4
Magmaluluy Sadja Kam ma Tuhan
1 Ai poꞌonna angkan kam araran magsaggaꞌ maka maglugat? Min napsubi koꞌ ilu, ya magkosog-kosogan na paꞌin ma deyom ataybi. 2 Aniyaꞌ kabayaꞌanbi sagōꞌ mbal taꞌāꞌbi, angkan kam bilahi amapatay. Aniyaꞌ kanapsuhanbi sagōꞌ mbal kam karūlan, angkan kam magsaggaꞌ maka magbonoꞌ. Mbal kam pinaniyaꞌan ai-ai ya kabayaꞌanbi, sabab mbal kam angamuꞌ ni Tuhan. 3 Maka minsan isab amuꞌbi, mbal kam binuwanan sabab alaꞌat kōkbi. Tuꞌud kam bilahi magparūl napsubi, angkan kam angamuꞌ. 4 Kaꞌam ilu saliꞌ sapantun aꞌa angaliyu-lakad ni nggaꞌi ka pagholaꞌna. Halam bahāꞌ kataꞌuwanbi? Sasuku amanuyuꞌ ma kalaꞌatan ai-ai ma dunya itu, kabꞌnsihanna Tuhan. Maka sasuku kaꞌamuhan ma addat-tabiꞌat ya sinunuran ma dunya itu, bantahanna Tuhan. 5 Maraiꞌ pangannalbi mbal bꞌnnal ya tasulat ma deyom Kitab, ya yuk-i, “In ginhawa bay pinatꞌnnaꞌ eꞌ Tuhan ma deyom baranta akosog asal magnapsu.” 6 Sagōꞌ akosog lagiꞌ tabang Tuhan ma kita min saga napsu ya amowa-mowa baranta, buwat bay tasulat ma deyom Kitab, ya yuk-i,
“Sinaggaꞌ eꞌ Tuhan saga aꞌa alanga atayna,
sagōꞌ tinabangan eꞌna saga aꞌa areyoꞌ atayna.”
7 Angkan kam subay magmaluluy sadja ma kabayaꞌan Tuhan. Paggatunbi nakuraꞌ saitan ati alahi du iya min kaꞌam. 8 Pasekot kam ni Tuhan ati sinekot kam isab eꞌna. Kaꞌam saga dusahan ilu, bbahinbi saga hinangbi alaꞌat. Kaꞌam isab, ya mbal magtaluwaꞌ hinangbi maka llingbi, sussihunbi deyom ataybi. 9 Kasukkalinbi saga kalaꞌatan ya tahinangbi. Magkarukkaꞌan kam maka magtangis. Ya pagtittowabi maka kakōganbi subay pininda ni kasusahan. 10 Pareyoꞌunbi ataybi tudju ni Panghūꞌ ati pinalanga du kam eꞌna.
11 Saga dauranakanku, daꞌa kam angalimut kaseheꞌanbi. Sabab sasuku angalimut atawa anoway danakanna bebeyaꞌan si Isa, saliꞌ saraꞌ Tuhan maka kahandakna ya sowayna. Jari bang kam gantaꞌ anoway kahandak Tuhan, tantu mbal beyaꞌbi sabab yukbi aniyaꞌ sāꞌna. 12 Dakayuꞌ-kayuꞌ Tuhan ya amatꞌnnaꞌ saraꞌ maka angahukum. Tunggal du iya ya angalappas maka tunggal iya amowa ni kamulahan. Angkan halam aniyaꞌ kapatutbi anoway pagkahibi manusiyaꞌ.
Pagbandaꞌ Pasal Pagabbu
13 Pakale kam sasuku kam magpangupama pasal llaw sinōng. Yukbi, “Salung atawa simuddai pehēꞌ du kami ni daꞌira inaꞌan-i ati pahantiꞌ kami dantahun mainaꞌan maglitu supaya aheka sīn paluntungan kami.” 14 Malaingkan mbal kataꞌuwanbi bang ai patꞌkka ni kaꞌam salung! Kallumbi ma dunya itu saliꞌ dalil husbu. Daiꞌ-daiꞌ du taꞌndaꞌ, magtūy palanyap. 15 Angkan subay buwattitu pahꞌllingbi, “Bang min kabayaꞌan Panghūꞌ, allum giꞌ kami ati makahinang itu-ini.” 16 Sagōꞌ kaꞌam ilu, alanga ataybi maka abbuhan kam. Boꞌ arapun in pagabbu buwattilu alaꞌat kamemon. 17 Manjari sai-sai ataꞌuwan hinang ahāp boꞌ mbal hinangna, taga-dusa du iya.