3
Pasal Llaw Kapabalik Panghūꞌ Isa
1 Saga bagay kalasahanku, kaminduwaku na anulat ni kaꞌam. Ya maksudku ma sulat dahū sampay ma sulat ītu, subay amaentoman kaꞌam pasal bay taꞌanadbi tagnaꞌ, boꞌ supaya abontol eꞌbi amikil ma halam aniyaꞌ simbugna alaꞌat. 2 Entomunbi bay pinagkallam eꞌ kanabi-nabihan ma masa awal, sampay panohoꞌan deyoꞌ min si Isa Panghūꞌtam Manglalappas. Bay kam pinanduꞌan pasal panohoꞌan inān eꞌ saga aꞌa kawakilan si Isa.
3 Ya na itu subay hatiunbi dahū min kamemon: ma kahinapusan masa itu aniyaꞌ patuwaꞌ ni deyomanbi saga aꞌa tagihan ameyaꞌ ma napsu sigām. Niudjuꞌ kam eꞌ sigām, yuk-i, 4 “Angay halam tatuman ya bay janjiꞌ si Isa pasal kapiꞌituna pabīng? Amatay na saga kamattoꞌahan kami, sagōꞌ masi na paꞌin paꞌatol dunya itu maka kakayaꞌ-kayaꞌanna. Halam aniyaꞌ apinda ma dunya itu sangay min waktu bay pamapanjari!” 5 Tuꞌud panuꞌuran eꞌ saga aꞌa angudjuꞌ itu, angkan sigām mbal angentom ma bay hinang Tuhan ma awal tagnaꞌ. Angallam iya mintꞌdda, magtūy paniyaꞌ langit maka dunya. Pinatuwaꞌ gintanaꞌan min deyom boheꞌ, boꞌ boheꞌ du bay pangahinang iya. 6 Min boheꞌ du isab angkan nilatapan dunya bay waktu awal eꞌ, pinakaꞌat eꞌ Tuhan. 7 Min pagkallam Tuhan isab, ya angkan umbanganna langit maka dunya ma buwattitu, boꞌ supaya tinunuꞌ bang taꞌabut llaw pangahukumna ma saga manusiyaꞌ ya mbal bilahi magtaꞌat ni iya. Ya na koꞌ inaꞌan llaw kapamutawan sigām min Tuhan.
8 Saga bagay, daꞌa takalipatunbi ītu: dangꞌllaw maka dangibu tahun saliꞌ du tꞌggolna bang ma bistahan Panghūꞌ. 9 Bang ma pangannal kaseheꞌan atꞌggol eꞌ Panghūꞌ anuman bay panganjanjiꞌna. Sagōꞌ nggaꞌi ka. Tuꞌud iya pasangdan angimanan kaꞌam sabab mbal iya bilahi bang aniyaꞌ minsan laꞌa hal dakayuꞌ manusiyaꞌ amutawan min iya. Ya kabayaꞌanna in manusiyaꞌ kamemon subay apinda pikilanna sampay angꞌbba min dusana.
10 Saguwāꞌ pataghaꞌ sadja ya Llaw Panghūꞌtam, buwat katꞌkka aꞌa panangkaw. Palanyap du langit ma llaw du inaꞌan, maka akosog sidda lagublubna. Ahansul eꞌ api kamemon bay paniyaꞌ ma diyataꞌ ayan. Pahalam isab dunya itu sampay kakayaꞌ-kayaꞌanna kamemon.
11 Na, pagka kataꞌuwanbi in ai-ai kamemon itu pinahalam du ma sinosōng, kira-kirahunbi toꞌongan pasal kajarihanbi bang buwattingga bowahanna. Subay kam amuspus boꞌ asussi pangatayanbi maka halam aniyaꞌ sallaꞌbi, 12 ma saltaꞌ kam angalagaran llaw kapiꞌituna inān. Subay kam patukid isab maghinang ai-ai pamahinang kaꞌam, boꞌ tasaꞌut kapiꞌituna. Ya na inaꞌan llaw pangahansul saga lapis langit ma deyom api, llaw isab panunaw ai-ai kamemon bay ma diyataꞌ ayan, sabab min pasuꞌna. 13 Saguwāꞌ kitam itu, angalagaran giꞌ panganjanjiꞌ Tuhan, hatina langit bahaꞌu maka dunya bahaꞌu ya paglahatan kaꞌadilan.
14 Angkanna, saga bagay, satꞌggol kam angalagaran llaw inaꞌan-i, patukid kam boꞌ supaya halam aniyaꞌ tamak atawa laꞌat tabāk ma pangatayanbi, hinabubi isab magdaꞌatay maka Tuhan. 15 Daꞌa bistahunbi in Panghūꞌ alallay pagka tangguhanna hukuman. Tuꞌud iya angimanan bangsa manusiyaꞌ sabab kabayaꞌanna subay aniyaꞌ waktu kapangꞌbba sigām min dusa ati boꞌ lappasan min mulkaꞌ sinōng. Buwattēꞌ du isab bay panulat ni kaꞌam eꞌ si Paul, dakayuꞌ danakantam kinalasahan. Tulun min Tuhan asal pangitaꞌuna anulatan kaꞌam buwattēꞌ. 16 Atayudtud du isab sulat si Paul kamemon bang harap ni pakaradjaꞌan sinōng inān. Sagōꞌ aniyaꞌ lapal sulatna ahunit nihati, ya pinabengkok eꞌ saga aꞌa akulang ma panghatina maka ma pangandol, buwat kapamabengkok sigām ma ayat Kitab kaseheꞌ. Tantu sigām minulkaꞌan.
17 Saga bagay, bay na kam kabandaꞌanku pasal pakaradjaꞌan itu. Angkan kam sohoꞌku pajaga boꞌ kam mbal tabowa apinda min kahogot pangandolbi. Daꞌa beyaꞌ-beyaꞌunbi kasāꞌan saga aꞌa asabul ilu, 18 sagōꞌ pasōngunbi pangandolbi ma tatabangan si Isa Al-Masi Panghūꞌtam Manglalappas. Pasōngunbi isab taꞌubi ma pasalanna. Patut iya pinasukuꞌan kamahaldikaꞌan, min waktu itu sampay ni kasaumulan! Amin. Wassalam