5
Pagbandaꞌ ma saga Aꞌa Dayahan
1 Na, kaꞌam saga aꞌa dayahan, pakale na kam ma aku. Subay kam magpanangis, subay kam maglemong, ma sabab kasukkalan ya song patꞌkka ni kaꞌam. 2 Magkaꞌat na altaꞌbi, maka sꞌmmekbi ahāp aubus bay kinakan eꞌ ulat. 3 Saga bulawanbi maka pilakbi anawasaꞌ na ma deyom tauꞌan. Jari in sawasaꞌ inān tandaꞌ saksiꞌ in kaꞌam bay anipun altaꞌ paheka ma llaw kahinapusan dunya itu. Taka-taka in altaꞌbi inān sapantun api amangan isibi. 4 Dayahan kam, sagōꞌ halam kagadjihanbi saga aꞌa maghinang ma kahumaꞌanbi. Kalehunbi pangandahing saga aꞌa bay sohoꞌbi animuk buwaꞌ min tanaꞌbi. Waꞌi pasampay pangandahing sigām ni Tuhan Sangat Kawasa. 5 Kaꞌam saga dayahan, kabiyaksahan kam maghāp palasahan maka angandūlan napsubi. Ibarat kam sapiꞌ hal amahambug di-na, boꞌ mbal kataꞌuwanna song waktu panumbaliꞌ iya. 6 Bay hukumbi maka papataybi saga aꞌa halam taga-dusa, minsan sigām halam bay anaggaꞌ kaꞌam.
Pangiman ma Deyom Kabinasahan
7 Angkanna, saga dauranakanku, tatasinbi ai-ai makani-kaꞌam satꞌggol mbal pabīng Panghūꞌtam si Isa Al-Masi. Pikilunbi aꞌa maghuma, atatas iya angagaran waktu pagbuwaꞌ tanaꞌna, sabab ahalgaꞌ asal buwaꞌna ma iya. Mbal iya sinumu angagaran katꞌkka ulan, ulan pagararu maka ulan pamatahak pai. 8 Damikiyanna isab kaꞌam, subay kam mbal sinumu angagad. Pahogotunbi ataybi sabab asekot na waktu papiꞌitu Panghūꞌtam. 9 Saga dauranakanku, daꞌa pagmusmurinbi seheꞌbi bebeyaꞌan si Isa Al-Masi, boꞌ kam mbal taluwaꞌ hukuman Tuhan. Ilu na ya maghuhukum, asekot na toꞌongan.
10 Saga dauranakanku, pikilunbi saga nabi, ya bay amowa lapal deyoꞌ min Panghūꞌ ma masa awal eꞌ. Panunurinbi sigām, pagka sigām bay atuyuꞌ angiman ma deyom kabinasahan. 11 Bang ma bistahanta, taga-kahāpan asal saga aꞌa makatatas buwattēꞌ. Takalebi pasal kasandal si Ayyub waktuna ma deyom kasusahan. Kataꞌuwanbi isab kamaujuranna, ahāp bay panungbas Panghūꞌ ma iya. Sabab landuꞌ patiaseꞌun maka patilasahun Panghūꞌtam.
12 Saga dauranakanku, ahalgaꞌ pamituwaku itu min kamemon: bang aniyaꞌ bissalabi daꞌa kam magsapa. Daꞌa sibahatunbi sulgaꞌ atawa dunya atawa ai-ai saddī pagsapahanbi. Magahoꞌ sadja kam bang subay ahoꞌ. Magꞌmbal isab bang subay mbal. Daꞌa palabihunbi minnēꞌ, boꞌ kam mbal taluwaꞌ hukuman Tuhan.
Pangamuꞌ-ngamuꞌ maka Pangandol
13 Abila aniyaꞌ aꞌa mailu ma kaꞌam tꞌkkahan kasusahan, subay iya angamuꞌ tabang ni Tuhan. Abila isab aniyaꞌ ma kaꞌam kinōgan, subay iya angalang saga kalangan pamudjina Tuhan. 14 Abila aniyaꞌ ma kaꞌam taga-saki, subay tambukuhanna saga pagmattoꞌahan ma palhimpunan si Isa Al-Masi mailu. Ati saga mattoꞌa inān subay angamuꞌ-ngamuꞌ ni Tuhan ma kamainaꞌanan aꞌa sakihan, maka subay sigām anapu iya maka nsꞌllan ma saltaꞌ sigām anabbut ōn Panghūꞌtam. 15 Manjari itu, bang sigām angamuꞌ-ngamuꞌ, boꞌ ahogot asal pangandol sigām ma Tuhan, aꞌa inān kauliꞌan du. Niuliꞌan du iya eꞌ Panghūꞌ, maka bang aniyaꞌ dusana, niampun du. 16 Angkan yukku ma kaꞌam, magpasabꞌnnal kam pasal saga dusabi ni pagkahibi bebeyaꞌan si Isa Al-Masi. Amuꞌinbi isab tabang ni Tuhan ma sabab pagkahibi dangan maka dangan, boꞌ supaya kam kauliꞌan. Bang aꞌa abontol angamuꞌ ni Tuhan min deyom atayna, abarakat toꞌongan pangamuꞌna.
17 Si Nabi Elija eꞌ, manusiyaꞌ du buwat kitam. Bay iya anabbut Tuhan min deyom atayna ma masa awal eꞌ, angamuꞌ subay mbal angulan. Jari halam toꞌongan aniyaꞌ ulan amꞌttak ni lahat inān ma deyom tꞌlluntahun maka tongaꞌ. 18 Puwas eꞌ bay iya angamuꞌ-ngamuꞌ pabalik subay aniyaꞌ ulan. Angulan magtūy, jari magbuwaꞌ saga tinanom.
19 Na, saga dauranakanku, abila aniyaꞌ min kaꞌam pasihaꞌ min panduꞌ bꞌnnal, boꞌ aniyaꞌ aꞌa dangan amowa iya ameyaꞌ ma panduꞌ bꞌnnal pabalik, ahāp koꞌ heꞌ. 20 Tauꞌunbi itu ma deyom pikilanbi: sai-sai makabowa aꞌa dusahan angꞌbba min kasāꞌanna, lappasan eꞌna aꞌa dusahan inān boꞌ mbal pinehēꞌ ni deyom nalkaꞌ, ati taꞌampun du paldusahanna aheka. Wassalam