1 PETROS
Pahati pasal sulat itu
Si Petros itu mulid si Isa Al-Masi min mulidna kasangpūꞌ maka duwa. Bay iya pineneꞌ eꞌ Panghūꞌ Isa magnasihat lapalna. Atoꞌa na si Petros ma waktu kapanulatna sulat itu.
Bay pabeyaꞌna sulat itu ni saga bebeyaꞌan si Isa Al-Masi ya apulak-palit min lahat sigām porol. Bay sigām pininjalaꞌ eꞌ saga aꞌa mbal magkahagad ma si Isa ati pinakaukanat ni kalahat-lahatan. Pinabeyaꞌan sigām sulat itu eꞌ si Petros boꞌ aniyaꞌ pamalasig atay sigām minsan ma deyom katiksaꞌan, supaya mbal angꞌbba min pangandol sigām ma si Isa. Pinaentoman sigām pasal si Isa Al-Masi, pasal kamatayna maka kallumna pabīng, maka kabalikna ni dunya min sulgaꞌ. Angkanna sigām makaholat in sigām makasandal ma deyom kabinasahan, ati tantu sigām tinungbasan pahalaꞌ ma waktu kabalik si Isa Al-Masi.