꞌantam. 3 Saga guru mbal bꞌnnal itu napsuhan sidda, angkan kam pinakalehan saga kissa bay pahinang-hinang sigām, boꞌ kam kapanguntungan eꞌ sigām. Sagōꞌ in hukuman ma saga aꞌa inān sakap asal sangay min awal. Mbal atuli mulkaꞌ ya tinagamahan sigām.
4 Minsan saga malaꞌikat dusahan, halam sigām bay kinaꞌaseꞌan eꞌ Tuhan. Gom paꞌin nilarukan eꞌna ni nalkaꞌ ati kinabbat sigām mainaꞌan ma deyom lendom bitu-bituhan, boꞌ angalagaran llaw hukuman. 5 Damikiyanna isab saga aꞌa bay mbal magmatāw ma Tuhan ma masa awal eꞌ, halam sigām bay kinaꞌaseꞌan eꞌ Tuhan, gom paꞌin sigām pinatumbukan latap ma sakalingkal dunya. Luwal disi Nū bay hampananna, iya maka seheꞌna pituꞌ puhuꞌ. Ma halam giꞌ latap inān, bay ninasihatan eꞌ si Nū baꞌanan aꞌa inān pasal pangatayan sigām subay pinabontol. 6 Bay tinunuꞌ isab eꞌ Tuhan daꞌira Sodom maka Gomora, pangahukumna ma karusahan saga aꞌa mainaꞌan. Minnēꞌ aniyaꞌ kapamintāngan saga aꞌa kaseheꞌan bang ai kamattihan sasuku mbal angisbat Tuhan. 7 Hal si Lōt ya bay pinuwas eꞌ Tuhan min saga daꞌira inān. Bay ahantap addat-tabiꞌatna angkan asasaw pikilanna eꞌ saga aꞌa pangalanggal saraꞌ mainaꞌan, sabab hal magbaꞌisan. 8 Bay iya patꞌnnaꞌ ma tꞌngngaꞌ-tꞌngngaꞌ sigām angꞌndaꞌ ma palantara sigām, akale ma himumungan sigām kahabaꞌ llaw, ya poꞌon abakat atayna eꞌ kalaꞌatan sigām. 9 Kamattanan kitam min si Nū maka si Lōt in Panghūꞌ ataꞌu angalappas min deyom katiksaꞌan sasuku ameyaꞌ ma kabayaꞌanna. Ataꞌu isab iya anambolan saga aꞌa dusahan ma deyom kabinasahan sampay taꞌabut llaw hukuman. 10 Lubaꞌ-lagiꞌna na bang aꞌa magdūl-bayaꞌan napsu sigām landuꞌ asammal, maka mbal magaddat ma sai-sai taga-pagbayaꞌ.
Atawakkal makalanduꞌ saga guru nggaꞌi ka bꞌnnal itu, maka mamarahi sidda pagmalangkahi sigām. Mbal sigām magaddat ma saga bangsa sulgaꞌ, gom paꞌin magtunggīng. 11 Labi agaꞌos maka akawasa saga malaꞌikat min guru putingan itu, sagōꞌ minsan malaꞌikat, mbal du amahꞌllingan laꞌat ma pagkahi sigām bangsa sulgaꞌ bang taꞌabut waktu kapangaharap sigām ni Panghūꞌ. 12 Sagōꞌ saga guru itu amahꞌlling pangkal ma mbal tahati eꞌ sigām. Nihinang eꞌ sigām ai-ai makani-pikilan sigām, buwat hantang sattuwa talun ya halam taga akkal, hal sinaggaw boꞌ pinapatay. Buwattēꞌ isab kadal saga aꞌa buwattēꞌ, magmula du.
13 Katungbasan sigām kalaꞌatan ma sabab kalaꞌatan ya bay tahinang sigām. Ya makahāp palasahan sigām bang magdūlan napsu sigām sampay ma mata mairan. Ya na paꞌin pagkōg-koyagan sigām bang angakkalan kaꞌam ma waktu kapagsalubi maka sigām. Tinamakan kam eꞌ sigām, binuwanan kamaruhan. 14 Tagihan sigām angꞌndaꞌ-ngꞌndaꞌ ma saga dꞌnda ya pagbaꞌisan sigām, mbal toꞌongan sinumu magdusa. Binidjakan eꞌ sigām ni kalaꞌatan saga aꞌa mbal ahogot pangandolna. Kabiyaksahan sigām maghawa napsu ma indaginis. Pagmulkaꞌan Tuhan saga aꞌa inān! 15 Bay na sigām pasaddī min palꞌngnganan abontol, alopas na min paglabayan. Ya panunuran sigām nabi bay ma masa awal, ōnna si Balaꞌam anak si Beyor. Si Balaꞌam heꞌ bay bilahi tinambahan sīn ma sabab kahinanganna alaꞌat, 16 sagōꞌ pinabukagan iya eꞌ kuraꞌ ma sabab dusana. Kuraꞌ heꞌ bay magsuwala buwat suwala manusiyaꞌ, angkan halam kalanduꞌan eꞌ si Balaꞌam karupanganna.
17 Halam aniyaꞌ pūs pagguru saga aꞌa itu. Saliꞌ sigām sapantun tuburan boheꞌ atꞌggang, atawa gabun tabowa paleyang eꞌ baliyu. Aniyaꞌ lahat tinagamahan sigām eꞌ Tuhan ma lendom bitu-bituhan. 18 Bowaꞌan sidda sigām, pangangabbu, sagōꞌ halam aniyaꞌ pūs bissala sigām. Niumpanan eꞌ sigām saga aꞌa bahaꞌu bay angꞌbba min kasāꞌan ya kabiyaksahan pagkahi sigām. Pinabilahi sigām angandūlan bayaꞌ napsu sigām makatamparasa. 19 Bang ma janjiꞌ saga guru itu, limaya sasuku ameyaꞌ-meyaꞌan hinang buwattēꞌ. Sagōꞌ ya bꞌnnalna, saliꞌ sigām banyagaꞌ kapagagihan eꞌ napsu angkan sigām subay maghinang kasabulan. 20 Saupama aꞌa bay makapuwas min kalumuꞌan dunya pagka si Isa Al-Masi Panghūꞌtam ya pangandolanna, bang iya tajallat pabīng maghinang kalumuꞌan bay bbahanna, luhūy alaꞌat kahālanna damuli min bay dahū. 21 Bang sigām bay ataꞌu ma kalꞌngnganan ya amowa ni atay abontol, boꞌ bay pataikut min panohoꞌan deyoꞌ min Tuhan, ahāp lagiꞌ sigām halam bay makataꞌuwan panohoꞌan eꞌ. 22 Taluwaꞌ sigām lling bay min kamattoꞌahan, ya yuk-i, “Eroꞌ bay anguttaꞌ, pabīng amangan uttaꞌna,” maka itu giꞌ, “Bawi bay pinandi, pabīng magtūy paloblob ni kapisakan.”