HIBRANI
Pahati pasal sulat itu
Mbal kinataꞌuwan bang sai bay anulat sulat itu, sagōꞌ aheka amꞌnnal si Paul ya bay anulat.
Sulat itu bay sinulatan saga bangsa Hibrani, hatina bangsa Yahudi, sasuku magkahagad ma si Isa Al-Masi. Pagka sigām ameyaꞌ ma si Isa, kinabꞌnsihan sigām eꞌ pagkahi sigām Yahudi ya mbal magkahagad. Niudjuꞌ sigām sampay bininasa boꞌ angꞌbba min pangandol sigām ma Panghūꞌ Isa. Aniyaꞌ jamaꞌa si Isa kaseheꞌ mbal makasandal bininasa, jari pabīng ni bay agama sigām tagnaꞌ. Angkanna sulat itu bay pinabowa ni saga aꞌa sukuꞌ si Isa, pamatꞌttog atay sigām supaya sigām amalut pahogot ma iya.
Nihaka ma sulat itu pasal si Isa, Anak Tuhan asal iya alanga lagiꞌ min si Musa, alanga isab min saga malaꞌikat. Aheya isab kamatay si Isa min susumbaliꞌan ya pinagkulban eꞌ bangsa Yahudi pamapuwas dusa. Nihaka isab maitu pasal manusiyaꞌ pinaghāp na maka Tuhan ma sabab hinang si Isa, maka halam aniyaꞌ saddī min iya magpatillot ma manusiyaꞌ maka Tuhan.